ગુજરાતમાં ફરી એકવાર વરસાદી માહોલ જામવાનો છે. મોનસૂન ટ્રફ અને વેસ્ટર્ન ડિસ્ટર્બન્સ સક્રિય થતાં આજથી રાજ્યમાં આગામી ચાર દિવસ સુધી વરસાદનો વધુ એક રાઉન્ડ શરૂ થવાની હવામાન વિભાગે આગાહી કરી છે. શરૂઆતમાં દક્ષિણ અને મધ્ય ગુજરાતમાં હળવાથી મધ્યમ વરસાદની શક્યતા છે, જ્યારે 8 અને 9 ઓગસ્ટે ઉત્તર ગુજરાતના કેટલાક જિલ્લાઓમાં ભારે વરસાદને લઈ યલો એલર્ટ જાહેર કરવામાં આવ્યું છે. દરિયાકાંઠાના વિસ્તારોમાં માછીમારોને દરિયો ન ખેડવા સૂચના પણ આપવામાં આવી છે.
આજે દક્ષિણ અને મધ્ય ગુજરાતમાં વરસાદની શક્યતા
હવામાન વિભાગના જણાવ્યા મુજબ આજે વડોદરા, છોટા ઉદેપુર, નર્મદા, ભરૂચ, સુરત, તાપી, નવસારી અને ડાંગ જિલ્લામાં હળવાથી મધ્યમ વરસાદ વરસી શકે છે. આ ઉપરાંત કેન્દ્રશાસિત પ્રદેશ દમણ અને દાદરા અને નગર હવેલીમાં પણ વરસાદની સંભાવના વ્યક્ત કરવામાં આવી છે.
કાલે 12 જિલ્લાઓમાં વરસાદની આગાહી
આવતીકાલે ઉત્તર ગુજરાત, મધ્ય ગુજરાત અને દક્ષિણ ગુજરાતના કુલ 12 જિલ્લાઓમાં હળવાથી મધ્યમ વરસાદની આગાહી કરવામાં આવી છે. વરસાદી સિસ્ટમ સક્રિય રહેવાના કારણે અનેક વિસ્તારોમાં વાદળછાયું વાતાવરણ અને છૂટાછવાયા વરસાદી ઝાપટાં પડી શકે છે.
8 અને 9 ઓગસ્ટે ભારે વરસાદ, યલો એલર્ટ જાહેર
હવામાન વિભાગે 8 અને 9 ઓગસ્ટ માટે ભારે વરસાદની ખાસ આગાહી કરી છે. 8 ઓગસ્ટે ઉત્તર ગુજરાતના સાબરકાંઠા અને અરવલ્લી જિલ્લામાં ભારે વરસાદની શક્યતા છે. જ્યારે 9 ઓગસ્ટે વાવ-થરાદ, બનાસકાંઠા, સાબરકાંઠા અને અરવલ્લી જિલ્લામાં ગાજવીજ સાથે ભારે વરસાદને ધ્યાનમાં રાખીને યલો એલર્ટ જાહેર કરવામાં આવ્યું છે.
માછીમારોને દરિયો ન ખેડવાની સૂચના
દરિયાઈ વિસ્તારોમાં પવનની ગતિ વધવાની આગાહી કરવામાં આવી છે. હવામાન વિભાગે માછીમારોને આગામી થોડા દિવસ સુધી દરિયો ન ખેડવાની સલાહ આપી છે. વહીવટી તંત્રને પણ જરૂરી સાવચેતી રાખવા સૂચના આપવામાં આવી છે.
બે દિવસ સુધી સમગ્ર ગુજરાતમાં વરસાદની શક્યતા
ઉત્તર અને મધ્ય ભારતમાં સર્જાયેલી સાયક્લોનિક સરક્યુલેશન સિસ્ટમ, મોન્સૂન ટ્રફ અને વેસ્ટર્ન ડિસ્ટર્બન્સની સંયુક્ત અસર હેઠળ ગુજરાત પર ભેજવાળા પવનો ત્રાટકશે. આ સિસ્ટમ્સના લીધે 8 ઓગસ્ટથી બે દિવસ સુધી સમગ્ર ગુજરાતમાં વીજળીના કડાકા-ભડાકા અને તીવ્ર પવન સાથે ભારેથી અતિભારે વરસાદ વરસવાની પૂરી શક્યતા છે.
આગામી બે દિવસ દરમિયાન ભારે વરસાદની આશંકાને પગલે રાજ્ય સરકાર અને આપત્તિ વ્યવસ્થાપન તંત્ર (NDRF/SDRF) એલર્ટ મોડ પર આવી ગયું છે. નીચાણવાળા વિસ્તારોમાં રહેતા લોકોને સાવચેત રહેવા અને સ્થાનિક પ્રશાસનની માર્ગદર્શિકાનું પાલન કરવા જણાવાયું છે.