Gujarat weather forecast 2026: ગુજરાતના ખેડૂતો અને સામાન્ય જનતા માટે હવામાન વિભાગે આગામી 7 દિવસની વરસાદની સત્તાવાર આગાહી જાહેર કરી દીધી છે. આ આગાહી મુજબ, આવનારા બે થી ત્રણ દિવસ રાજ્યના કેટલાક વિસ્તારો, ખાસ કરીને દક્ષિણ ગુજરાત અને સૌરાષ્ટ્રના કાંઠા વિસ્તારો માટે ખૂબ જ ભારે પડી શકે છે. બીજી તરફ, ઉત્તર અને મધ્ય ગુજરાતમાં પણ વાવાઝોડા અને ગાજવીજ સાથે મેઘરાજાની ધમાકેદાર એન્ટ્રી થઈ ચૂકી છે. ચાલો જાણીએ તમારા જિલ્લામાં કેવો રહેશે વરસાદી માહોલ.
દક્ષિણ ગુજરાતમાં મેઘતાંડવની ચેતવણી
હવામાન વિભાગના જણાવ્યા અનુસાર, 5, 6 અને 7 જુલાઈના રોજ દક્ષિણ ગુજરાતના મોટાભાગના વિસ્તારોમાં આકાશી આફત વરસી શકે છે.
ડાંગ, નવસારી અને વલસાડ: આ ત્રણ જિલ્લાઓમાં ભારેથી અતિભારે વરસાદની આગાહી છે, એટલું જ નહીં કેટલાક વિસ્તારોમાં અત્યંત ભારે વરસાદ પડવાની પ્રબળ શક્યતા સાથે 'રેડ એલર્ટ' આપવામાં આવ્યું છે.
સુરત, તાપી, ભરૂચ અને નર્મદા: આ પંથકમાં પણ 7 જુલાઈ સુધી ભારેથી અતિભારે વરસાદ ખાબકી શકે છે. જોકે, 8 જુલાઈથી વરસાદનું જોર ઘટતાં લોકોને થોડી રાહત મળશે અને માત્ર મધ્યમ વરસાદ ચાલુ રહેશે.
સૌરાષ્ટ્રના દરિયાકાંઠે પણ સ્થિતિ ગંભીર
સૌરાષ્ટ્ર પંથકમાં પણ આગામી 48 કલાક ભારે પવન સાથે મસાલેદાર વરસાદ પડવાના એંધાણ છે.
ગીર સોમનાથ, અમરેલી અને ભાવનગર: 5 જુલાઈના રોજ અહીં અત્યંત ભારે વરસાદની શક્યતા છે, જેની અસર 6 અને 7 જુલાઈએ પણ જોવા મળશે અને ભારેથી અતિભારે વરસાદ ચાલુ રહેશે.
રાજકોટ અને જૂનાગઢ: આ વિસ્તારોમાં રવિવારે ભારેથી અતિભારે વરસાદ પડશે, જ્યારે સોમવારથી જોર ઘટતા માત્ર 'ભારે વરસાદ'ની જ શક્યતા છે.
જામનગર, દ્વારકા, મોરબી અને કચ્છ: અહીં શરૂઆતના બે દિવસ 40 થી 50 કિમી પ્રતિ કલાકની ઝડપે ભારે પવન ફૂંકાશે અને ગાજવીજ સાથે હળવોથી મધ્યમ વરસાદ પડી શકે છે.
આ પણ વાંચોઃ અમરેલીમાં મેઘતાંડવ: રાયડી ડેમના 8 દરવાજા ખુલ્યા, રાજુલામાં 6 કલાકમાં 5.39 ઇંચ વરસાદ
મધ્ય અને ઉત્તર ગુજરાતની સ્થિતિ
અમદાવાદ, ગાંધીનગર અને આણંદ: 5 અને 6 જુલાઈએ અહીં 40 થી 50 કિમીની ઝડપે પવન ફૂંકાશે અને મધ્યમ વરસાદ પડશે. ત્યારબાદ 7 અને 8 જુલાઈએ (મંગળવાર અને બુધવાર) મોટાભાગના વિસ્તારોમાં ગાજવીજ સાથે મધ્યમ વરસાદ પડવાની વકી છે.
ખેડા, પંચમહાલ અને મહીસાગર: આ પંથકમાં આગામી ત્રણ દિવસ (5 થી 7 જુલાઈ) છૂટાછવાયા સ્થળોએ ભારે વરસાદ પડી શકે છે.
ઉત્તર ગુજરાત (બનાસકાંઠા, પાટણ, મહેસાણા, સાબરકાંઠા): શરૂઆતના બે દિવસ પવન સાથે હળવા વરસાદની સંભાવના છે. જોકે, સાબરકાંઠામાં 6 અને 7 જુલાઈએ ભારે વરસાદ પડવાની આગાહી છે, જ્યારે અન્ય જિલ્લાઓમાં 7 અને 8 જુલાઈએ મધ્યમ વરસાદ રહેશે.
આ પણ વાંચોઃ અંબાલાલ પટેલની મોટી આગાહી: આ વિસ્તારમાં હજુ 2 દિવસ તૂટી પડશે ભારે વરસાદ, ખેડૂતોને આપી ખાસ સલાહ
સપ્તાહના અંતમાં મળશે રાહત
હવામાન વિભાગની 7 દિવસની આ આગાહી પરથી એ સ્પષ્ટ થાય છે કે 9 જુલાઈથી લઈને 11 જુલાઈ સુધી સમગ્ર ગુજરાતમાં વરસાદનું જોર નોંધપાત્ર રીતે ઘટી જશે. આ સમયગાળામાં રાજ્યના મોટાભાગના જિલ્લાઓમાં માત્ર અમુક જ સ્થળોએ ગાજવીજ સાથે હળવોથી મધ્યમ વરસાદ નોંધાશે, જેથી પૂર કે જળબંબાકાર જેવી સ્થિતિમાંથી લોકોને મોટી રાહત મળી શકશે.