GSSSB Recruitment 2025: ગુજરાત ગૌણ સેવા પસંદગી મંડળ (GSSSB) દ્વારા 2025 ની મોટી ભરતીની જાહેરાત કરવામાં આવી છે. નાણાં વિભાગ હસ્તકની કચેરીઓ માટે કુલ 426 જગ્યાઓ પર આ ભરતી પ્રક્રિયા હાથ ધરાશે. જેમાં સબ ઓડિટર, પેટા હિસાબનીશ અને પેટા તિજોરી અધિકારી/અધિક્ષક જેવી વર્ગ-3 ની પ્રતિષ્ઠિત પોસ્ટનો સમાવેશ થાય છે. આ ભરતી માટેની ઓનલાઈન અરજી પ્રક્રિયા આવતીકાલે, 17 નવેમ્બર, 2025 (બપોરે 2 વાગ્યાથી) ojas.gujarat.gov.in પોર્ટલ પર શરૂ થશે.
ભરતીની જગ્યાઓનું વિવરણ
GSSSB દ્વારા જાહેર કરાયેલ નોટિફિકેશન (જાહેરાત ક્રમાંક: 366/202526) મુજબ, નાણાં વિભાગ હેઠળના હિસાબ અને તિજોરીની કચેરી હસ્તકના વિવિધ સંવર્ગો માટે આ સીધી ભરતી યોજાશે. કુલ જગ્યાઓને બે મુખ્ય સંવર્ગોમાં વહેંચવામાં આવી છે, જે નીચે મુજબ છે:
પેટા હિસાબનીશ / સબ ઓડિટર (વર્ગ-3): કુલ 321 જગ્યાઓ
હિસાબનીશ, ઓડિટર / પેટા તિજોરી અધિકારી / અધિક્ષક (વર્ગ-3): કુલ 105 જગ્યાઓ
કુલ જગ્યાઓ: 426
અરજી પ્રક્રિયા અને મહત્વપૂર્ણ તારીખો
રસ ધરાવતા અને લાયક ઉમેદવારોએ ફક્ત ojas.gujarat.gov.in પોર્ટલ પર જઈને ઓનલાઈન અરજી કરવાની રહેશે. અરજી પ્રક્રિયા અને અન્ય તારીખોનું સમયપત્રક નીચે મુજબ છે:
ઓનલાઈન અરજી શરૂ થવાની તારીખ: 17 નવેમ્બર, 2025 (બપોરના 14:00 કલાકથી)
ઓનલાઈન અરજી કરવાની છેલ્લી તારીખ: 30 નવેમ્બર, 2025 (રાત્રે 23:59 વાગ્યા સુધી)
પરીક્ષા ફી ભરવાની છેલ્લી તારીખ: 02 ડિસેમ્બર, 2025 (રાત્રે 23:59 વાગ્યા સુધી)
શૈક્ષણિક લાયકાત અને વય મર્યાદા
આ જગ્યાઓ માટે શૈક્ષણિક લાયકાત UGC માન્ય યુનિવર્સિટીમાંથી સ્નાતકની ડિગ્રી નક્કી કરવામાં આવી છે. ઉમેદવારો પાસે બેચલર ઓફ બિઝનેસ એડમિનિસ્ટ્રેશન (BBA), બેચલર ઓફ કોમ્પ્યુટર એપ્લિકેશન (BCA), બેચલર ઓફ કોમર્સ (B.Com), અથવા બેચલર ઓફ સાયન્સ/આર્ટ્સ (મુખ્ય વિષયો તરીકે ગણિત/આંકડાશાસ્ત્ર/અર્થશાસ્ત્ર સાથે) ની ડિગ્રી હોવી આવશ્યક છે. વય મર્યાદા 30 નવેમ્બર, 2025 ના રોજ 20 વર્ષથી ઓછી અને 35 વર્ષથી વધુ ન હોવી જોઈએ. અનામત કેટેગરીના ઉમેદવારોને નિયમ મુજબ મહત્તમ 40 કે 45 વર્ષની મર્યાદામાં છૂટછાટ મળશે.
પગારધોરણ અને પરીક્ષા પદ્ધતિ
પસંદગી પામેલા ઉમેદવારોને પ્રથમ પાંચ વર્ષ માટે ફિક્સ પગાર પર નિમણૂક આપવામાં આવશે.
પેટા હિસાબનીશ/સબ ઓડિટર: પ્રતિમાસ ₹25,000/-
હિસાબનીશ/પેટા તિજોરી અધિકારી/અધિક્ષક: પ્રતિમાસ ₹48,500/-
ભરતી પ્રક્રિયા બે તબક્કામાં યોજાશે. પ્રથમ તબક્કો (ભાગ-1) પ્રિલિમિનરી પરીક્ષા હશે, જે 150 ગુણની MCQ આધારિત હશે (લઘુત્તમ લાયકાત ધોરણ 40%). બીજા તબક્કામાં (ભાગ-2) મુખ્ય પરીક્ષા યોજાશે, જેમાં 100-100 ગુણના બે વર્ણનાત્મક પેપર (ભાષા અને એકાઉન્ટન્સી/ઓડિટિંગ) હશે. મુખ્ય પરીક્ષા માટે કુલ જગ્યાઓના આશરે 7 (સાત) ગણા ઉમેદવારોને લાયક ઠેરવવામાં આવશે. અંતિમ પસંદગી યાદી મુખ્ય પરીક્ષાના ગુણના આધારે તૈયાર થશે.
અરજી ફી અને પરત મેળવવાની શરત
અરજી ફી અંગે, બિનઅનામત (General) વર્ગના ઉમેદવારોએ પ્રિલિમિનરી પરીક્ષા માટે ₹400/- ચૂકવવાના રહેશે. જ્યારે અનામત વર્ગના તમામ ઉમેદવારો (મહિલા, SC, ST, SEBC, EWS, દિવ્યાંગ, માજી સૈનિક) માટે ફી ₹200/- રાખવામાં આવી છે. મંડળે એક મહત્વપૂર્ણ જાહેરાત કરી છે કે જે ઉમેદવારો પરીક્ષામાં હાજર રહેશે, તેમને તેમની પરીક્ષા ફી પરત મળવાપાત્ર રહેશે. ઉમેદવારોને સલાહ આપવામાં આવે છે કે તેઓ GSSSB ની સત્તાવાર વેબસાઇટ નિયમિતપણે જોતા રહે.