Gujarat rain live updates: સુરતમાં ખાડીપુરનું સંકટ, ડીંડોલની ખાડી થઈ ઓવરફ્લો

Gujarat rain live updates: રાજ્યમાં મેઘરાજાએ ફરી એકવાર જોરદાર બેટિંગ કરતાં છેલ્લા 24 કલાક દરમિયાન ગુજરાતના 225 તાલુકામાં નોંધપાત્ર વરસાદ વરસ્યો છે.

બ્રેકગ્રાઉન્ડ

Gujarat rain live updates: રાજ્યમાં મેઘરાજાએ ફરી એકવાર જોરદાર બેટિંગ કરતાં છેલ્લા 24 કલાક દરમિયાન ગુજરાતના 225 તાલુકામાં નોંધપાત્ર વરસાદ વરસ્યો છે. દક્ષિણ ગુજરાત, સૌરાષ્ટ્ર અને મધ્ય ગુજરાતના અનેક વિસ્તારોમાં ભારે વરસાદના કારણે જનજીવન પર અસર જોવા મળી રહી છે. રાજ્યના 16 તાલુકામાં 4 ઈંચથી લઈને 8.58 ઈંચ સુધી વરસાદ નોંધાયો છે, જ્યારે 52 તાલુકામાં 1 થી 4 ઈંચ સુધી વરસાદ વરસ્યો છે.સૌથી વધુ વરસાદ વલસાડ જિલ્લાના વાપીમાં 8.58 ઈંચ નોંધાયો છે, જે રાજ્યમાં સૌથી વધુ વરસાદ રહ્યો છે. ત્યારબાદ સુરત જિલ્લાના કામરેજમાં 6.46 ઈંચ, વલસાડ જિલ્લાના પારડીમાં 6.34 ઈંચ અને ઉમરગામમાં 6.26 ઈંચ વરસાદ નોંધાયો છે. ભાવનગર જિલ્લાના ઘોઘામાં પણ 6.14 ઈંચ વરસાદ વરસતા નીચાણવાળા વિસ્તારોમાં પાણી ભરાવાની સ્થિતિ સર્જાઈ હતી.વલસાડ જિલ્લાના નાનાપોંઢામાં 5.91 ઈંચ, કપરાડામાં 5.79 ઈંચ, સુરત શહેરમાં 5.39 ઈંચ અને વલસાડમાં 5.28 ઈંચ વરસાદ નોંધાયો છે. ઉપરાંત ખેરગામમાં 4.88 ઈંચ, અમરેલી જિલ્લાના લાઠીમાં 4.61 ઈંચ, ભાવનગરમાં 4.49 ઈંચ અને સિહોરમાં 4.45 ઈંચ વરસાદ વરસ્યો છે. અમરેલી જિલ્લાના બાબરામાં 4.37 ઈંચ અને અમરેલી શહેરમાં 4.25 ઈંચ વરસાદ નોંધાયો છે. જ્યારે પાટણ જિલ્લાના રાધનપુરમાં 4.21 ઈંચ, વડોદરા જિલ્લાના શિનોરમાં 3.90 ઈંચ, મહિસાગરના ખાનપુરમાં 3.86 ઈંચ અને સાવરકુંડલામાં 3.82 ઈંચ વરસાદ વરસ્યો છે.તાપી જિલ્લાના ડોલવણમાં 3.79 ઈંચ, વલસાડ જિલ્લાના ધરમપુરમાં 3.62 ઈંચ, વડોદરા જિલ્લાના ડભોઈમાં 3.54 ઈંચ અને છોટાઉદેપુર જિલ્લાના બોડેલીમાં 3.43 ઈંચ વરસાદ નોંધાયો છે. ભાવનગર જિલ્લાના ગારિયાધારમાં 3.39 ઈંચ અને ઉમરાળામાં 3.15 ઈંચ વરસાદ વરસ્યો છે.નર્મદા જિલ્લાના સાગબારામાં 3.11 ઈંચ, નવસારી જિલ્લાના ગણદેવીમાં 2.95 ઈંચ અને  માળિયામાં 2.87 ઈંચ અને નવસારી શહેરમાં 2.88 ઈંચ વરસાદ નોંધાયો છે. ઉપરાંત સુરત જિલ્લાના માંગરોળમાં 2.76 ઈંચ, અમરેલી જિલ્લાના લીલીયામાં 2.68 ઈંચ  વરસાદ વરસ્યો છે. વડોદરા જિલ્લાના પાદરામાં 2.48 ઈંચ, ભરૂચ જિલ્લાના વાલિયામાં 2.48 ઈંચ, ડાંગ જિલ્લામાં 2.40 ઈંચ, નવસારી જિલ્લાના ચીખલીમાં 2.36 ઈંચ અને વડોદરા શહેરમાં 2.32 ઈંચ વરસાદ નોંધાયો છે. ડાંગ જિલ્લાના વઘઈ તેમજ ભાવનગર જિલ્લાના વલ્લભીપુર અને તાપી જિલ્લાના વાલોડમાં 2.20 ઈંચ વરસાદ નોંધાયો છે.હવામાનની સ્થિતિને જોતા આગામી દિવસોમાં પણ રાજ્યના અનેક વિસ્તારોમાં વરસાદી માહોલ યથાવત રહેવાની શક્યતા વ્યક્ત કરવામાં આવી રહી છે. ભારે વરસાદને પગલે નદી-નાળાઓમાં પાણીની આવક વધી રહી છે અને સ્થાનિક તંત્રને સતર્ક રહેવા સૂચના આપવામાં આવી છે.

