Gujarat Heavy Rain: ગુજરાતમાં ભારે વરસાદના કારણે અનેક બ્રીજ રસ્તા પાણીમાં ગરકાવ થયા છે. જળબંબાકારની સ્થિતિના કારણે વાહનવ્યવહાર પ્રભાવિત થયો છે. રાજ્યના કુલ 636 રસ્તાઓ પર વાહન વ્યવહાર સંપૂર્ણ બંધ છે. 22 સ્ટેટ હાઈવે, પંચાયત હસ્તકના 549 રસ્તા બંધ છે. અન્ય 37 રસ્તાઓ પર વાહન વ્યવહાર બંધ છે. ભારે વરસાદથી એસટી બસ સેવા પણ ખોરવાઈ છે.જામનગર અને આસપાસના તાલુકાઓમાં વરસી રહેલા ધોધમાર વરસાદના કારણે બેડ પાસેથી પસાર થતી નદીમાં ઘોડાપૂર આવતા જામનગર-ખંભાળીયા હાઈવે પર પાણી ફરી વળ્યા હતા. જેના કારણે માર્ગ વ્યવહાર બંધ કરવાની ફરજ પડી હતી.
ભારે વરસાદના કારણે રેલવે સેવા પણ ખોરવાઇ છે
ભારે વરસાદથી રાજ્યમાં રેલ વ્યવહાર પ્રભાવિત થયો છે. મુંબઈ સેન્ટ્રલ-અમદાવાદ-મુંબઈ સેન્ટ્રલ શતાબ્દી એક્સપ્રેસ ટ્રેન રદ કરાઇ છે. મુંબઈ સેન્ટ્રલ-અમદાવાદ-મુંબઈ સેન્ટ્રલ તેજસ એક્સપ્રેસ ટ્રેન રદ કરવામાં આવી છે. અમદાવાદ-એક્તાનગર જનશતાબ્દી એક્સપ્રેસ રદ કરવામાં આવી છે વડોદરા-અમદાવાદ મેમુ ટ્રેન અને અમદાવાદ-વડોદરા મેમુ, અમદાવાદ-હાવડા, અમદાવાદ-બરૌની એક્સપ્રેસ ટ્રેન, અમદાવાદ-મુંબઈ-અમદાવાદ કર્ણાવતી એક્સપ્રેસ અને અમદાવાદ-મુંબઈ-અમદાવાદ ડબલ ડેકર એક્સપ્રેસ, વલસાડ-વડનગર એક્સપ્રેસ ટ્રેન રદ થઇ છે.
જામનગર શહેરમાં પણ મૂશળધાર વરસાદના કારણે શહેરના અલગ અલગ વિસ્તારોમાં જળમગ્ન થઇ ગયા છે. ખંભાળીયા નાકા, નાગરપરામાં પાણી ફરી વળ્યાં છે. સાન ચોક વિસ્તાર, પંચેશ્વર ટાવરથી બેડીગેટ તરફનો રસ્તો પાણીમાં ગરકાવ થઇ જતાં વાહન વ્યવહાર ખોરવાયો છે. રસ્તા જળમાં મગ્ન થતાં વરસાદી પાણીમાં વાહનો ડૂબી ગયા હતા. ભારે વરસાદના કારણે સ્થાનિકોને ભારે હાલાકી ભોગવી રહયાં છે.
રાજકોટમાં જળબંબાકાર
રાજકોટમાં સતત ત્રણ દિવસથી વરસી રહેલા ભારે વરસાદના કારણે ન્યારી-2 ડેમની જળસપાટી વધતાં 10 દરવાજા ખોલવામાં આવ્યા છે. ન્યારીના દરવાજા ખોલાતા નદીના પટના વિસ્તારમાં રહેતા લોકોને તાત્કાલિક સલામત સ્થળે ખસી જવા સૂચના આપી છે. પડધરીના નીચાણવાળા ગામમાં ગોવિંદપર, ખામટા, રામપર, તરઘડી તથા વણપરી લોકોને સતર્ક રહેવા સૂચના આપવામાં આવી છે. ઉપલેટાના મોજીરા નજીકનો મોજ ડેમ ઓવરફ્લો થતાં મોજ ડેમના 24 દરવાજા પાંચ ફુટ સુધી ખોલવામાં આવ્યાં છે. ડેમના દરવાતા ખોલવા ઉપલેટા સહિતના મોજીરા, ગઢાળા ગામને કરાયા એલર્ટ કરવાાં આવ્યાં છે. ખાખી જાળીયા, સેવંત્રા, નવાપરા,કેરાળા ગામને એલર્ટ કરવામાં આવ્યાં છે. મોજ નદીના પટમાં અવરજવર ન કરવા પ્રશાસનને સૂચના આપી છે