Gujarat Rain Forecast: છેલ્લા કેટલાક દિવસોથી વરસાદે વિરામ લેતા રાજ્યમાં ગરમી અને બફારાએ લોકોની મુશ્કેલી વધારી છે. પરંતુ ગરમીથી પરેશાન લોકો માટે હવે રાહતના સમાચાર છે. હવામાન વિભાગની લેટેસ્ટ આગાહી અનુસાર, ગુજરાતમાં ફરી એકવાર વરસાદી માહોલ જામવા જઈ રહ્યો છે. રાજ્ય પર એકસાથે 4 વરસાદી સિસ્ટમ સક્રિય થઈ છે, જેને પગલે આગામી દિવસોમાં ગાજવીજ અને પવન સાથે સાર્વત્રિક વરસાદની આગાહી કરવામાં આવી છે.
કઈ 4 સિસ્ટમ સક્રિય થઈ અને કેવું રહેશે હવામાન?
હાલમાં ગુજરાત પર લો પ્રેશર, મોનસૂન ટ્રફ, વેસ્ટર્ન ડિસ્ટર્બન્સ અને સાયક્લોનિક સર્ક્યુલેશન સક્રિય થયા છે. આ સિસ્ટમની અસરને કારણે આગામી 7 દિવસ સુધી રાજ્યભરમાં હળવાથી મધ્યમ વરસાદ પડવાની સંભાવના છે.
આજે અને આવતીકાલ: હાલ પૂરતી આજે અને આવતીકાલે રાજ્યમાં કોઈ ભારે વરસાદની શક્યતા નથી, પરંતુ કેટલાક છૂટાછવાયા વિસ્તારોમાં ઝરમર વરસાદ વરસી શકે છે.
ગાજવીજની સંભાવના: આગામી 4 દિવસ સુધી રાજ્યના અલગ-અલગ ભાગોમાં ગાજવીજ થવાની પણ પૂરેપૂરી શક્યતા છે.
11 ઓગસ્ટે આ 5 જિલ્લાઓમાં 'યલો એલર્ટ'
આગામી 11 ઓગસ્ટના રોજ વરસાદનું જોર વધશે. હવામાન વિભાગે ઉત્તર અને મધ્ય ગુજરાતના કુલ 5 જિલ્લાઓમાં ભારે વરસાદની શક્યતા વ્યક્ત કરી છે. સાવચેતીના ભાગરૂપે આ વિસ્તારોમાં 'યલો એલર્ટ' (Yellow Alert) પણ જાહેર કરવામાં આવ્યું છે. આ જિલ્લાઓમાં નીચેના વિસ્તારોનો સમાવેશ થાય છે:
ઉત્તર ગુજરાત: અરવલ્લી
મધ્ય ગુજરાત: મહીસાગર, પંચમહાલ, દાહોદ અને છોટા ઉદેપુર
વરસાદ અને પવનની ગતિને ધ્યાનમાં રાખીને તંત્ર દ્વારા માછીમારોને આગામી દિવસોમાં દરિયો ન ખેડવાની કડક સૂચના પણ આપવામાં આવી છે.
આ પણ વાંચોઃ આવતીકાલનું હવામાનઃ કાલે 15 રાજ્યોમાં ભારેથી અતિભારે વરસાદની આગાહી, સાવચેત રહેવા IMD નું એલર્ટ
વરસાદના આંકડા: રાજ્યમાં 9% વધુ વરસાદ, સૌરાષ્ટ્રમાં હજુ ઘટ
ચોમાસાની આ સિઝનમાં ગુજરાતમાં વરસાદના આંકડા પર નજર કરીએ તો સ્થિતિ એકંદરે ઘણી સારી રહી છે. હવામાન વિભાગના વૈજ્ઞાનિક પ્રદીપ શર્માના જણાવ્યા અનુસાર:
અત્યાર સુધીમાં રાજ્યમાં સરેરાશ 491.2 mm (એટલે કે આશરે 19.64 ઈંચ) વરસાદ ખાબકી ચૂક્યો છે.
સામાન્ય રીતે આ સમયગાળા દરમિયાન રાજ્યમાં 450.5 mm વરસાદ થવો જોઈએ.
આ આંકડાઓ સ્પષ્ટ કરે છે કે ગુજરાતમાં અત્યાર સુધીમાં સામાન્ય કરતા 9 ટકા વધુ વરસાદ નોંધાયો છે.
જોકે, એક તરફ સમગ્ર ગુજરાતમાં સારો વરસાદ નોંધાયો છે, તો બીજી તરફ કચ્છ અને સૌરાષ્ટ્રના વિસ્તારો હજુ પણ સારા વરસાદની રાહ જોઈ રહ્યા છે. આંકડા મુજબ, સૌરાષ્ટ્ર અને કચ્છ પંથકમાં સિઝનનો સરેરાશ વરસાદ હજુ પણ 13 ટકા જેટલો ઓછો નોંધાયો છે. આશા છે કે આ નવી વરસાદી સિસ્ટમ સૌરાષ્ટ્રની આ ઘટ પણ પૂરી કરી દેશે.
આ પણ વાંચોઃ અમદાવાદ સહિત આ જિલ્લાઓમાં 3 દિવસ વરસાદની આગાહી: જાણો હવામાન વિભાગનું બુલેટિન