Weather Update Today: દેશના રાજ્યોમાં ગાજવીજ સાથે તૂટી પડશે વરસાદ, હવામાન વિભાગે આપી ચેતવણી

IMDએ દેશના કેટલાક રાજ્યોમાં ભારે વરસાદનું એલર્ટ આપ્યું છે. ઉત્તરાખંડ, ઉત્તરપ્રદેશ અને રાજસ્થાનમાં ભારે વરસાદની ચેતવણી આપી છે.

Weather Update Today: ચોમાસાની શરૂઆતથી દેશભરમાં સારો વરસાદ પડી રહ્યો છે. ક્યાંક ભારે વરસાદના કારણે પૂર જેવી સ્થિતિ છે તો ક્યાંક દુષ્કાળ જેવી સ્થિતિ છે. આવી સ્થિતિમાં જો આજના હવામાનની વાત કરીએ તો 2 ઓગસ્ટના રોજ ઉત્તર પ્રદેશ એટલે કે UPમાં પૂર્વથી પશ્ચિમમાં ગાજવીજ અને વીજળીના ચમકારા સાથે વરસાદ પડી શકે છે. અહીં વીજળી પડવાની સંભાવના છે. આ દરમિયાન પવનની ઝડપ 40 થી 50 કિલોમીટર પ્રતિ કલાક રહેવાની સંભાવના છે. હવામાન વિભાગની આગાહી અનુસાર, ઉત્તર પશ્ચિમ ભારતમાં 2 ઓગસ્ટે હળવોથી મધ્યમ વરસાદ પડી શકે છે.

હવામાન વિભાગના જણાવ્યા અનુસાર 7 ઓગસ્ટ સુધી યુપીમાં વરસાદી માહોલ  રહેશે. ખાસ કરીને 6 ઓગસ્ટ સુધી રાજ્યના ઘણા ભાગોમાં મધ્યમથી ભારે વરસાદની શક્યતા છે. બીજી તરફ આજે ઉત્તરાખંડમાં ગાજવીજ સાથે આજે ભારે  વરસાદની આગાહી કરવામાં આવી છે. પર્વતીય વિસ્તારોમાં ભૂસ્ખલન અને ખડકો પડવાની સંભાવના છે. આ સાથે ભૂસ્ખલનની સંભાવનાઓથી સાવચેત રહેવા માટે કહેવામાં આવ્યું છે. અહીં ભૂસ્ખલનના કારણે  માર્ગો બંધ થવાની સંભાવના છે. હાઈવે બ્લોક થઈ શકે છે અને નીચાણવાળા વિસ્તારોમાં પાણી ભરાઈ શકે છે.

છત્તીસગઢમાં શું હશે વરસાદની સ્થિતિ

2 ઓગસ્ટના રોજ પશ્ચિમ મધ્ય પ્રદેશમાં કેટલાક સ્થળોએ ભારે વરસાદ સાથે હળવાથી મધ્યમ વરસાદની સંભાવના છે. IMD અનુસાર, 'છત્તીસગઢમાં પણ આજે 2 ઓગસ્ટે ભારે વરસાદ પડશે. બીજી તરફ પૂર્વ મધ્ય પ્રદેશમાં 2 ઓગસ્ટે વરસાદ પડશે.

મધ્ય અને દક્ષિણમાં કેવું રહેશે હવામાન

આજે બિહાર-ઝારખંડમાં પણ સામાન્યથી મધ્યમ વરસાદની આગાહી કરવામાં આવી છે.આઈએમડીએ જણાવ્યું કે કોંકણ, ગોવા અને મધ્ય મહારાષ્ટ્રમાં 2 ઓગસ્ટે ખૂબ ભારેથી અતિ ભારે વરસાદની શક્યતા છે. બીજી તરફ, જો આપણે દક્ષિણ ભારત વિશે વાત કરીએ, તો આજે કર્ણાટક અને તેલંગાણામાં કેટલાક સ્થળોએ ભારે વરસાદ સાથે હળવાથી મધ્યમ વરસાદનો અનુમાન છે.

કેવું રહેશે દિલ્હીમાં આજે હવામાન?

મંગળવારે દિલ્હીમાં મહત્તમ તાપમાન 36.7 ડિગ્રી સેલ્સિયસ નોંધાયું હતું, જે સામાન્ય કરતાં બે ડિગ્રી વધારે હતું. હવામાન વિભાગના જણાવ્યા અનુસાર ગુરુવારથી મહત્તમ અને લઘુત્તમ તાપમાનમાં થોડો ઘટાડો થઈ શકે છે. આજે 2 ઓગસ્ટે દિલ્હીમાં ભારે વરસાદની કોઈ શક્યતા નથી. જો કે કેટલાક વિસ્તારોમાં હળવો ઝરમર વરસાદ પડી શકે છે. બુધવારે દિલ્હીમાં પવનની ઝડપ 10 થી 20 કિમી પ્રતિ કલાક રહેશે, જ્યારે ગુરુવારે પવનની ઝડપ 10 થી 12 કિમી પ્રતિ કલાક રહેવાની ધારણા છે. હવામાન વિભાગનું માનવું છે કે આગામી સપ્તાહે ગરમીમાંથી રાહત મળવાની શક્યતાઓ છે.