Gujarat Rain: છેલ્લા એક મહિના ગુજરાતમાં વરસાદી માહોલ જામ્યો છે, ગુજરાતમાં સાર્વત્રિક વરસાદ વરસી રહ્યો છે, નૈઋત્યના ચોમાસાએ મોટાભાગના વિસ્તારોમાં વરસાદી પાણીથી તબાહી મચાવી દીધી છે. હવે આ બધાની વચ્ચે આજે પણ હવામાન વિભાગે નવી આગાહી કરી છે. આજે રાજ્યમાં 19 જિલ્લામાં વરસાદની આગાહી કરવામાં આવી છે, જેમાં 14 જિલ્લામાં યલો એલર્ટ અને 13 જિલ્લામાં ઓરેન્જ એલર્ટ આપવામાં આવ્યુ છે.
ગુજરાતમાં અત્યારે એક સાથે બે સિસ્ટમ સક્રિય થતાં આગામી દિવસોમાં ભારે વરસાદની આગાહી હવામાન વિભાગ દ્વારા કરવામાં આવી છે. છેલ્લા 24 કલાકમાં ગુજરાતમાં 87 તાલુકામાં વરસાદ વરસ્યો છે. હવામાન વિભાગ દ્વારા આજે ગુજરાતમાં ભારે વરસાદની આગાહી આપવામાં આવી છે, આજે રાજ્યના 14 જિલ્લામાં ભારે વરસાદ ખાબકી શકે છે. તાજા અપડેટ પ્રમાણે, આજે 3જી જુલાઇએ રાજ્યમાં 13 જિલ્લાને યલો એલર્ટ પર મુકવામાં આવ્યા છે, આ ઉપરાંત 14 જિલ્લામાં ઓરેન્જ એલર્ટ અને 19 જિલ્લામાં વરસાદનું યલો એલર્ટ આપવામાં આવ્યુ છે. ખાસ વાત છે કે, રાજ્યમાં બે વરસાદી સિસ્ટમ સક્રિય થતાં ગાજવીજ સાથે વરસાદ ખાબકશે આ દરમિયાન 40 કિમીની ઝડપે પવન પણ ફૂંકાશે.
ડાંગ જિલ્લામાં છેલ્લા 24 કલાકમાં ભારે વરસાદથી તબાહી સર્જાઇ છે. તાજા અપડેટ પ્રમાણે, ડાંગ જિલ્લાના ઉપરવાસમાં ભારે વરસાદથી નદીઓમાં પૂર આવ્યું છે. વઘઈ તાલુકાના ગામોમાં નદીના પાણી ફરી વળતા લોકોને હાલાકી પડી રહી છે. ઝાવડા, ડુંગરડા, ભેંસકાતરી, માછળી ખાતર ગામમાં અત્યારે વરસાદી પાણી ભરાયા છે. અનેક ઠેકાણે નાળાઓ પરથી પાણી ફરી વળતા વાહન વ્યવહારને અસર પહોંચી છે. જીવના જોખમો ગ્રામજનો રસ્તો પાર કરવા મજબૂર બન્યા છે. ડાંગ જિલ્લાના ઉપરવાસમાં વરસાદથી નદીઓના જળસ્તરમાં વધારો થયો છે, જેમાં પૂર્ણા, ગીરા, ખાપરી, અંબિકા નદીના જળસ્તર સતત વધી રહ્યું છે, છેલ્લા 24 કલાકમાં સુબીરમાં સૌથી વધુ સાડા ત્રણ ઈંચ વરસાદ ખાબક્યો છે, આ ઉપરાંત સાપુતારામાં પોણા ત્રણ તો આહવામાં દોઢ ઈંચ વરસાદ અને ડાંગના વઘઈમાં છેલ્લા 24 કલાકમાં સવા ઈંચ વરસાદ વરસ્યો છે.
ડાંગ જિલ્લામાં બે દિવસથી અવિરત વરસાદ છે. ડાંગ જિલ્લાની ઓળખ સમાન ગીરાધોધ પોતાના અસલ મિજાજમાં છે. પ્રવાસીઓને ગીરાધોધ પાસે જવાની મનાઈ ફરમાવતો હુકમ જાહેર કરવામાં આવ્યો છે. તથા જિલ્લાની અંબિકા, પૂર્ણાં, ગીરા અને ખાપરી નદીઓમાં ઘોડાપુર આવ્યું છે. તેમજ અનેક કોઝવે ઉપર પાણી ફરી વળતા વાહન વ્યવહાર ખોરવાયો છે. જિલ્લામાં કોઝવે ઉપર પાણી ફરી વળતા 20 થી વધુ ગામો સંપર્ક વિહોણા થયા છે. તથા સાપુતારા વઘઇ મુખ્ય માર્ગ ઉપર ઠેર ઠેર ભેખળો ધસી પડવાના બનાવો પણ બન્યા છે.
વાતાવરણમાં પલટા વચ્ચે સુરતના વાતાવરણમાં પલટો આવ્યો છે. સવારથી વાદળછાયું વાતાવરણ છવાયું છે. એક તરફ, સુરત સહિત દક્ષિણ ગુજરાતમાં છૂટાછવાયા સ્થળોએ ગાજવીજ સાથે હળવાથી મધ્યમ વરસાદની આગાહી છે. તો સુરત, નવસારી, ડાંગ, વલસાડ, દમણ, દાદરા નગર હવેલી, નર્મદા, ભરૂચ જેવા સ્થળોએ વરસાદની આગાહી પણ છે.