07/07/2026 14:34:41

Rain Updates: ખાડીઓનું પાણી સુરત શહેરમાં પ્રવેશવાનું શરૂ

ખાડીઓનું પાણી સુરત શહેરમાં પ્રવેશવાનું શરૂ થયું છે. સુરતમાં પસાર થતી બે ખાડી ભયજનક સપાટીથી ઉપર વહી રહી છે. સુરતમાં ડીંડોલની ખાડી થઈ ઓવરફ્લો થઈ હતી. ઉધના ઝોનમાંથી પસાર થતી કાંકરાપાડીનું લેવલ 6.80 મીટર પર પહોંચ્યું હતું. ભેદવાડ ખાડી પણ ડેંજર લેવલથી ઉપર વહી રહી છે
લિંબાયત ઝોનમાંથી પસાર થતી મીઠી ખાડીનું લેવલ ડેંજર લેવલથી નજીક પહોંચ્યું છે. 

Continues below advertisement

07/07/2026 13:48:34

નવસારીમાં રેડ એલર્ટને લઈ પ્રશાસન એક્શનમાં

નવસારીમાં રેડ એલર્ટને લઈ પ્રશાસન એક્શનમાં છે. અધિકારીઓને હેડ ક્વાર્ટર ન છોડવા માટે સૂચના અપાઈ હતી. SDRFની એક ટીમને સ્ટેંડબાય રાખવામા આવી હતી. જિલ્લામાંથી પસાર થતી તમામ નદીઓની સ્થિતિ પર નજર રખાઈ રહી હતી. 

07/07/2026 13:43:38

સુરત જિલ્લામાં ખાબક્યો ભારે વરસાદ

સુરત જિલ્લામાં ભારે વરસાદ ખાબક્યો હતો. રાતથી જ સુરતના ગ્રામ્ય વિસ્તારોમાં વરસાદ વરસી રહ્યો છે. ઓલપાડના કીમ ગામે શિવજી નગરમાં પાણી ભરાયા હતા. સોસાયટીના રોડ પર પાણી ભરાતા લોકોને હાલાકીનો સામનો કરવો પડી રહ્યો છે. 

Continues below advertisement

07/07/2026 13:43:14

અમરેલીની ગાંગડિયા નદીમાં પૂર આવતા સ્ટેટ હાઈવે બંધ

અમરેલીની ગાંગડિયા નદીમાં પૂર આવતા સ્ટેટ હાઈવે બંધ થયો છે. ગારિયાધાર- અમરેલી સ્ટેટ હાઈવે પર નદીના પાણી ફરી વળ્યા હતા. ગાગડિયો નદીના પાણી હજારો વીઘા જમીનમાં ફરી વળ્યા 

07/07/2026 13:42:26

ધોધમાર વરસાદની સુરતના ટેક્સટાઈલ માર્કેટ પર અસર, આજે બંધ રાખવાની પડી ફરજ

સુરતના મોટાભાગના ટેક્સટાઈલ માર્કેટ આજે બંધ રાખવાની ફરજ પડી હતી. ધોધમાર વરસાદથી કર્મીઓ પહોંચી ન શકતા કાપડ માર્કેટ બંધ રાખવાની ફરજ પડી હતી. રઘુકુળ માર્કેટ,NTM માર્કેટ, બોમ્બે માર્કેટ આજે બંધ રહ્યા હતા. 

