Gujarat Rain Forecast: ગુજરાતમાં ફરી એકવાર વરસાદનું જોર વધી શકે છે, આગામી ચાર દિવસમાં ફરીથી વરસાદી માહોલ જામશે, હવામાન વિભાગ અનુસાર, 8મી ઓગસ્ટથી મોન્સૂન ટ્રફ અને વેસ્ટર્ન ડિસ્ટર્બન્સની અસર સર્જાશે અને ધોધમાર વરસાદ ખાબકશે. ખાસ કરીને 8 અને 9 ઓગસ્ટે ઉત્તર અને મધ્ય ગુજરાતના કેટલાક જિલ્લાઓમાં ભારે વરસાદની સંભાવનાને ધ્યાનમાં રાખીને યલો એલર્ટ જાહેર કરવામાં આવ્યું છે.
હવામાન વિભાગે ગુજરાતમાં આગામી 8 ઓગસ્ટથી વરસાદના નવા રાઉન્ડની સત્તાવાર આગાહી કરી છે. મોન્સૂન ટ્રફ અને વેસ્ટર્ન ડિસ્ટર્બન્સની સક્રિયતાને કારણે 8 અને 9 ઓગસ્ટે સમગ્ર રાજ્યમાં ગાજવીજ સાથે સાર્વત્રિક વરસાદ ખાબકશે. આ પરિસ્થિતિને ધ્યાનમાં રાખી તંત્રે 8 ઓગસ્ટે રાજ્યભરમાં 'યલો એલર્ટ' જાહેર કરીને માછીમારોને દરિયો ન ખેડવા કડક સૂચના આપી છે.
હવામાન વિભાગના જણાવ્યા અનુસાર, રાજ્યના વાતાવરણમાં ફરી એકવાર મોટો પલટો આવવા જઈ રહ્યો છે. ઉત્તર અને મધ્ય ભારતમાં સર્જાયેલી સાયક્લોનિક સરક્યુલેશન સિસ્ટમ, મોન્સૂન ટ્રફ અને વેસ્ટર્ન ડિસ્ટર્બન્સની સંયુક્ત અસર હેઠળ ગુજરાત પર ભેજવાળા પવનો ત્રાટકશે. આ સિસ્ટમ્સના લીધે 8 ઓગસ્ટથી બે દિવસ સુધી સમગ્ર ગુજરાતમાં વીજળીના કડાકા-ભડાકા અને તીવ્ર પવન સાથે ભારેથી અતિભારે વરસાદ વરસવાની પૂરી શક્યતા છે. સૌરાષ્ટ્ર, દક્ષિણ ગુજરાત અને ઉત્તર ગુજરાતના મોટાભાગના વિસ્તારોમાં મેઘ મહેર જોવા મળશે. વાવાઝોડા અને દરિયાઈ વિસ્તારમાં ઝડપી પવન ફૂંકાવવાની શક્યતા હોવાથી બંદરો પર સાવચેતીના સિગ્નલ લગાવી દેવાયા છે. સુરક્ષાના ભાગરૂપે દરિયામાં ઉંચા મોજા ઉછળવાની સંભાવનાને પગલે માછીમારોને આગામી આદેશ સુધી દરિયામાં ન જવાની સ્પષ્ટ ચેતવણી આપવામાં આવી છે.
Weather Forecast: દેશના 19 રાજ્યોમાં આજે ભારે વરસાદની આગાહી, IMDએ આપ્યું એલર્ટ
આગામી બે દિવસ દરમિયાન ભારે વરસાદની આશંકાને પગલે રાજ્ય સરકાર અને આપત્તિ વ્યવસ્થાપન તંત્ર (NDRF/SDRF) એલર્ટ મોડ પર આવી ગયું છે. નીચાણવાળા વિસ્તારોમાં રહેતા લોકોને સાવચેત રહેવા અને સ્થાનિક પ્રશાસનની માર્ગદર્શિકાનું પાલન કરવા જણાવાયું છે. આ વરસાદથી ખેતીના પાકને નવું જીવન મળશે, પરંતુ પૂર જેવી સ્થિતિ ન સર્જાય તે માટે મહાનગરપાલિકાઓ અને જિલ્લા પંચાયતોને તૈયાર રહેવા સૂચના આપવામાં આવી છે.