મહારાષ્ટ્રની રાજધાની મુંબઈથી એક મોટા સમાચાર સામે આવ્યા છે. અહીં ગેટવે ઓફ ઈન્ડિયા પાસે લોકોથી ભરેલી બોટ અચાનક પલટી ગઈ હતી. આ અકસ્માતમાં 13 લોકોના મોત થયા છે અને 101 મુસાફરોને બચાવી લેવામાં આવ્યા છે. આ અકસ્માત સાંજે 5.30 વાગ્યાની આસપાસ થયો હતો.
ગેટવે ઓફ ઈન્ડિયાથી મુંબઈના એલિફન્ટા ટાપુ પર મુસાફરોને લઈને જતી બોટ બુધવારે ટક્કર બાદ પલટી ગઈ હતી. મળતી માહિતી મુજબ નેવીની એક સ્પીડ બોટ પેસેન્જર જહાજ સાથે અથડાઈ હતી. અકસ્માતનો એક વીડિયો પણ સામે આવ્યો છે જેમાં બોટ પાણીમાં ડૂબતી જોવા મળી રહી છે. વીડિયોમાં લાઈફ જેકેટ પહેરેલા લોકો મુસાફરોને બચાવતા જોવા મળે છે.
સીએમ દેવેન્દ્ર ફડણવીસે માહિતી આપી છે કે નૌકાદળની બોટ નીલકમલ નામના પેસેન્જર જહાજ સાથે અથડાઈ હતી. હાલમાં 101 લોકોને બચાવી લેવામાં આવ્યા છે અને 13 લોકોના મોત થયા છે, જેમાં 10 નાગરિકો અને ત્રણ નૌસૈનિકનો સમાવેશ થાય છે. પાંચની હાલત ગંભીર હોવાનું કહેવાય છે.
બોટ એલિફન્ટા તરફ જઈ રહી હતી
વીડિયોમાં બોટમાં સવાર લોકો બીજા જહાજમાં જતા જોઈ શકાય છે. JOC પાસેથી મળેલી માહિતી અનુસાર, એલિફન્ટાના રસ્તા પર નીલકમલ ફેરી બોટ ઉરણ, કરંજ નજીક અથડાયા બાદ પલટી ગઈ હતી. પ્રારંભિક અહેવાલમાં જાણવા મળ્યું છે કે બોટમાં લગભગ 110 લોકો સવાર હતા. ઘટનાસ્થળે બચાવ અને રાહત કાર્ય ચાલી રહ્યું છે અને 108 એમ્બ્યુલન્સ અને મરીન પોલીસ ઘટનાસ્થળે હાજર છે. મળતી માહિતી મુજબ, મોટાભાગના મુસાફરોને બચાવી લેવામાં આવ્યા છે અને 13 લોકોના મોત થયા છે અને પાંચ ગંભીર રીતે ઘાયલ છે.
મહારાષ્ટ્રના મુખ્યમંત્રી દેવેન્દ્ર ફડણવીસે પણ ટ્વીટ કરીને આ ઘટનાની જાણકારી આપી છે. તેમણે કહ્યું, 'અમને નીલકમલ બોટના અકસ્માતના અહેવાલ મળ્યા છે, જે એલિફન્ટા તરફ જઈ રહી હતી. નેવી, કોસ્ટ ગાર્ડ, પોર્ટ અને પોલીસની ટીમોની બોટ તાત્કાલિક મદદ માટે રવાના કરવામાં આવી છે. અમે જિલ્લા અને પોલીસ પ્રશાસન સાથે સતત સંપર્કમાં છીએ અને સદનસીબે મોટાભાગના નાગરિકોને બચાવી લેવામાં આવ્યા છે. જો કે બચાવ કાર્ય હજુ ચાલુ છે. જિલ્લા વહીવટી તંત્રને બચાવ કામગીરી માટે જરૂરી તમામ મશીનરી તૈનાત કરવાનો આદેશ આપવામાં આવ્યો છે.