07/07/2026 12:29:12

Rain Updates: અમરેલીનું ખારા ગામ બેટમાં ફેરવાયું

સૌરાષ્ટ્રના અમરેલી જિલ્લાના લીલીયા પંથકમાં મેઘરાજાએ ભારે તારાજી સર્જી છે. વરસાદી પાણીના કારણે ખારા ગામ સંપૂર્ણપણે બેટમાં ફેરવાઈ ગયું છે. ગામના નીચાણવાળા રહેણાંક મકાનોમાં પૂરના પાણી ઘૂસી જતાં લોકોની ઘરવખરીને મોટું નુકસાન પહોંચ્યું છે

07/07/2026 12:28:42

Rain Updates: વલસાડના ઉમરગામમાં ફસાયેલા 15 લોકોનું રેસ્ક્યુ

વલસાડ જિલ્લા અને તાલુકામાં ભારે વરસાદના કારણે ઠેર-ઠેર જળબંબાકારની સ્થિતિ સર્જાઈ છે. વલસાડની સાંઈનાથ સોસાયટી અને અમરનાથ સોસાયટીમાં પાણી ભરાઈ જતાં જનજીવન અસ્તવ્યસ્ત થયું છે. બીજી તરફ,  સંજાણ બંદર પર પૂરના પાણીમાં ફસાયેલા 15 લોકોને ફાયર વિભાગની ટીમે ભારે જહેમત બાદ સુરક્ષિત રીતે રેસ્ક્યુ કરીને બચાવી લીધા છે.

07/07/2026 12:27:37

Rain Updates: નવસારીની પૂર્ણા નદીમાં પૂર

નવસારી જિલ્લામાં ભારે વરસાદના પગલે પૂર્ણા નદીમાં નવા નીરની ભારે આવક થઈ છે, જેના કારણે નદી બે કાંઠે થઈ ગઈ છે. પૂરના પાણી ફરી વળતાં લો લેવલ પુલ સંપૂર્ણપણે પાણીમાં ડૂબી ગયો છે. આ પુલ ડૂબવાના કારણે આસપાસના 10 જેટલા ગામોનો અવરજવરનો મુખ્ય રસ્તો બંધ થઈ ગયો છે. સલામતીના ભાગરૂપે પ્રશાસને આ માર્ગને તાત્કાલિક બંધ કરી દીધો છે. 

07/07/2026 12:27:18

Rain Updates: સુરતના પર્વત પાટિયામાં ઘૂંટણસમા પાણી

સુરત શહેરના અનેક વિસ્તારોમાં જળબંબાકારની સ્થિતિ છે. શહેરના પર્વત પાટિયા વિસ્તારમાં ઘૂંટણસમા પાણી ભરાઈ ગયા છે. ખાસ કરીને શ્રી સરસ્વતી હિન્દી વિદ્યાલયની બહાર મુખ્ય રોડ પર ભારે પાણી ભરાઈ જતાં વાહનચાલકો અધવચ્ચે અટવાઈ પડ્યા છે.

07/07/2026 12:26:56

Rain Updates: સુરત-વડોદરા નેશનલ હાઈવે પર પાણી ફરી વળ્યા

સુરત શહેર અને ગ્રામ્ય વિસ્તારમાં સવારથી જ આકાશી આફત વરસી રહી છે, જેના લીધે સુરત-વડોદરા વચ્ચે નેશનલ હાઈવે પર પાણી ફરી વળ્યા છે. કામરેજ અને કીમની વચ્ચે હાઈવે પર તેમજ હાઈવેના સર્વિસ રોડ પર 1 કિલોમીટર સુધી ઘૂંટણસમા પાણી ભરાઈ જતાં વાહનચાલકો ભારે હાલાકી ભોગવી રહ્યા છે. ભારે વરસાદના કારણે તાપી નદી બે કાંઠે વહેતી થઈ છે અને વિયરકમ કોઝવેએ 6 મીટરની ભયજનક સપાટી પાર કરી લીધી છે. પરિસ્થિતિને જોતાં મનપાની ટીમો કાંઠા વિસ્તારમાં સ્ટેન્ડ બાય છે.

