Gujarat Assembly Election 2022: ગુજરાત વિધાનસભાની ચૂંટણીનું બંને તબક્કાનું મતદાન શાંતિપૂર્ણ માહોલમાં પૂર્ણ થયું હતું. બંને તબક્કાના મતદાન બાદ હવે ચૂંટણીના પરિણામ માટેની મતગણતરીની પ્રક્રિયા શરૂ થઈ ગઈ છે. શરૂઆતના વલણોમાં ભાજપ 153, કોગ્રેસ 19 અને આપ બે બેઠક પર આગળ છે.
અમરેલી બેઠક પરથી કોગ્રેસના પરેશ ધાનાણી આઠ હજાર મતથી પાછળ છે. સાવરકુંડલા બેઠક પરથી કોગ્રેસના પ્રતાપ દૂધાત 1900 મતથી આગળ છે. રાજુલા બેઠક પરથી કોગ્રેસના અંબરીશ ડેર પાછળ છે. લાઠી બેઠકથી ભાજપના જનક તલાવિયા બે રાઉન્ડના અંતે 1072 મતથી આગળ છે.
ધારી બેઠક પરથી ભાજપના જે.વી.કાકડિયા 896 મતથી આગળ છે. ખંભાળિયા બેઠક પરથી ત્રણ રાઉન્ડના અંતે ઇસુદાન ગઢવી પાંચ હજાર મતથી આગળ છે. ઇસુદાન ગઢવીને 10 હજાર 254 મત મળ્યા હતા.
અમરેલી જિલ્લામાં શું છે સ્થિતિ
અમરેલી જિલ્લામાં 5 બેઠકો છે. જેમાં ત્રણ સીટ પર કોંગ્રેસ, એક સીટ પર ભાજપ અને એક સીટ પર આમ આદમી પાર્ટી આગળ છે. અમરેલી જિલ્લાની મત ગણતરી પ્રતાપરાય આર્ટ્સ કોલેજ ખાતે થઈ રહી છે. દરેક બેઠકમાં 14 ટેબલ પર મત ગણતરી થઈ રહી છે.
ગુજરાતમાં 27 વર્ષથી ભાજપની સરકાર છે
રાજ્યમાં છેલ્લા 27 વર્ષથી ભાજપની સરકાર છે. ગુજરાતમાં ભાજપનું અગાઉનું શ્રેષ્ઠ પ્રદર્શન 2002માં હતું, જ્યારે તેણે 182 સભ્યોની વિધાનસભામાં 127 બેઠકો જીતી હતી. ગુજરાતમાં પરંપરાગત રીતે ભાજપ અને કોંગ્રેસ વચ્ચે સ્પર્ધા રહી છે, પરંતુ આ વખતે AAP મેદાનમાં ઉતરતા ત્રિકોણીય બની છે. જો કે, એક્ઝિટ પોલના અનુમાનમાં કહેવામાં આવ્યું છે કે ભાજપને મોટી જીત મળશે.
શું હિમાચલમાં ઉલટફેર થશે?
હિમાચલ પ્રદેશમાં 1985 થી, કોઈપણ પક્ષ સતત બે વિધાનસભા ચૂંટણી જીતી શક્યો નથી. જો આ પહાડી રાજ્યમાં ભારતીય જનતા પાર્ટી સત્તામાં રહેશે તો તે એક રેકોર્ડ હશે. હિમાચલ પ્રદેશના એક્ઝિટ પોલમાં પણ ભાજપની જીતની આગાહી કરવામાં આવી છે. એબીપી ન્યૂઝ સી-વોટરના એક્ઝિટ પોલ મુજબ, હિમાચલ પ્રદેશની ચૂંટણીમાં ભાજપને 33-41 બેઠકો, કોંગ્રેસને 24-32 બેઠકો, AAPને શૂન્ય અને અન્યને 0-4 બેઠકો મળવાની ધારણા છે.
હિમાચલને લઈને ચૂંટણી પંચના તાજેતરના આંકડાઓ અનુસાર ભાજપ 22 સીટો પર આગળ છે. બીજી તરફ કોંગ્રેસ 16 સીટો પર આગળ છે. જ્યારે 3 બેઠકો પર અપક્ષ ઉમેદવારો આગળ છે.