Gujarat work from home news: ગુજરાત સરકાર હવે પેટ્રોલ-ડીઝલ અને સરકારી ખર્ચ બચાવવા માટે પૂરેપૂરા એક્શન મોડમાં આવી ગઈ છે. એક તરફ મુખ્યમંત્રી અને નાયબ મુખ્યમંત્રીના કાર્યક્રમો હવે ઓનલાઈન (વર્ચ્યુઅલ) યોજવાની તૈયારીઓ ચાલી રહી છે, તો બીજી તરફ નોકરિયાત વર્ગ માટે પણ એક મોટા સમાચાર છે. રાજ્યના શ્રમ અને રોજગાર મંત્રી કુંવરજી બાવળિયાએ સંકેત આપ્યો છે કે, મોટા શહેરોમાં ટ્રાફિક અને ઈંધણનો વપરાશ ઘટાડવા માટે પ્રાઇવેટ કંપનીઓમાં ફરીથી 'વર્ક ફ્રોમ હોમ' (Work From Home) કલ્ચર લાવવા પર ગંભીરતાથી વિચારણા થઈ રહી છે.
અત્યારે રાજ્ય સરકાર ખર્ચ અને ઈંધણ ઘટાડવાના આ મોટા પ્લાનિંગ પર ઉચ્ચ સ્તરે કામ કરી રહી છે. સૂત્રોના જણાવ્યા અનુસાર, હવે મુખ્યમંત્રી અને નાયબ મુખ્યમંત્રીના મોટાભાગના બહારના (આઉટડોર) સરકારી કાર્યક્રમો ડિજિટલ માધ્યમથી જ યોજાય તેવી પૂરેપૂરી શક્યતા છે. હેલિકોપ્ટર અને સરકારી ગાડીઓના ઉપયોગમાં કાપ મૂકીને એવિએશન ફ્યુઅલ અને પેટ્રોલ-ડીઝલની મોટી બચત કરવાનો સરકારનો સીધો ટાર્ગેટ છે. આનાથી સરકારનો સમય અને પૈસા બંને બચશે.
રાજ્યમાં જે રીતે પેટ્રોલ અને ડીઝલનો વપરાશ સતત વધી રહ્યો છે, તેને કંટ્રોલ કરવા સરકારે નવા રસ્તાઓ વિચારવાનું શરૂ કર્યું છે. આ અંગે મંત્રી કુંવરજી બાવળિયાએ એક મહત્વપૂર્ણ નિવેદન આપતા જણાવ્યું હતું કે, કોર્પોરેટ સેક્ટરમાં શક્ય હોય ત્યાં સુધી 'વર્ક ફ્રોમ હોમ'ને પ્રોત્સાહન આપવામાં આવશે. ખાસ કરીને મોટા શહેરોમાં લોકો રોજિંદા ઓફિસ જવા-આવવા માટે વાહનોનો ખૂબ ઉપયોગ કરે છે. જો તેમને ઘરેથી કામ કરવાની છૂટ આપવામાં આવે, તો પેટ્રોલ-ડીઝલની બચતમાં આ પદ્ધતિ ખૂબ જ અસરકારક સાબિત થઈ શકે છે.
પીએમ મોદીની દેશને અપીલ: ઓફિસોમાં વર્ક ફ્રોમ હોમ અને સ્કૂલોમાં ઓનલાઈન ક્લાસ ચલાવો
મંત્રીએ વધુમાં એમ પણ સ્પષ્ટ કર્યું કે, આ મામલે સરકાર ટૂંક સમયમાં જ અનેક ખાનગી કંપનીઓ અને એસોસિએશનો સાથે બેઠક કરશે. તેમની સાથે ચર્ચા-વિચારણા કર્યા પછી જ આ અંગે કોઈ યોગ્ય નિર્ણય લેવામાં આવશે. જોકે, આ બધું લાગુ કરતા પહેલા વહીવટી નિયમો અને પ્રોટોકોલનું પૂરેપૂરું પાલન કરવામાં આવશે. ઉદ્યોગપતિઓ અને કર્મચારીઓ, બંનેને અનુકૂળ રહે તેવું આયોજન ગોઠવાશે. સરકારની આ હિલચાલ જોતા લાગી રહ્યું છે કે આવનારા સમયમાં કોર્પોરેટ સેક્ટરમાં 'વર્ક ફ્રોમ હોમ' ટ્રેન્ડ ફરી પાછો આવી શકે છે.
પીએમ મોદીની 24 કલાકમાં 2 વખત ઈંધણ બચાવવની અપીલ, પણ લોકડાઉન જેવી સ્થિતિ નથી, જાણો 3 મોટા કારણો