07/07/2026 12:26:36

Rain Updates: તાપી જિલ્લાના 5 આંતરિક રસ્તાઓ બંધ

બીજી તરફ તાપી જિલ્લામાં પણ આકાશી આફત યથાવત રહેતા ગ્રામીણ વિસ્તારના કુલ 5 મુખ્ય માર્ગો બંધ હાલતમાં થઈ ગયા છે. રસ્તાઓ પર પાણી ફરી વળવાના કારણે વ્યારા તાલુકાના 2, ડોલવણ તાલુકાના 2 અને સોનગઢ તાલુકાનો 1 માર્ગ વાહનવ્યવહાર માટે સદંતર બંધ થઈ જતાં અનેક ગામોનો સંપર્ક તૂટ્યો છે.

07/07/2026 12:26:21

Rain Updates: બારડોલીમાં અંડરપાસ બંધ

દક્ષિણ ગુજરાતમાં વરસી રહેલા અવિરત વરસાદના કારણે રસ્તાઓ પર પાણી ફરી વળતાં વાહનચાલકોની મુશ્કેલીમાં મોટો વધારો થયો છે. સુરતના બારડોલી અને તાપીમાં ભારે વરસાદને પગલે અનેક માર્ગો બંધ કરવાની ફરજ પડી છે.

07/07/2026 12:26:04

Rain Updates: નવસારીમાં ભારે વરસાદની આગાહીના પગલે તંત્ર એલર્ટ

નવસારીમાં ભારે વરસાદની આગાહીના પગલે તમામ શાળા, કોલેજમાં શિક્ષણકાર્ય બંધ રાખવા તંત્રનો નિર્ણય

07/07/2026 12:25:47

Rain Updates: અરવલ્લી જિલ્લાના વાતાવરણમાં અચાનક પલટો

અરવલ્લી જિલ્લાના વાતાવરણમાં અચાનક પલટો આવ્યો છે અને બાયડ તેમજ મોડાસા પંથકમાં ધોધમાર વરસાદ ખાબક્યો છે. બાયડ શહેર અને તેના ગ્રામ્ય વિસ્તારોમાં વરસેલા વરસાદના કારણે માર્ગો પર પાણી વહેતા થયા છે. બાયડમાં એક ઈંચ કરતા વધુ વરસાદ તૂટી પડ્યો છે.

07/07/2026 12:25:18

Rain Updates: જૂનાગઢમાં વરસેલા ભારે વરસાદ બાદ તારાજીના દ્રશ્યો

જૂનાગઢ જિલ્લામાં વરસેલા ભારે વરસાદના કારણે ચારેય તરફ તારાજીના દ્રશ્યો સર્જાયા છે. ભારે વરસાદને પગલે પિખોર ગામેથી પસાર થતી નોળી નદીમાં પૂર આવતાં ગામનો મુખ્ય પુલ સંપૂર્ણપણે ધોવાઈ ગયો છે. પુલ તૂટી પડવાના કારણે નદી વચ્ચે 15ફૂટ ઊંડો મોટો ખાડો પડી ગયો છે, જેને લીધે પિખોર ગામના ખેડૂતો ભારે મુશ્કેલીમાં મુકાયા છે. પુલ ધોવાઈ જતાં ખેડૂતો માટે પોતાના ખેતરે જવું પણ અશક્ય બન્યું છે. આ વિકટ પરિસ્થિતિ વચ્ચે ખેડૂતો જીવના જોખમે માનવ સાંકળ રચીને નદી પાર કરી અવર-જવર કરવા મજબૂર બન્યા છે.

