નવસારીમાં વાહન ચેકિંગ દરમિયાન ગણદેવી પોલીસે એક કારને અટકાવી તપાસ કરી હતી. તે દરમિયાન તેમાંથી નાસિકથી સુરત તરફ જઈ રહેલા નાસિકના કીર્તિકુમાર અંબાલાલ આંગડીયા પેઢીના બે કર્મચારીઓ પાસેથી લાખો રૂપિયા ભરેલી બે બેગ મળી આવી હતી. કારમાં આંગડીયા પેઢીના કર્મચારી અને મહેસાણાના કંથારવી ગામે રહેતા વિપુલ પટેલ અને જયેશ પટેલની પૂછપરછ કરવામાં આવી હતી.
આ દરમિયાન તેમની પાસેના લાખો રૂપિયા અંગે પુરતા પુરાવા ન મળતાં બંને કર્મચારીઓ કાર ચાલક અને નાસિક ખાતે રહેતા મિલિન્દ યશવંત સહિત કુલ ત્રણની ધરપકડ કરવામાં આવી હતી. પોલીસને આટલા બધાં રૂપિયા ગણતાં-ગણતાં ભારે જહેમત ઉઠાવી હોય તેવું લાગી રહ્યું છે.
હાઈવે પર પોલીસ ગાડીઓ ચેકિંગ કરી રહી હતી તે દરમિયાન થોડો ટ્રાફિક પણ જોવા મળ્યો હતો. પોલીસે આ ગાડીને રોકીને ચેક કરતાં લાખો રૂપિયા મળ્યાં હતાં. એક સમયે આટલાં બધાં રૂપિયા જોઈને પોલીસ પણ ચક થઈ ગઈ હતી.