Gujarat Assembly Election 2022: 2001માં નરેન્દ્ર મોદી ગુજરાતના મુખ્ય પ્રધાન બન્યા ત્યારથી છેલ્લી રાજ્યની વિધાનસભા ચૂંટણીમાં ભાજપના સૌથી ખરાબ પ્રદર્શનમાંથી કદાચ બોધપાઠ લઈને, તેણે આ ચૂંટણીમાં પોતાની તમામ તાકાત લગાવી દીધી છે. રાજ્યમાં પ્રથમ તબક્કાના મતદાન પહેલા અને છેલ્લા 20 દિવસમાં વડાપ્રધાન મોદી, કેન્દ્રીય ગૃહમંત્રી અમિત શાહ, પાર્ટીના રાષ્ટ્રીય અધ્યક્ષ જેપી નડ્ડા સહિત અડધો ડઝન મુખ્યમંત્રીઓ અને અન્ય કેન્દ્રીય નેતાઓએ લગભગ 150 નાની-મોટી જનસભાઓ યોજી છે.
જેમાંથી માત્ર મોદી અને શાહે જ ત્રણ ડઝનથી વધુ જાહેરસભાઓને સંબોધી છે. આ બે નેતાઓ ઉપરાંત, પાર્ટી શાસિત રાજ્યોના મુખ્ય પ્રધાનો અને કેન્દ્રીય પ્રધાનો અને ચોક્કસ જાતિ અને પ્રદેશોના નેતાઓ પણ રાજ્યમાં પ્રવાસ કરી રહ્યા છે. ચૂંટણી વ્યૂહરચના સાથે સંકળાયેલા ભાજપના એક નેતાએ જણાવ્યું હતું કે વડાપ્રધાન આવતા રવિવારે ખેડા, નેત્રંગ અને સુરતમાં ચૂંટણી સભાઓને સંબોધશે અને પક્ષના ઉમેદવારોની તરફેણમાં પ્રચાર કરશે. બીજા દિવસે તેઓ ચાર જાહેર સભાઓને સંબોધશે.
અમરેલી, ભાવનગર, વડોદરા અને અમદાવાદની વિવિધ સીટો પર પ્રચાર કર્યા બાદ શાહ અન્ય વિસ્તારોમાં પ્રચારનું નેતૃત્વ કરશે, રાષ્ટ્રીય અધ્યક્ષ જેપી નડ્ડા હિંમતનગરમાં રોડ શો કરશે.
ગુજરાતની 182 સભ્યોની વિધાનસભા માટે બે તબક્કામાં 1 ડિસેમ્બર અને 5 ડિસેમ્બરે મતદાન થશે અને મત ગણતરી 8 ડિસેમ્બરે થશે. પ્રથમ તબક્કામાં કચ્છ, સુરેન્દ્રનગર, મોરબી, રાજકોટ, જામનગર, દેવભૂમિ દ્વારકા, પોરબંદર, જૂનાગઢ, ગીર-સોમનાથ, અમરેલી, ભાવનગર, બોટાદ, નર્મદા, ભરૂચ, સુરત, તાપી, ડાંગ, નવસારી અને વલસાડ જિલ્લાની 89 બેઠકો પર મતદાન થશે. આ તબક્કામાં કુલ 788 ઉમેદવારો મેદાનમાં છે.
ચૂંટણી પંચે 3 નવેમ્બરે ગુજરાત વિધાનસભાની ચૂંટણીની તારીખોની જાહેરાત કરી હતી અને તેની સાથે રાજ્યમાં આદર્શ ચૂંટણી સંહિતા લાગુ થઈ ગઈ હતી. આ પછી વડાપ્રધાન મોદીએ 6 નવેમ્બરે દક્ષિણ ગુજરાતના વલસાડ જિલ્લાના કપરાડાથી ભાજપના ચૂંટણી પ્રચારની શરૂઆત કરી હતી.
બીજા દિવસે સોમનાથમાં પૂજા અર્ચના કર્યા બાદ પ્રધાનમંત્રી મોદીએ વેરાવળ, ધોરાજી, અમરેલી અને બોટાદમાં ચૂંટણી સભાઓને સંબોધી હતી. દિવસભર રેલી કર્યા બાદ તેઓ અમદાવાદમાં પાર્ટીના સ્ટેટ હેડક્વાર્ટર કમલમ ખાતે ભાજપના નેતાઓ અને કાર્યકરોને પણ મળ્યા હતા.
પ્રધાનમંત્રી નરેંદ્ર મોદીએ બીજા દિવસે ત્રણ ચૂંટણી સભાઓ યોજી હતી. તેમણે પ્રથમ સભા સુરેન્દ્રનગરમાં, બીજી જંબુસરમાં અને ત્રીજી નવસારીમાં યોજી હતી. વડાપ્રધાને 23 અને 24 નવેમ્બરે મહેસાણા, દાહોદ, વડોદરા, ભાવનગર, પાલનપુર મોડાસા, દહેગામ અને બાવલામાં ચૂંટણી સભાઓને સંબોધી હતી. વડા પ્રધાન તેમનો મોટાભાગનો સમય તેમની સભાઓમાં ભાજપના શાસનમાં રાજ્યમાં થયેલા વિકાસ કાર્યોને રેખાંકિત કરવામાં વિતાવે છે અને "ડબલ એન્જિન" સરકાર હોવાના ફાયદાઓની પણ ગણતરી કરે છે. ભાજપ કેન્દ્ર અને રાજ્યમાં એક જ પક્ષની સરકારને ‘ડબલ એન્જિન’ સરકાર ગણાવે છે. તેને મુદ્દો બનાવીને વડાપ્રધાન સહિત ભાજપના અન્ય નેતાઓ તેને દરેક ચૂંટણી રેલીમાં ઉઠાવી રહ્યા છે.
તાજેતરમાં એક ચૂંટણી સભાને સંબોધતા મોદીએ કહ્યું હતું કે ગુજરાતની આ ચૂંટણી ન તો ધારાસભ્યો કે સરકારને ચૂંટવા માટે છે, પરંતુ આગામી 25 વર્ષ માટે રાજ્યનું ભાવિ નક્કી કરવાની છે. તેમણે કહ્યું કે કેન્દ્ર અને ગુજરાતમાં ભાજપની આગેવાની હેઠળની સરકારોએ રાજ્યમાં ઘણા વિકાસ કાર્યો કર્યા છે, પરંતુ હવે "મોટી છલાંગ" લેવાનો સમય આવી ગયો છે.