07/07/2026 12:24:55

Rain Updates: નવસારીમાં ધોધમાર વરસાદથી જનજીવન પ્રભાવિત

નવસારી શહેરમાં વહેલી સવારથી શરૂ થયેલા ધોધમાર વરસાદના કારણે જનજીવન ભારે પ્રભાવિત થયું છે. મુશળધાર વરસાદને પગલે મહાનગરપાલિકા (મનપા)ની કચેરીની બાજુમાં જ આવેલા શાકભાજી માર્કેટમાં પાણી ભરાઈ ગયા છે. વરસાદી પાણીના નિકાલની કોઈ યોગ્ય વ્યવસ્થા ન હોવાના કારણે સ્થાનિક વેપારીઓ અને ગ્રાહકોને ભારે હાલાકીનો સામનો કરવો પડી રહ્યો છે.

07/07/2026 11:05:15

Rain Updates: મુંબઈમાં પણ શૈક્ષણિક સંસ્થાઓમાં રજા

મુંબઈમાં આજે ભારે વરસાદનું એલર્ટ હોવાના કારણે વહીવટી તંત્ર દ્વારા આજે પણ તમામ સ્કૂલો અને કોલેજોમાં રજા જાહેર કરી દેવામાં આવી છે. તંત્ર દ્વારા પરિસ્થિતિ પર સતત નજર રાખવામાં આવી રહી છે.

07/07/2026 11:04:49

Rain Updates: નાસિકમાં કચેરીઓ અને પ્રસિદ્ધ મંદિરો બંધ

નાસિકમાં અવિરત વરસી રહેલા વરસાદને કારણે આજે તમામ શૈક્ષણિક સંસ્થાઓ ઉપરાંત સરકારી અને ખાનગી કચેરીઓ પણ બંધ રહેશે. આ ઉપરાંત દર્શનાર્થીઓની સુરક્ષાને ધ્યાનમાં રાખીને આજે પ્રસિદ્ધ ત્ર્યંબકેશ્વર મંદિર અને સપ્તશ્રૃંગી મંદિર પણ બંધ રાખવાનો આદેશ આપવામાં આવ્યો છે.

07/07/2026 11:04:22

નાસિકમાં વાદળ ફાટવાની અને મુંબઈમાં ભારે વરસાદની ચેતવણી

હવામાન વિભાગ દ્વારા આજે નાસિક માટે રેડ એલર્ટ અને મુંબઈ માટે ઓરેન્જ એલર્ટ જાહેર કરવામાં આવ્યું છે. નાસિકમાં રાતથી જ ધોધમાર વરસાદ વરસી રહ્યો છે અને આજે ત્યાં વાદળ ફાટવાની ચેતવણી આપવામાં આવી છે. આ ગંભીર સ્થિતિને પગલે સાવચેતીના ભાગરૂપે મુંબઈ અને નાસિક બંને જગ્યાએ આજે પણ સ્કૂલો અને કોલેજો બંધ રાખવાનો નિર્ણય લેવાયો છે. આ સાથે જ કોઈપણ આપત્તિને પહોંચી વળવા માટે એનડીઆરએફ તૈનાત કરી દેવાઈ છે અને ભારતીય નૌ-સેનાને પણ હાઈ-અલર્ટ પર રાખવામાં આવી છે.

07/07/2026 11:00:54

Rain Updates: સુરત ગ્રામ્યમાં ધોધમાર વરસાદથી જળબંબાકાર

સુરત ગ્રામ્ય પંથકમાં ચારેય તરફ જળબંબાકારની સ્થિતિ સર્જાઈ છે. ખાસ કરીને કીમ, ઓલપાડ, બારડોલી અને માંગરોળ તાલુકામાં વરસેલા ધોધમાર વરસાદના કારણે જનજીવન સંપૂર્ણપણે ખોરવાઈ ગયું છે. મુશળધાર વરસાદને પગલે નેશનલ હાઈવેના સર્વિસ રોડ પર અંદાજે એક કિલોમીટર લાંબા અંતર સુધી 2 ફૂટ જેટલા પાણી ભરાઈ ગયા છે, જેના કારણે વાહનચાલકો ભારે મુશ્કેલીમાં મુકાયા છે. પરિસ્થિતિની ગંભીરતા અને વિદ્યાર્થીઓની સુરક્ષાને ધ્યાનમાં રાખીને વહીવટી તંત્ર દ્વારા આજે સુરતની તમામ શાળાઓમાં સાવચેતીના ભાગરૂપે રજા જાહેર કરી દેવામાં આવી છે.

