ભારે ઉકળાટ બાદ દેવભૂમિ દ્વારકા જિલ્લામાં ધોધમાર વરસાદ ખાબક્યો હતો. જિલ્લાના ઘણા વિસ્તારોમાં તો આભ ભાટ્યું હોય તેવી સ્થિતિ જોવા મળી હતી. 24 કલાક (શનિવાર રાતે 10થી રવિવાર સાંજે 8 વાગે સુધી)માં દેવભૂમિ દ્વારકા જિલ્લાના કલ્યાણપુરમાં 7.9 ઈંચ વરસાદ ખાબક્યો હતો. જેને લઈને જ્યાં જુઓ ત્યાં પાણી જ પાણી જોવા મળી રહ્યો હતો.
ભાણવડમાં 3.85 ઈંચ, જામ-ખંભાણિયામાં 3.6 ઈંચ અને દ્વારકામાં 3.1 ઈંચ વરસાદ ખાબક્યો હતો. ભારે વરસાદને પગલે ખેડૂતોમાં ખુશીની લહેર જોવા મળી હતી.
દેવભૂમિ દ્વારકા જિલ્લાના કલ્યાણપુરમાં ભારે વરસાદ ખાબક્યો હતો જેને લઈને જ્યાં જુઓ ત્યાં પાણી જ પાણી જોવા મળતું હતું. ભારે વરસાદને કારણે રસ્તા અને ખેતરોમાં પાણી ફરી વળ્યાં હતાં. કલ્યાણપુર તાલુકા સહિત જિલ્લામાં વરસાદી માહોલ જામ્યો છે.
દેવભૂમિ જિલ્લાના કલ્યાણપુર તાલુકાના મેઘપર ટીટોડી ગામે મુશળધાર વરસાદ ખાબક્યો હતો. ભારે વરસાદને કારણે મેઘપર ટીટોડીની નદીમાં પુર આતાં બે કાંઠે વહેતી થઈ હતી. નદી પર બનેલા કોઝવે પર ઘૂંટણ સમા પાણી ભરાઈ ગયા હતાં.
મેઘપર ટીટોડીથી સ્ટેટ હાઈવે પરના પુલ પરથી પાણીનો ધમસમતો પ્રવાહ વહેતો હતો. કોઝવે પર પાણી ભરાતા રાહદારીઓ વાહન ચાલકોને મુશ્કેલી પડી રહી હતી. ભારે વરસાદને પગલે ખેડૂતોમાં ખુશી જોવા મળી હતી.