- ગોધરા-વડોદરા હાઈવે પર ટ્રક હડફેટે પિતા અને ત્રણ દીકરીઓના મોત.
- લગ્ન પ્રસંગે આવેલો પરિવાર અકસ્માતનો ભોગ બન્યો.
- એક દીકરીનો ચમત્કારિક બચાવ થયો.
- ટ્રક ચાલક અકસ્માત સર્જી ફરાર થયો.
- રાજ્યમાં માર્ગ અકસ્માતોની વધતી ઘટનાઓ ચિંતાજનક.
Panchmahal truck accident: ગુજરાતના પંચમહાલ જિલ્લામાંથી (Panchmahal tragic accident) એક અત્યંત દુઃખદ સમાચાર સામે આવ્યા છે. ગોધરા-વડોદરા હાઈવે પર તૃપ્તિ હોટલ નજીક એક ભીષણ માર્ગ અકસ્માતમાં એક જ પરિવારના ચાર સભ્યોના (father and daughters die in crash) કમકમાટીભર્યા મોત નીપજ્યા છે. આ ઘટનામાં ત્રણ માસૂમ દીકરીઓ અને તેમના પિતાનું ઘટના સ્થળે જ મૃત્યુ થયું હતું, જ્યારે પરિવારની એક દીકરીનો આબાદ બચાવ થયો છે.
પ્રાપ્ત માહિતી અનુસાર, ઘોઘંબા તાલુકાના બોર ગામનો એક પરિવાર ગોધરાના સારંગપુર ખાતે લગ્ન પ્રસંગમાં આવ્યો હતો. લગ્ન પ્રસંગ પતાવીને પરિવાર બાઇક પર પરત ફરી રહ્યો હતો, ત્યારે ગોધરા-વડોદરા હાઈવે પર તૃપ્તિ હોટલ નજીક એક પુરઝડપે આવતા ટ્રકના ચાલકે બાઇકને અડફેટે લીધું હતું. ટ્રકની ટક્કર એટલી ભયાનક હતી કે બાઇક પર સવાર પિતા અને તેમની ત્રણ દીકરીઓના ઘટના સ્થળે જ કમકમાટીભર્યા મોત થયા હતા.
આ અકસ્માતમાં પરિવારની ચાર દીકરીઓ પૈકી ત્રણ દીકરીઓએ જીવ ગુમાવ્યો હતો, જ્યારે એક દીકરીનો ચમત્કારિક બચાવ થયો હતો. અકસ્માત સર્જીને ટ્રકનો ચાલક ઘટના સ્થળેથી ફરાર થઈ ગયો હતો.
ઘટનાની જાણ થતા જ સ્થાનિક લોકો અને પોલીસની ટીમ તાત્કાલિક ઘટનાસ્થળે પહોંચી ગઈ હતી. પોલીસે મૃતદેહોને પોસ્ટમોર્ટમ માટે હોસ્પિટલમાં ખસેડવાની કાર્યવાહી હાથ ધરી હતી અને ફરાર ટ્રક ચાલકને પકડવા માટે તજવીજ શરૂ કરી હતી.
ઉલ્લેખનીય છે કે, છેલ્લા કેટલાક દિવસોથી રાજ્યમાં (Gujarat road mishap) માર્ગ અકસ્માતોની ઘટનાઓમાં નોંધપાત્ર વધારો થયો છે. એક દિવસ પહેલા જ પાટણના રાધનપુર હાઈવે પર એસટી બસ અને રીક્ષા વચ્ચે ગમખ્વાર અકસ્માત થયો હતો, જેમાં પાંચ લોકોના મોત થયા હતા. આ ઉપરાંત, રાજકોટમાં પણ સિટી બસની હડફેટે ચાર લોકોએ જીવ ગુમાવ્યા હતા. રાજ્યમાં ઉપરા-છાપરી બની રહેલી આ અકસ્માતની ઘટનાઓ માર્ગ સલામતી અંગે ગંભીર સવાલો ઉભા કરી રહી છે. આ દુઃખદ ઘટનાએ સમગ્ર પંચમહાલ જિલ્લામાં શોકની લાગણી ફેલાવી દીધી છે.