 

07/07/2026 09:32:11

Rain Updates: વલસાડ અને વાપીમાં પણ ભારે વરસાદની આફત

ભારે વરસાદની આફત માત્ર સુરત પૂરતી સીમિત નથી, વલસાડ જિલ્લામાં પણ મેઘરાજા રૌદ્ર સ્વરૂપ ધારણ કરી રહ્યા છે. હવામાન વિભાગની ચેતવણીને પગલે વહીવટી તંત્રએ નિર્ણય લઈને વલસાડ અને વાપીની તમામ શાળાઓમાં આજે રજા જાહેર કરી દીધી છે. વલસાડ જિલ્લાના અન્ય તાલુકાઓ માટે સ્થાનિક પ્રશાસન અને શાળાના આચાર્યોને પરિસ્થિતિની સમીક્ષા કરીને યોગ્ય નિર્ણય લેવા સૂચના આપવામાં આવી છે.

સુરત અને વલસાડની જેમ જ  કેન્દ્રશાસિત પ્રદેશ દમણ અને દાદરાનગર હવેલીમાં પણ હવામાન વિભાગે 'રેડ એલર્ટ' આપ્યું છે. અહીં અત્યંત ભારે વરસાદ ખાબકવાની સંભાવનાને જોતા વહીવટી તંત્રએ મોટો નિર્ણય લીધો છે. પ્રદેશની તમામ આંગણવાડીઓ, પ્રાથમિક-માધ્યમિક શાળાઓ, કોલેજો સહિતની તમામ શૈક્ષણિક સંસ્થાઓ આજે સદંતર બંધ રાખવાનો આદેશ કરવામાં આવ્યો છે.

07/07/2026 09:31:33

સુરતમાં 5 ઇંચ વરસાદ બાદ તંત્ર એક્શનમાં

સુરત શહેરમાં ગઈકાલે સાંજે ખાબકેલા 5 ઇંચથી વધુ વરસાદના કારણે જનજીવન અસ્તવ્યસ્ત થઈ ગયું હતું. શહેરના અનેક નીચાણવાળા વિસ્તારોમાં ઘૂંટણસમા અને કેડસમા પાણી ભરાઈ ગયા હતા, જેના કારણે ઓફિસથી ઘરે પરત ફરતા કર્મચારીઓ અને સ્કૂલેથી છૂટેલા નિર્દોષ બાળકો કલાકો સુધી રસ્તા પર ફસાઈ રહ્યા હતા. આજે ફરી આવી ગંભીર સ્થિતિ ઊભી ન થાય અને બાળકો મુશ્કેલીમાં ન મુકાય તે માટે સુરત મહાનગરપાલિકા અને નગરપાલિકા વિસ્તારની તમામ શાળાઓમાં સાવચેતીના ભાગરૂપે રજા આપી દેવાઈ છે. જ્યારે સુરત ગ્રામ્ય વિસ્તારો માટે સ્થાનિક સ્થિતિ જોઈને નિર્ણય લેવા આચાર્યોને છૂટ અપાઈ છે.

07/07/2026 09:30:53

Rain Updates: સુરત, વલસાડ અને વાપીમાં સ્કૂલોમાં રજા જાહેર

દક્ષિણ ગુજરાતમાં આગામી 24 કલાક ભારેથી અતિભારે વરસાદની આગાહી વચ્ચે સુરત, વલસાડ અને દમણ-દાદરાનગર હવેલીમાં વહીવટી તંત્ર દ્વારા રેડ એલર્ટ જાહેર કરવામાં આવ્યું છે. મુશળધાર વરસાદને પગલે સર્જાયેલી પૂર જેવી સ્થિતિ અને વિદ્યાર્થીઓના સુરક્ષાને ધ્યાનમાં રાખીને સુરત શહેર, વલસાડ, વાપી તેમજ કેન્દ્રશાસિત પ્રદેશ દમણ અને દાદરાનગર હવેલીમાં આજે (મંગળવારે) તમામ શાળાઓ, કોલેજો અને આંગણવાડીઓમાં રજા જાહેર કરી દેવામાં આવી છે.