Gujarat Rain: ગુજરાતમાં મેઘરાજાની સવારી જોરદાર ચાલી રહી છે. આજે અરવલ્લી, સાબરકાંઠા, દાહોદ અને અમદાવાદ જિલ્લાના અનેક વિસ્તારોમાં ધોધમાર વરસાદ વરસ્યો હતો. અરવલ્લીના મોડાસા, મેઘરજ અને માલપુર તાલુકામાં ભારે વરસાદથી રસ્તાઓ પર ઘૂંટણસમા પાણી ભરાઈ ગયા હતા, જેના કારણે વાહનચાલકોને ભારે હાલાકીનો સામનો કરવો પડ્યો હતો. સાબરકાંઠાના હિંમતનગર અને વડાલી પંથકમાં પણ ધોધમાર વરસાદ નોંધાયો, જ્યારે દાહોદ શહેર અને જિલ્લાના ગ્રામીણ વિસ્તારોમાં પણ સાર્વત્રિક વરસાદથી વાતાવરણમાં ઠંડક પ્રસરી હતી. અમદાવાદમાં પણ સાયન્સ સિટી, ગોતા, સોલા, એસજી હાઈવે સહિતના વિસ્તારોમાં વરસાદી ઝાપટાંથી લઈને ભારે વરસાદ નોંધાયો હતો.
અરવલ્લી જિલ્લામાં સાર્વત્રિક ધોધમાર વરસાદ
અરવલ્લી જિલ્લામાં આજે સાર્વત્રિક ધોધમાર વરસાદ વરસ્યો હતો. ખાસ કરીને મોડાસા, મેઘરજ અને માલપુર તાલુકામાં મેઘરાજાની જોરદાર બેટિંગ જોવા મળી હતી. માલપુરના મોરડુંગરી, સોમપુર અને જેશીંગપુર જેવા ગ્રામીણ વિસ્તારોમાં પણ ધોધમાર વરસાદ નોંધાયો હતો.
મોડાસા શહેરમાં જળબંબાકાર: મોડાસા શહેરમાં ભારે વરસાદને કારણે અનેક વિસ્તારોમાં વરસાદી પાણી ભરાઈ ગયા હતા. દ્વારકાપુરી સોસાયટી, લવાસા અને વેલકમ સોસાયટી પાસેના રસ્તાઓ પર ઘૂંટણસમા પાણી ભરાઈ જતા વાહનચાલકોને ભારે મુશ્કેલીનો સામનો કરવો પડ્યો હતો. મોડાસા ચાર રસ્તાથી મેઘરજ રોડ પર પણ પાણી ભરાઈ જતા વાહનવ્યવહાર ધીમો પડ્યો હતો.
સાબરકાંઠા જિલ્લામાં ધોધમાર વરસાદ
સાબરકાંઠા જિલ્લામાં પણ મેઘરાજા મન મૂકીને વરસ્યા હતા. હિંમતનગર અને વડાલી પંથકમાં ધોધમાર વરસાદ નોંધાયો હતો. હિંમતનગરના હડિયોલ, ગઢોડા, બેરણા અને કાંકણોલ સહિતના ગામડાઓમાં પણ સારો વરસાદ વરસ્યો હતો, જેનાથી ખેડૂતોમાં ખુશીનો માહોલ જોવા મળ્યો હતો.
દાહોદ શહેર અને જિલ્લામાં ધોધમાર વરસાદ
દાહોદ શહેર અને જિલ્લામાં પણ ધોધમાર વરસાદ વરસ્યો હતો. દાહોદના રળિયાતી, પુંસરી, જાલત, રામપુરા, છાપરી, ગલાલીયાવાડ અને રાબડાલ સહિતના ગામડાઓમાં વરસાદથી પાણી-પાણી થઈ ગયું હતું. આ ઉપરાંત લીમખેડા, દુધિયા, પાલ્લી, ઘુમણી અને સિંગાપુર જેવા વિસ્તારોમાં પણ સારો વરસાદ નોંધાયો હતો, જેનાથી વાતાવરણમાં ઠંડક પ્રસરી હતી.
અમદાવાદના કેટલાક વિસ્તારમાં વરસાદ
રાજ્યના પાટનગર અમદાવાદમાં પણ આજે કેટલાક વિસ્તારોમાં વરસાદી ઝાપટાંથી લઈને ભારે વરસાદ નોંધાયો હતો. શહેરના સાયન્સ સિટી, ગોતા, સોલા, એસજી હાઈવે, કેશવબાગ, આંબાવાડી, IIM વિસ્તાર, રાણીપ, વંદે માતરમ, અખબારનગર, વાડજ, શ્યામલ અને સેટેલાઇટ જેવા વિસ્તારોમાં વરસાદ પડ્યો હતો, જેના કારણે ગરમી અને ઉકળાટથી લોકોને રાહત મળી હતી. જોકે, કેટલાક નીચાણવાળા વિસ્તારોમાં પાણી પણ ભરાયા હતા.