gujarat weather nowcast: ગુજરાતમાં મેઘરાજા ફરી જમાવટ કરવાના છે. હવામાન વિભાગ (IMD) દ્વારા આજે સાંજે 4 થી 7 વાગ્યા સુધીના 3 કલાક માટે તાત્કાલિક 'નાઉકાસ્ટ' જાહેર કરવામાં આવ્યું છે. આ આગાહી મુજબ, સાંજના 7 વાગ્યા સુધી રાજ્યના 14 જેટલા જિલ્લાઓમાં 40 થી 60 કિલોમીટરની ઝડપે તોફાની પવન ફૂંકાવા સાથે હળવાથી મધ્યમ વરસાદની સંભાવના છે. ખાસ કરીને દક્ષિણ ગુજરાત અને આસપાસના વિસ્તારોમાં ગાજવીજ અને વીજળી પડવાની પૂરી શક્યતા હોવાથી લોકોને ઘરની બહાર નીકળતી વખતે સાવચેત રહેવા જણાવવામાં આવ્યું છે.
આ જિલ્લાઓમાં રહેશે તોફાની પવન અને મધ્યમ વરસાદ
હવામાન વિભાગની માહિતી મુજબ, દક્ષિણ ગુજરાતના ભાગોમાં વરસાદ અને પવનનું જોર વધુ જોવા મળશે. સાંજે 7 વાગ્યા સુધી છોટાઉદેપુર, નર્મદા, તાપી, ડાંગ, નવસારી, વલસાડ, સુરત તેમજ કેન્દ્રશાસિત પ્રદેશ દમણ અને દાદરા નગર હવેલીમાં ગાજવીજ સાથે મધ્યમ વરસાદ પડી શકે છે. આ વિસ્તારોમાં પવનની ગતિ કલાકના 41 થી 61 કિલોમીટર સુધી પહોંચવાની આશંકા છે. આ સાથે જ 30 થી 60 ટકા જેટલી વીજળી પડવાની પણ ચેતવણી આપવામાં આવી છે.
અહીં સામાન્ય છાંટા અને હળવા વરસાદની શક્યતા
બીજી તરફ, મધ્ય ગુજરાત અને સૌરાષ્ટ્રના અમુક વિસ્તારોમાં પણ વાતાવરણમાં પલટો જોવા મળશે. દાહોદ, પંચમહાલ, વડોદરા, ભરૂચ, મહીસાગર, ભાવનગર અને અમરેલીમાં હળવા વરસાદની આગાહી છે. અહીં પવનની ઝડપ 40 કિલોમીટર પ્રતિ કલાકથી ઓછી રહેશે અને વીજળી પડવાની શક્યતા 30 ટકા કરતા ઓછી છે.
આ પણ વાંચોઃ
આવતીકાલનું હવામાનઃ કાલે 19 રાજ્યોમાં વાવાઝોડા સાથે ભારે વરસાદની આશંકા, ખેડૂતો અને માછીમારો સાવધાન!
તંત્રની નાગરિકોને ખાસ અપીલ
હવામાન વિભાગે લોકોને ચેતવણી આપતા જણાવ્યું છે કે તોફાની પવન અને વરસાદને કારણે નીચાણવાળા વિસ્તારોમાં પાણી ભરાઈ શકે છે અને ટ્રાફિક જામની સમસ્યા સર્જાઈ શકે છે. આથી વાહનચાલકોએ ડ્રાઇવિંગ કરતી વખતે ખાસ ધ્યાન રાખવું. આ ઉપરાંત, પવનની ગતિ વધુ હોવાથી નબળાં મકાનો કે મોટા હોર્ડિંગ્સ અને વૃક્ષો નીચે ઊભા રહેવાનું ટાળવું જોઈએ. વરસાદની લાઈવ અપડેટ માટે નાગરિકોને IMD ની સત્તાવાર વેબસાઈટ જોતા રહેવાની સલાહ અપાઈ છે.
દક્ષિણ ગુજરાતમાં મેઘમહેર
રાજ્યમાં ચોમાસાની જામતી રંગત વચ્ચે આજે ગુજરાતના 9 તાલુકાઓમાં સાર્વત્રિક વરસાદ નોંધાયો છે. ખાસ કરીને દક્ષિણ ગુજરાતના સરહદી વિસ્તારોમાં મેઘરાજા મન મૂકીને વરસ્યા છે. હવામાન વિભાગના સત્તાવાર ડેટા અનુસાર, આજે સૌથી વધુ વરસાદ નર્મદા જિલ્લાના સાગબારામાં 3.27 ઈંચ ખાબક્યો હતો, જેના કારણે નીચાણવાળા વિસ્તારો અને નદી-નાળાઓમાં નવા પાણીની આવક થઈ છે. આ ઉપરાંત ડાંગ જિલ્લામાં પણ સાર્વત્રિક વરસાદી માહોલ જોવા મળ્યો છે. ડાંગના સુબીરમાં 2.13 ઈંચ, જ્યારે ડાંગ તાલુકામાં 1.81 ઈંચ અને વઘઈમાં 1 ઈંચ વરસાદ નોંધાતા સમગ્ર પંથકમાં ઠંડક પ્રસરી ગઈ છે અને ધરતીપુત્રોમાં આનંદની લાગણી જોવા મળી રહી છે.
આ પણ વાંચોઃ
અમરેલી-ગીર સોમનાથમાં ધોધમાર વરસાદ: ગુજરાતમાં આ તારીખે થશે ચોમાસાની એન્ટ્રી, આજે યલો એલર્ટ