Unseasonal Rain : રાજ્યના ખેડૂતો માટે વધુ એક માઠા સમાચાર આવ્યા છે. રાજ્યમાં આજથી પાંચ ડિસેમ્બર સુધી માવઠાની આગાહી કરવામાં આવી છે. હવામાન નિષ્ણાંત પરેશ ગોસ્વામીએ માવઠાની આગાહી કરી હતી. ઉત્તર,દક્ષિણ ગુજરાત, સૌરાષ્ટ્રમાં હળવા વરસાદની શક્યતા છે.
આજથી પાંચ ડિસેમ્બર સુધી દક્ષિણ ગુજરાત, ઉત્તર ગુજરાત અને સૌરાષ્ટ્રમાં હળવા કમોસમી વરસાદની હવામાન વિભાગે આગાહી વ્યક્ત કરી છે. હવામાન વિભાગ અનુસાર ઉત્તર પૂર્વ અરેબિયન સમુદ્ર અને તેની સાથે મહારાષ્ટ્રના દરિયામાં સર્જાયેલા સાયક્લોનિક સર્ક્યુલેશનને લીધે રાજ્યના કેટલાક વિસ્તારોમાં હળવો વરસાદ વરસી શકે છે. હવામાન વિભાગ અનુસાર મધ્ય ગુજરાત, અને દક્ષિણ ગુજરાતમાં વાદળછાયુ વાતાવરણ જોવા મળશે. તો કાલથી ચાર ડિસેમ્બર સુધી દરમિયાન સૌરાષ્ટ્ર, દક્ષિણ ગુજરાત અને મધ્ય ગુજરાતના વિસ્તારોમાં છૂટોછવાયો વરસાદ વરસી શકે છે. બંગાળની ખાડીમાં વરસાદી સિસ્ટમ સક્રિય થઈ છે. જેના કારણે દક્ષિણ ભારતમાં ભારે વરસાદની શક્યતા છે.
ખેડૂતો અને એપીએમસી માટે ખેતી નિયામક કચેરીએ માર્ગદર્શિકા જાહેર કરી
રાજ્યમાં હજુ કમોસમી વરસાદ થવાની હવામાન વિભાગે આગાહી વ્યક્ત કરી હતી. જેને જોતા ખેડૂતો અને એપીએમસી માટે ખેતી નિયામક કચેરીએ માર્ગદર્શિકા જાહેર કરી છે. માર્ગદર્શિકા અનુસાર પાકને નુકસાનથી બચાવવા ખેડૂતોએ ખેતરમાં કાપણી કરી પાક ખુલ્લો હોય તો તેને તાત્કાલિક સલામત સ્થળે ખસેડવાની કામગીરી કરવી જોઈએ.. અથવા પ્લાસ્ટિક કે તાડપત્રીથી યોગ્ય રીતે ઢાંકવાની સલાહ આપવામાં આવી છે.
એટલુ જ નહીં પાકના ઢગલાની ફરતે માટીનો પાળો બનાવી વરસાદનું પાણી ખેતીના પાકની નીચે જતુ અટકાવવુ જોઈએ. ખેતી નિયામકે જાહેર કરેલી માર્ગદર્શિકામાં ખેડૂતોને હાલ જંતુનાશક દવા અને ખાતરનો ઉપયોગ ટાળવા માટેની પણ સલાહ આપવામાંઆવી છે. ખાતર અને બિયારણ વિક્રેતાઓએ જથ્થો પલળે નહીં તે મુજબ ગોડાઉનમાં સુરક્ષિત રાખવા જણાવાયું છે. તો એપીએમસીમાં અનાજ અને ખેત પેદાશો સુરક્ષિત રાખવા તેમજ વેચાણ અર્થે આવતી પેદાશો આ દિવસોમાં સુરક્ષિત રાખવી જોઈએ. ઉપરાંત નજીકના વિસ્તારના ગ્રામ સેવક, વિસ્તરણ અધિકારી, તાલુકા અમલીકરણ અધિકારી, મદદનીશ ખેતી નિયામક, જિલ્લા ખેતીવાડી અધિકારી,નાયબ ખેતી નિયામકનો સંપર્ક કરવાની સલાહ આપવામાં આવી છે.
દાહોદનાં વાતાવરણમાં પલટો આવ્યો હતો. દાહોદ શહેર સહિત આસપાસનાં વિસ્તારમાં કમોસમી વરસાદ વરસ્યો હતો. બીજી તરફ વરસાદના પગલે ઠંડીમાં વધારો થયો છે. માવઠાની આગાહી વચ્ચે રાજ્યમાં ઠંડીનો પારો ગગડ્યો હતો. 15 શહેરોમાં ઠંડીનો પારો 20 ડિગ્રીની નીચે રહ્યો હતો. 12 ડિગ્રી સાથે નલિયા રાજ્યનું સૌથી ઠંડુ શહેર રહ્યું હતું. ભૂજ, રાજકોટ, કેશોદમાં 16 ડિગ્રીથી નીચે તાપમાન નોંધાયું હતું.