Amar Deepak: તેલંગાણાના મુખ્યમંત્રી કે. ચંદ્રશેખર રાવ (KCR) એ ગુરુવારે હૈદરાબાદમાં તેલંગાણા શહીદ સ્મારક 'અમરા દીપમ' (અમર દીવો) નું ઉદ્ઘાટન કર્યું. આ શ્રદ્ધાંજલિ સ્મારક તે લોકોની યાદમાં બનાવવામાં આવ્યું છે જેમણે તેલંગાણા રાજ્યની રચનામાં પોતાના જીવનનું બલિદાન આપ્યું હતું. હુસૈન સાગર તળાવ પાસે આ 45 મીટરનું સ્ટીલનું બનેલું વિશ્વનું સૌથી મોટું સ્મારક છે. તે અમેરિકાના શિકાગોના 'ક્લાઉડ ગેટ' અને ચીનના 'બબલ' કરતાં પાંચ ગણું મોટું છે.
હૈદરાબાદમાં તૈયાર થયું સ્ટીલથી બનેલું વિશ્વનું સૌથી મોટું સ્મારક
'અમરા દીપમ' સોનેરી પીળા રંગથી ચમકશે. રાજ્ય સરકારે 117.50 કરોડના ખર્ચે સચિવાલયની સામે આ છ માળનું સ્મારક બનાવ્યું છે. આ માટે 3.29 એકર સરકારી જમીન ઉપલબ્ધ કરાવવામાં આવી હતી. તેના બાંધકામમાં 1600 મેટ્રિક ટન સ્ટેનલેસ સ્ટીલનો ઉપયોગ કરવામાં આવ્યો હતો. ઘણી સુવિધાઓ ઉપરાંત સ્મારકમાં મ્યુઝિયમ, ફોટો ગેલેરી, કન્વેન્શન હોલ અને રેસ્ટોરન્ટ પણ છે. વાહનોના પાર્કિંગ માટે અંડરગ્રાઉન્ડ બે માળ બનાવવામાં આવ્યા છે.
ઘણા દેશોના મોડલનો અભ્યાસ કર્યો
મેમોરિયલના મુખ્ય આર્કિટેક્ટ અને ડિઝાઇનર એમ. વેંકટ રમન રેડ્ડીએ યુદ્ધ સ્મારકોના વિવિધ મોડલનો અભ્યાસ કરવા માટે ઘણા દેશોની મુલાકાત લીધી હતી. તેમણે મુખ્ય પ્રધાનને પાંચ ડિઝાઇન સુપરત કરી હતી, જેમણે કેટલાક ફેરફારો સાથે હાલની ડિઝાઇનને આખરી ઓપ આપ્યો હતો. રેડ્ડી કહે છે કે ભારતમાં પહેલેથી જ મ્યુઝિયમ અને સ્તૂપ સહિત અનેક યુદ્ધ સ્મારકો છે, પરંતુ તેલંગાણા શહીદ સ્મારક એક અનોખું મોડેલ છે.
અમર દિપક બનતા લાગ્યા છ વર્ષ
પ્રોજેક્ટનો શિલાન્યાસ જૂન 2017માં KCR દ્વારા કરવામાં આવ્યો હતો. તે પૂર્ણ થતાં છ વર્ષ લાગ્યાં. છેલ્લા ત્રણ વર્ષમાં 5,000થી વધુ લોકોએ આ સ્વપ્નને સાકાર કરવા માટે કામ કર્યું છે. તેમાં એક ઓડિટોરિયમ પણ છે, જેમાં તેલંગાણા આંદોલન પર ફિલ્મો જોવા માટે 75 લોકો બેસી શકે છે.