બનાસકાંઠા: હવામાન વિભાગની આગાહી વચ્ચે રાજ્યના અનેક જિલ્લાઓમાં વરસાદી ઝાપટા પડ્યા છે. વહેલી સવારથી જ અનેક શહેરોમાં વાદળછાયું વાતાવરણ છે. બનાસકાંઠા, મહેસાણા અને પાટણ સહિત ઉત્તર ગુજરાતમાં માવઠું પડ્યું છે. કમોસમી વરસાદના કારણે ખેડૂતો મુશ્કેલીમાં મૂકાયા છે. બહુચરાજીમાં કરા સાથે કમોસમી વરસાદ વરસ્યો છે. હાલ ગુજરાતના અનેક શહેરોમાં વરસાદની માહોલ છવાયો છે.
બનાસકાંઠાના સરહદી પંથકમાં કમોસમી વરસાદ વરસ્યો છે. સુઇગામના બેણપ સહિતના ગામમાં ધીમીધારે વરસાદ શરૂ થયો છે. થરાદ અને વાવ પંથકમાં ઝરમર વરસાદ વરસ્યો છે. તો ધાનેરા પંથકમાં ઘનઘોર વાદળછાયું વાતાવરણ સર્જાયું છે. કમોસમી વરસાદને લઈને ખેડૂતોના પાકને નુકસાનની ભીતિ છે.
અમદાવાદ શહેરમાં જોરદાર પવન સાથે ધોધમાર વરસાદ
હવામાન વિભાગની આગાહી વચ્ચે રાજ્યના અનેક જિલ્લાઓમાં કમોસમી વરસાદ વરસ્યો છે. અમદાવાદ શહેરમાં પણ ભારે પવન સાથે વરસાદની શરુઆત થઈ છે. શહેરના બોપલ, શેલા, સાણંદ, એસજી હાઈવે, ઈસકોન, ગોતા, વૈષ્ણોદેવી સર્કલ, જીવરાજ પાર્ક સહિતના વિસ્તારોમાં વરસાદ વરસ્યો છે. શહેરના સિંધુભવન રોડ પણ વરસાદ વરસ્યો છે. શહેરના એસજી હાઈવે પર ધોધમાર વરસાદ વરસ્યો છે.
ગાંધીનગર શહેરમાં પણ વરસાદી ઝાપટા પડ્યા છે. શહેરના અનેક વિસ્તારોમાં ધીમી ધારે વરસાદની શરુઆત થઈ છે. હવામાન વિભાગ દ્વારા ગાંધીનગર જિલ્લામાં પણ વરસાદની આગાહી કરવામાં આવી હતી.
રાજકોટમાં વરસાદ
રાજકોટમાં પણ કમોસમી વરસાદ પડ્યો છે. રાજકોટમાં વરસાદ વિલન બન્યો છે. વરસાદના કારણે સોસાયટી કે ખુલ્લા પ્લોટ, પાર્ટી પ્લોટમાં જે લોકોએ લગ્નનું આયોજન કર્યુ હતું ત્યાં મંડપ સહિતની તમામ વસ્તુઓ પલળી ગઈ છે. શહેરમાં એક જગ્યાએ તો લગ્ન મંડપ પણ ધરાશાયી થયો હતો. જેના સીસીટીવી સામે આવ્યા છે. લગ્નની સિઝનમાં કમોસમી વરસાદ વરસતા પરેશાન થયા છે.
પાટણમાં વરસાદ
પાટણ જિલ્લામાં વરસાદી માહોલ છે. પાટણ શહેર સહિત તાલુકામાં વરસાદ છે. પાટણ શહેરમાં પવન સાથે વરસાદ છે. પાટણનાં સંડેર, રૂની, હાજીપુર,ગોલાપુર સહિત ગ્રામ્યમાં વરસાદ છે. વરસાદી માહોલથી ખેડૂત ચિંતિત છે. ખેતરમાં ઉભા જીરું, ઘઉં, અજમો, સુવા સહીતના પાકોને નુકશાનની ભીતિ છે.
મધ્ય ગુજરાતના ખેડા, આણંદ,વડોદરા, છોટા ઉદેપુરમાં ગાજવીજ સાથે વરસાદનું અનુમાન છે. પંચમહાલ, દાહોદ,મહીસાગર જિલ્લામાં પણ હવામાન વિભાગે વરસાદનું યલો એલર્ટ આપ્યું છે.