Valsad: ગાંધીના ગુજરાતમાં ફરી એકવાર દારૂબંધીના ધજાગરા ઉડ્યા છે. વલસાડના તિથલ રોડ પર BSNL ઓફિસમાં દારૂની મહેફિલનો વીડિયો વાયરલ થયો છે. ઓફિસનો વોચમેન અને પારડી ખાનગી કેન્ટીનનો કર્મચારી મહેફિલ માણતા ઝડપાયા હતા. તેમણે દારૂનો નશો કરી ધમાલ કરી હોવાનો આરોપ લાગ્યો છે. લોકોએ પોલીસને જાણ કરતા પોલીસ સ્થળ પર પહોંચી હતી. પોલીસે આરોપીઓની અટકાયત કરી કાયદેસરની કાર્યવાહી હાથ ધરી હતી. સરકારી ઓફિસમાં દારૂની મહેફિલના કારણે ચકચાર મચી ગઈ હતી.
વલસાડના તીથલ રોડ પર BSNLની ઓફિસમાં દારૂની મહેફિલ માણતા ઓફિસનો વોચમેન અને પારડી ખાનગી કેન્ટીનનો કર્મચારી ઝડપાયા હતા. લોકોનો આક્ષેપ છે કે આરોપીઓએ દારૂનો નશો કરી ધમાલ મચાવી હતી જેના કારણે તેમને પોલીસ બોલાવવી પડી હતી.
વડોદરામાં દારુ મહેફીલનો વીડિયો થયો વાયરલ
વડોદરામાં દારૂબંધીના નિયમોનો રીતસર ધજાગરા ઉડ્યા હતા. દારૂબંધીના દાવા વચ્ચે દારૂની મહેફિલો થઈ રહી છે. આટલું જ નહીં મહેફિલનો વીડિયો સોશલ મીડિયામાં અપલોડ કરી પોલીસને જાણે પડકાર ફેંકવામાં આવતો હોય તેવું જોવા મળી રહ્યું છે. વડોદરા શહેરના ગોત્રી વિસ્તારમાં ત્રણ મિત્રો મનોજ ભાવસાર, રમેશ સિયાક અને દિપક અગ્રવાલે દારૂની મહેફિલ કરી હતી. આટલું જ નહીં દારૂની મહેફિલનો એક વીડિયો સોશિયલ મીડિયા પર મૂક્યો હતો જેમાં બોલિવૂડ સોંગ પર ત્રણેય મિત્રો દારૂની બોટલ સાથે ઠુમકા લગાવી રહ્યા છે.
એક શખસ તો માથે બોટલ મૂકીને નાચતો જોવા મળ્યો હતો અને તે હાથમાં દારૂ લઈને પી રહ્યો હતો. વાયરલ વીડિયોની જાણ થતાં જ ગોત્રી પોલીસે વીડિયોમાં દેખાયેલા વ્યક્તિઓની ઓળખ કરી હતી અને ગણતરીના કલાકોમાં 3 આરોપીની ધરપકડ કરી લીધી હતી. ત્રણેય સામે પ્રોહીબીશનનો ગુનો નોંધ્યો હતો. આરોપીઓ પોલીસ સ્ટેશનમાં કાન પકડીને કહી રહ્યા છે કે, દારૂની મહેફિલનો જે વીડિયો સોશિયલ મીડિયામાં વાઇરલ થયો હતો. એ માટે અમે માફી માંગીએ છીએ. હવે આવું ક્યારેય નહીં કરીએ.