Bokaro Encounter: ઝારખંડના બોકારો જિલ્લાના લાલપનિયા વિસ્તારના લુગુ ટેકરીઓ પર સેન્ટ્રલ રિઝર્વ પોલીસ ફોર્સ (CRPF) એ રાજ્ય પોલીસ સાથે સંયુક્ત ઓપરેશન હાથ ધર્યું હતું. આ કાર્યવાહી દરમિયાન સોમવારે (21 એપ્રિલ) વહેલી સવારે સુરક્ષા દળોએ લાલપનિયાના લુગુ ટેકરીઓમાં એક એન્કાઉન્ટરમાં 6 નક્સલીઓને ઠાર માર્યા હતા. આ કાર્યવાહીમાં સામેલ પોલીસ કર્મચારીઓએ સ્થળ પરથી એક SLR અને એક INSAS રાઇફલ જપ્ત કરી હતી.
સેન્ટ્રલ રિઝર્વ પોલીસ ફોર્સ (CRPF) ના અધિકારીઓએ જણાવ્યું હતું કે, "નક્સલવાદીઓ સાથેના એન્કાઉન્ટર દરમિયાન સૈનિકોને કોઈ ઈજા થઈ હોવાના કોઈ અહેવાલ નથી. શોધખોળ કામગીરી સાથે થોડા થોડા સમયે ફાયરિંગ ચાલી રહ્યું છે."
12 એપ્રિલના રોજ એક સૈનિકનું મૃત્યુ થયું હતું
ઝારખંડના ચાઇબાસામાં 12 એપ્રિલના રોજ IED વિસ્ફોટમાં ઝારખંડ જગુઆર ફોર્સના એક સૈનિકનું મોત થયું હતું. ચાઇબાસા વિસ્ફોટની ઘટનામાં એક CRPF જવાન ઘાયલ થયો હતો. આ પહેલા ઝારખંડના ઝરાઈકેલામાં નક્સલ વિરોધી કાર્યવાહી દરમિયાન બે સીઆરપીએફ જવાન ઘાયલ થયા હતા. આ ઘટના ઝરાઈકેલા પોલીસ સ્ટેશન વિસ્તારમાં બની હતી. ઘાયલ સૈનિકોને હેલિકોપ્ટર દ્વારા એરલિફ્ટ કરવામાં આવ્યા હતા અને સારવાર માટે રાંચીની હોસ્પિટલમાં દાખલ કરવામાં આવ્યા હતા.
દરમિયાન પોલીસ નક્સલી એન્કાઉન્ટરમાં માર્યા ગયેલા નક્સલીઓની ઓળખ કરવામાં વ્યસ્ત છે. માહિતી અનુસાર, સેન્ટ્રલ કમિટીના સભ્ય અને 1 કરોડ રૂપિયાના ઈનામી નક્સલી પ્રયાગ માંઝી અને બિહારના નક્સલી અવિનાશ દા ઉર્ફે અરવિંદ યાદવ સહિત 6 નક્સલીઓ માર્યા ગયા છે. બિહારના જમુઈ વિસ્તારમાં સક્રિય અરવિંદ સંગઠનના વિસ્તરણ માટે એક કાર્યક્રમ ચલાવી રહ્યા હતા. આ દરમિયાન, સુરક્ષા દળોએ આ ટુકડીને ઘેરી લીધી અને એન્કાઉન્ટર શરૂ થયું હતું.