આ 48 કલાકમાં 11 તાલુકામાં સૌથી વધુ 4થી 9 ઈંચ સુધીનો વરસાદ નોંધાયો હતો. જેમાં પોશીનામાં 8.6 ઈંચ, હારીજમાં 8 ઇંચ, સતલાસણામાં 6.48 ઇંચ, અમીરગઢમાં 5.56 ઇંચ, ખેડબ્રહ્મામાં 5.44 ઇંચ, દાંતામાં 5 ઇંચ, સિધ્ધપુરમાં 4.68 ઇંચ, પાલનપુરમાં 4.6 ઇંચ, વડગામ અને ઊંઝામાં 4.16 ઇંચ, ભિલોડા અને હિંમતનરમાં 4 ઇંચ વરસાદ વરસ્યો હતો.
બે દિવસના વરસાદમાં મહેસાણા જિલ્લામાં સતલાસણા તાલુકાના ભાલુસણાથી નાનીભાલુ જતો રોડ ધોવાયો હતો. સાબરકાંઠા જિલ્લામાં તાજપુર કુઈમાં એક મકાન અને બડોલીમાં દુકાન ધરાશાયી થયું હતું. ઈરના દેત્રોલી ગામની નદીમાં ઘોડાપૂર આવતાં સંર્પક વિહોણું બન્યું હતું.
રાજકોટમાં ગુરુવાર સાંજથી શુક્રવાર સાંજ સુધીના 24 કલાકમાં બે ઇંચ જેટલું પાણી વરસી ગયું હતું. ભાવનગરમાં શુક્રવારે એક ઇંચ વરસાદ પડી ગયો હતો. જ્યારે સિહોરમાં અડધા ઇંચથી વધુ અને તળાજા, જેસર અને ઘોઘામાં હળવા ઝાપટા વરસી ગયા હતા.
વડોદરામાં શુક્રવારે શહેરમાં વરસાદનું પુન:આગમન થયું હતું.સવારે 6 વાગ્યાથી લઇને રાત્રે 8 વાગ્યા સુધીના 14 કલાકના સમયગાળામાં શહેરભરમાં 14 મી.મી વરસાદ વરસ્યો હતો.
હવામાન વિભાગ અનુસાર વરસાદી સિસ્ટમ હજુ સક્રિય હોવાથી ઉત્તર ગુજરાતમાં તેની અસર જોવા મળશે. ગુજરાતમાં છુટોછવાયો વરસાદ ચાલુ રહેવાની આગાહી કરવામાં આવી છે.