અમદાવાદ: રાજ્યમાં ફરી એક વખત વરસાદી માહોલ જામ્યો છે. આજે વહેલી સવારથી જ સમગ્ર ગુજરાતમાં વરસાદ વરસી રહ્યો છે. અનેક જિલ્લાઓમાં આજે ભારે વરસાદ વરસી રહ્યો છે. હવામાન વિભાગ દ્વારા આગામી ત્રણ કલાક સુધી ભારે વરસાદને લઈ આગાહી કરવામાં આવી છે. રાજ્યના કેટલાક જિલ્લાઓ માટે આગામી ત્રણ કલાક ભારે રહેશે. હવામાન વિભાગ દ્વારા આગામી ત્રણ કલાક વરસાદને લઈ નાવ કાસ્ટ જાહેર કરવામાં આવ્યું છે. જેમાં કેટલાક જિલ્લાઓમાં ભારે વરસાદને લઈ રેડ એલર્ટ જાહેર કરવામાં આવ્યું છે.
આ જિલ્લાઓમાં ભૂક્કા બોલાવશે વરસાદ
હવામાન વિભાગની આગાહી મુજબ 41થી 61 કિલોમીટર પ્રતિ કલાકની ઝડપે પવન ફૂંકાશે. આ સાથે જ દમણ, દાદરા નગર હવેલી, વલસાડ, નવસારી, સુરત, ભરુચ, ભાવનગર, અમરેલી, ગીર સોમનાથ, જૂનાગઢ, પોરબંદર, જામનગર, દેવભૂમિ દ્વારકા, રાજકોટ અને દીવમાં ભારેથી અતિભારે વરસાદ વરસી શકે છે.
આ સિવાય અન્ય જિલ્લાઓમાં સામાન્યથી લઈ હળવા વરસાદની આગાહી કરવામાં આવી છે. જેમાં મોરબી, સુરેન્દ્રનગર, બોટાદ, અમદાવાદ, કચ્છ, બનાસકાંઠા, પાટણ, મહેસાણા, સાબરકાંઠા, ગાંધીનગર, અરવલ્લી, મહિસાગર, દાહોદ, પંચમહાલ, ખેડા, આણંદ, વડોદરા, છોટા ઉદેપુર, નર્મદા, તાપી અને ડાંગમાં પણ વરસાદ વરસી શકે છે.
10 વાગ્યા સુધી રાજ્યના કુલ 67 તાલુકાઓમાં ભારે વરસાદ
રાજ્યમાં સવારમાં 10 વાગ્યા સુધી રાજ્યના કુલ 67 તાલુકાઓમાં ભારે વરસાદ ખાબક્યો છે. જેમાં સૌથી વધુ તલાલાથી લઇને ભાવનગર સુધીના વિસ્તારોમાં ત્રણ ઇંચથી વધુ ખાબક્યો છે. રાજ્યમાં જો છેલ્લા 24 કલાકના આંકડા પર નજર કરીએ તો, ગુજરાતના 168 તાલુકાઓમાં મેઘમહેર જોવા મળી છે. દેવભૂમિ દ્વારકામાં સતત ચોથા દિવસે પણ ધોધમાર વરસાદ વરસ્યો છે, જેના કારણે જળબંબાકાર જેવી સ્થિતિ સર્જાઈ છે.
રાજ્યમાં અત્યાર સુધીમાં સરેરાશ 68.91 ટકા વરસાદ
રાજ્યમાં અત્યાર સુધીમાં સરેરાશ 68.91 ટકા વરસાદ વરસ્યો છે. જેમાં સૌથી વધુ 72 ટકા વરસાદ દક્ષિણ ગુજરાતમાં જ્યારે ઉત્તર ગુજરાતમાં 71 ટકા, કચ્છમાં 70 ટકા, પૂર્વ મધ્યમાં 69 ટકા વરસાદ નોંધાયો છે. સૌરાષ્ટ્રમાં 63 ટકાથી વધુ સરેરાશ વરસાદ નોંધાયો છે. રાજ્યમાં ફરી એક વખત વરસાદી માહોલ જામ્યો છે. સરદાર સરોવર સહિત રાજ્યના કુલ 207 ડેમમાંથી 76 ડેમ હાઈએલર્ટ એટલે કે 70 થી 100 ટકા વચ્ચે ભરાયા છે. જ્યારે 26 ડેમ એલર્ટ પર તેમજ 22 ડેમ વોર્નિંગ પર મૂકવામાં આવ્યા છે. રાજ્યની જીવાદોરી સમાન સરદાર સરોવર ડેમમાં 76 ટકાથી વધુ જળસંગ્રહ છે.