નર્મદા ડેમને લઈ સૌથી મોટા સમાચાર સામે આવ્યા છે. નર્મદા ડેમમાં પાણીની ધરખમ આવક થઈ રહી છે. ઉપરવાસમાંથી નર્મદા ડેમમાં 10 લાખ 15 હજાર 569 ક્યૂસેક પાણીની આવક થઈ રહી છે અને ડેમની જળ સપાટી 132.51 મીટર પહોંચી ગઈ છે. પાણીની સતત આવકના કારણે ડેમના 23 દરવાજા ખોલી 9 લાખ 54 હજાર ક્યુસક પાણી છોડવામાં આવી રહ્યું છે અને નર્મદા, ભરૂચ સહિતના નીચાણવાળા વિસ્તારોના 21 ગામોને એલર્ટ કરવામાં આવ્યા છે.
રીવર બેડ પાવર હાઉસમાં છ યુનિટ કાર્યરત થતાં 1200 મેગાવોટ વિજળી ઉત્પન થઈ રહી છે તો નર્મદા ડેમમાં પાણી છોડવામાં આવી રહ્યું છે જેને લઈ ભરૂચ જિલ્લા કલેક્ટરે બેઠક બોલાવી હતી અને નર્મદા કિનારાના ભરૂચના 12, અંકલેશ્વરના 14 અને ઝઘડિયાના 13 ગામોને એલર્ટ કરવામાં આવ્યા. આ ઉપરાંત એનડીઆરએફની એક ટીમને પણ તૈનાત કરી દેવામાં આવી છે. કલેક્ટરે અધિકારીઓને હેડ ક્વાર્ટર ન છોડવા આદેશ કર્યો છે.
નર્મદા નદીના પાણી ભરૂચ શહેરમાં ઘૂસવાની શરૂઆત થઈ ગઈ છે. ભરૂચના નીચાણવાળા ફુરજા વિસ્તારમાં નર્મદાના પાણી ઘુસી રહ્યા છે. જેને કારણે ભરૂચવાસીઓમાં ફફડાટ જોવા મળ્યો હતો. ભરૂચ જિલ્લામાં અત્યાર સુધીમાં કુલ 2540 લોકોનું સ્થળાંતર કરવામાં આવ્યું છે.