રાજ્યમાં ગરમીના પ્રભુત્વમાં દિવસેને દિવસે વધારો થઈ રહ્યો છે અને અમદાવાદ શહેરમાં સિઝનમાં પ્રથમવાર મહત્તમ તાપમાનનો પારો ૪૩ ડિગ્રીને પાર ગયો છે. રવિવારે ૪૩.૧ ડિગ્રી સાથે અમદાવાદ રાજ્યનું 'હોટેસ્ટ સિટી' રહ્યું છે. અમદાવાદ સહિત ૮ શહેરમાં મહત્તમ તાપમાનનો પારો ૪૧ ડિગ્રીને પાર થયો છે.
અમદાવાદમાં મે મહિનામાં એકવાર મહત્તમ તાપમાન ૪૩ ડિગ્રીએ પાર જવાનો ક્રમ આ વર્ષે પણ યથાવત્ રહ્યો છે. હવામાન વિભાગના મતે આગામી ૩ દિવસ દરમિયાન અમદાવાદમાં ૪૩ ડિગ્રીની આસપાસ મહત્તમ તાપમાનનો પારો રહી શકે છે. રાજ્યના અન્ય જિલ્લાઓની વાત કરીએ તો 41 ડિગ્રીથી વધુ સરેરાશ મહત્તમ તાપમાન નોંધાયું તેમાં સુરેન્દ્રનગર ૪૨.૩, અમરેલી ૪૨.૨, વલ્લભ વિદ્યાનગર ૪૨, ગાંધીનગર અને રાજકોટ ૪૧.૮, વડોદરા ૪૧.૪, ડીસા ૪૧.૨નો સમાવેશ થાય છે.
નોંધનીય છે કે, હવામાન વિભાગની આગાહી અનુસાર સોમવારે વલસાડ, તાપી અને ડાંગ જિલ્લાના છૂટાછવાયા વિસ્તારમાં માવઠું પડવાની વકી છે. મંગળવાર બાદ આકાશ સ્વચ્છ થઇ જશે. મધ્યપ્રદેશ અને અરબ સાગરમાં સર્જાયેલા સાઇક્લોનિક સર્ક્યુલેશનને પગલે વાતાવરણમાં પલટો જોવા મળ્યો છે. આ સાઇક્લોનિક સર્ક્યુલેશનની અસર સૌરાષ્ટ્રની સાથે દક્ષિણ ગુજરાતના તાપી અને ડાંગ જિલ્લામાં પણ જોવા મળી હતી. રવિવારે તાપી જિલ્લાના કુકરમુંડા અને નિઝરમાં બપોર બાદ ગાજવીજ સાથે કમોસમી વરસાદ પડયો હતો.
રવિવારે, સતત તાપમાન વધવાના કારણે હિટ સ્ટ્રોકના કિસ્સા પણ વધ્યા હતા. હવામાન વિભાગે જણાવ્યું છે કે, હજુ આગામી દિવસમાં ગરમીનો પારો ઉંચો જશે. ત્યારે કાળઝાળ ગરમીમાં વધુ પ્રમાણમાં પ્રવાહી પીવાની અને બપોરના સમયે કામ વગર બહાર ન નિકળવાની સલાહ તબીબો આપી રહ્યાં છે.
હાલ મહામારીના સમયમાં whoથી માંડીને હેલ્થ એક્સપર્ટ માને છે કે, જેમનો ઇમ્યુનિટી પાવર વધુ હશે, તેવા લોકો આ મહામારી સામે લડી શકશે. પાઇનેપલ ગરમીની સિઝનમાં માઇન્ડને ઠંડુ અને શરીરને ફ્રેશ રાખે છે. દરરોજ આ ફળનું સેવન કરવાથી સિઝનલ બીમારી કોસો દૂર રહે છે. આ વિટામીન સીથી ભરપૂર છે. જે પોષણ આપવાની સાથે વાયરસના સંક્રમણને આપનાથી દૂર રાખે છે.
ગરમીની સિઝનનું ખાસ ફળ કેરી છે. કેરીમાં વિટામીન-સીની સાથે બીજા પણ અન્ય એવા પોષક તત્વો છે. જે શરીરને પોષકતત્વો પૂરા પાડીને રોગપ્રતિકારકક્ષમતામાં વઘારો કરે છે. તો ગરમીની સિઝનમાં કેરીનું અવશ્ય સેવન કરો.