ગાંધીનગર: સૌરાષ્ટ્ર, મધ્ય અને દક્ષિણ ગુજરાતમાં ભારે વરસાદની આગાહી હવામાન વિભાગ દ્વારા કરવામાં આવી છે. આજે રાજ્યના મોટાભાગના વિસ્તારમાં વરસાદ વરસશે. જો કે, આવતીકાલથી વરસાદનું જોર ઘટશે. આજે છોટાઉદેપુર, પંચમહાલ, દાહોદ, વડોદરા, અમદાવાદ, ખેડા, આણંદ, સુરત, નવસારી, વલસાડ, તાપી, ડાંગ, ભરૂચ, અમરેલી, ભાવનગર અને ગીર સોમનાથ જિલ્લામાં ભારે વરસાદ વરસશે. રાજ્યમાં અત્યાર સુધી સીઝનનો 76 ટકા વરસાદ વરસી ચૂક્યો છે.
હવામાન વિભાગની આગાહી પ્રમાણે 24 કલાકમાં મોટાભાગના વિસ્તારમાં વરસાદ વરસશે. 24 કલાક બાદ વરસાદનું જોર ઘટશે. સૌરાષ્ટ્રમાં 24 કલાકમાં મોટાભાગના વિસ્તારમાં વરસાદ પડશે. ઉત્તર ગુજરાત, દક્ષિણ ગુજરાતમાં ભારે વરસાદ પડવાની શક્યતા છે. આજે છોટા ઉદેપુરમાં ભારે વરસાદની આગાહી કરાઈ છે.
પંચમહાલ,દાહોદ, સુરત, ભરૂચ, નવસારી, વલસાડ, દાદરા નગર હવેલીમાં ભારે વરસાદની આગાહી કરવામાં આવી છે. સોમનાથ,અમરેલી,ભાવનગરમાં ભારે વરસાદની આગાહી કરવામાં આવી છે. અમદાવાદ અને આસપાસના વિસ્તારમાં સામાન્ય વરસાદ ની આગાહી કરવામાં આવી છે.
શનિવારે વલસાડ, દમણ, દાદરા નગર હવેલીમાં ભારેથી અતિભારે વરસાદની આગાહી છે. અરવલ્લી, નવસારી, તાપી, અમરેલી, જૂનાગઢ, ભાવનગર, ગીર સોમનાથમાં ભારે વરસાદ વરસી શકે છે. રવિવારે નવસારી, દમણ, દાદરા નગર હવેલી, વલસાડમાં ભારેથી અતિભારે વરસાદ વરસી શકે છે. હવામાન વિભાગ અનુસાર, સુરત, તાપી, ડાંગમાં ભારે વરસાદ પડી શકે છે. હવામાન વિભાગના જણાવ્યા અનુસાર વરસાદનું જોર ઘટશે.
હવામાન વિભાગની આગાહી અનુસાર, દક્ષિણ ગુજરાતમાં ડાંગ અને સુરતમાં ભારે વરસાદની સંભાવના વ્યક્ત કરવામાં આવી છે. ગુરુવારે દક્ષિણ ગુજરાતના જિલ્લાઓ ભારેથી અતિભારે વરસાદ વરસ્યો છે.
હવામાન વિભાગની આગાહી વચ્ચે નવસારીમાં જળબંબાકાર
નવસારી શહેર અને જિલ્લામાં મેઘરાજા મન મૂકીને વરસ્યા હતા. 24 કલાકમાં નવસારી શહેરમાં 11 ઈંચ વરસાદ વરસ્યો છે. જ્યારે જલાલપોરમાં સાત ઈંચ વરસાદ ખાબક્યો હતો. વાંસદામાં પાંચ ઈંચ વરસાદ વરસ્યો છે. ચીખલી અને ખેરગામમાં ત્રણ-ત્રણ ઈંચ વરસાદ વરસ્યો છે. ગઈકાલે મોડી રાત્રે વરસેલા વરસાદના કારણે નવસારી શહેર પાણી પાણી થયું હતું. રસ્તાઓ પાણીમાં ગરકાવ થયા હતા. ધોધમાર વરસાદના કારણે અનેક ઘરોમાં પાણી ઘૂસ્યા હતા. નવસારી શહેરનો શાંતાદેવી રોડ જળમગ્ન થઈ ગયો હતો. મુખ્યમાર્ગો પર તો પાણી ભરાયા જ પરંતુ દુકાનોમાં પણ પાણી ઘૂસ્યા હતા.