ખાનગી હવામાન સંસ્થા સ્કાયમેટ (Skymet Weather) એ ગુજરાત માટે મહત્વપૂર્ણ વરસાદની આગાહી જાહેર કરી છે. સ્કાયમેટના અનુમાન મુજબ રાજ્યમાં 2 ઓગસ્ટ સુધી ભારે વરસાદનું જોર યથાવત રહેવાની શક્યતા છે. ખાસ કરીને ઉત્તર ગુજરાત, મધ્ય ગુજરાત અને દક્ષિણ ગુજરાતના અનેક જિલ્લાઓમાં ભારે વરસાદ નોંધાઈ શકે છે. લોકોને સાવચેત રહેવા અને સ્થાનિક તંત્રની સૂચનાઓનું પાલન કરવા અપીલ કરવામાં આવી છે.
2 ઓગસ્ટ સુધી ભારે વરસાદની સંભાવના
સ્કાયમેટના જણાવ્યા અનુસાર આગામી દિવસોમાં ગુજરાતમાં સક્રિય વરસાદી સિસ્ટમોના કારણે વરસાદની તીવ્રતા યથાવત રહેવાની શક્યતા છે. કેટલાક વિસ્તારોમાં ભારે વરસાદને કારણે નીચાણવાળા વિસ્તારોમાં પાણી ભરાવા તેમજ જનજીવન પર અસર થવાની શક્યતા વ્યક્ત કરવામાં આવી છે. સ્કાયમેટે ઉત્તર અને મધ્ય ગુજરાતના અનેક જિલ્લાઓમાં ભારે વરસાદની આગાહી કરી છે. ખાસ કરીને આણંદ, વડોદરા અને છોટાઉદેપુર જિલ્લામાં ભારે વરસાદ પડી શકે છે. ઉપરાંત ભરૂચ અને નર્મદા જિલ્લામાં પણ વરસાદનું જોર વધવાની સંભાવના છે.
દક્ષિણ ગુજરાતમાં ભારે વરસાદની આગાહી
દક્ષિણ ગુજરાતના સુરત, તાપી, નવસારી, ડાંગ અને વલસાડ જિલ્લામાં ભારેથી ભારે વરસાદની શક્યતા વ્યક્ત કરવામાં આવી છે. ભારે વરસાદને કારણે નદી-નાળાઓમાં પાણીની આવક વધવાની અને કેટલાક વિસ્તારોમાં પાણી ભરાવાની સ્થિતિ સર્જાઈ શકે છે. સ્કાયમેટના અનુમાન મુજબ સૌરાષ્ટ્રના ભાવનગર અને બોટાદ જિલ્લામાં પણ ભારે વરસાદ પડી શકે છે. આગામી દિવસોમાં વરસાદની સ્થિતિ પર સતત નજર રાખવાની અને હવામાન વિભાગ તેમજ સ્થાનિક વહીવટી તંત્ર દ્વારા આપવામાં આવતી સૂચનાઓનું પાલન કરવાની સલાહ આપવામાં આવી છે.
આ પણ વાંચો- Weather: 24 કલાક ગુજરાત સહિત દેશના 19 રાજ્યોમાં ધોધમાર વરસાદ અને વાવાઝોડાની ચેતવણી, હવામાનનું લેટેસ્ટ અપડેટ
ગુજરાતમાં રેડ એલર્ટ જારી
હવામાન વિભાગે 1 ઓગસ્ટને લઈ અમદાવાદ સહિત ગુજરાતના ઘણા જિલ્લાઓ માટે રેડ એલર્ટ જારી કર્યું છે. આ જિલ્લાઓમાં ખૂબ જ ભારે વરસાદની આગાહી છે. હવામાન વિભાગના ડિરેક્ટર અશોક કુમાર દાસે જણાવ્યું હતું કે અમદાવાદ સહિત ઘણા જિલ્લાઓમાં રેડ એલર્ટ જારી કરવામાં આવ્યું છે અને અત્યંત ભારે વરસાદની શક્યતા છે. 2 ઓગસ્ટ સુધી ભારેથી અતિ ભારે વરસાદની ચેતવણી આપવામાં આવી છે.
અમદાવાદ શહેરમાં ધોધમાર વરસાદ
અમદાવાદમાં બપોર બાદ હવામાનમાં અચાનક પલટો આવ્યો અને શહેરના અનેક વિસ્તારોમાં ધોધમાર વરસાદ શરૂ થયો. વરસાદ શરૂ થતાં અનેક માર્ગો પર પાણી ફરી વળ્યા છે, જ્યારે કેટલાક નીચાણવાળા વિસ્તારોમાં પાણી ભરાયા હતા.