ગાંધીનગરઃ ગુજરાતના ભૂતપૂર્વ મુખ્યમંત્રી વિજય રૂપાણી નારાજ હોવાની ચર્ચા વચ્ચે ભાજપ પ્રદેશ પ્રમુખ સી. આર. પાટિલે કહ્યું છે કે,ભાજપમાં કોઈ નારાજ નથી અને વિજયભાઈ રૂપાણી પણ આજના પીએમ મોદીએ નમો એપથી પેજ કમિટીના સભ્યો સાથે ચર્ચા કરી એ કાર્યકમમાં જોડાયા હતા. પાટીલે કહ્યું કે, અત્યારે કોઈ નારાજ નથી અને પક્ષમાં જવાબદારીઓ બદલાતી રહેતી હોય છે તેથી તેને નારાજગી ના કહેવાય.
પાટીલે કહ્યું કે, પીએમ મોદીએ નમો એપથી પેજ કમિટીના સભ્યો સાથે ચર્ચા કરી એ કાર્યક્રમમાં રાજ્યના 8 જેટલા પેજ સમિતિના સભ્યો સાથે મોદીએ વાતચીત કરી હતી.તેમણે પેજ કમિટીના સભ્યો કુપોષણ બાબતમાં કામ કરે તેવી પહેલ કરવા વિનંતી કરી હતી. તેમણે કહ્યું કે, પેજ કમિટી માટેના જે સૂચનો વ્યક્ત કર્યા તે અંગે અમે કામ કરીશું.
ગુજરાતના મુખ્યમંત્રીપદેથી રાજીનામું આપનારા વિજય રૂપાણીની સોમવારે રાજકોટના મુખ્યમંત્રી ભૂપેન્દ્ર પટેલના કાર્યક્રમમાં સાવ બાદબાકી કરી નંખાઈ તેનો વિવાદ વકર્યો છે. તેના કારમે રૂપાણી નારાજ હોવાની ચર્ચા છે.
રાજકોટમાં લક્ષ્મીનગર અન્ડર બ્રિજનું સોમવારે સવારે 9.45 કલાકે મુખ્યમંત્રી ભુપેન્દ્ર પટેલના હસ્તે લોકાર્પણ કરાયું હતું. લક્ષ્મીનગર અન્ડર બ્રિજના લોકાર્પણ કાર્યક્રમની આમંત્રણ પત્રિકામાં પૂર્વ મુખ્યમંત્રી અને રાજકોટ પશ્ચિમ મતવિસ્તારના ધારાસભ્ય વિજયભાઈ રૂપાણીનું નામ જ નહોતું લખાયું. વિજય રૂપાણી ભલે મુખ્યમંત્રી ના રહ્યા પણ રાજકોટ પશ્ચિમ મતવિસ્તારના ધારાસભ્ય તો છે જ.
લક્ષ્મીનગર અન્ડર બ્રિજના લોકાર્પણ કાર્યક્રમની આમંત્રણ પત્રિકામાં વિજય રૂપાણી સિવાયના રાજકોટના તમામ ધારાસભ્યોનાં નામ હતાં ત્યારે રૂપાણીનું નામ જાણી જોઈને કાઢી નંખાયું છે કે શું એવો સવાલ પૂછાઈ રહ્યો છે. ભાજપનાં સૂત્રોના મતે, આ વિજય રૂપાણીનું બહુ મોટું અપમાન કહેવાય કેમ કે રૂપાણી કરતાં અનેક ગણા જુનિયર ધારાસભ્યોનાં નામ યાદ આવ્યાં પણ રૂપાણીનું નામ યાદ ના રહ્યું.
રૂપાણીની વર્તમાન સરકાર અને ભાજપ સંગઠન પણ ઉપેક્ષા કરી રહી હોવાની ચર્ચા સતત ચાલ્યા કરે છે. આ ચર્ચા વચ્ચે રાજકોટમાં બનેલી ઘટનાના પગલે ભાજપમાં જ એવી ચર્ચા છે કે, ગુજરાતના મુખ્યમંત્રીપદેથી રાજીનામું આપ્યા પછી વિજય રૂપાણીને કોરાણે મૂકી દેવાયા છે.