આમ આદમી પાર્ટીએ ભાજપ પર ગંભીર આરોપ લગાવ્યો છે. AAPનો આરોપ છે કે ભાજપના ગુંડાઓએ દિલ્હીના વિકાસપુરીમાં પદયાત્રા દરમિયાન અરવિંદ કેજરીવાલ પર હુમલો કરવાનો પ્રયાસ કર્યો હતો. ભાજપે હુમલો કરાવ્યો હતો. પાર્ટીનો આરોપ છે કે પોલીસે ભાજપના લોકોને રોક્યા નથી.
દિલ્હીના મંત્રી અને AAPના પ્રવક્તા સૌરભ ભારદ્વાજે કહ્યું કે જ્યારે ED, CBI અને જેલથી પણ વાત ન બની ત્યારે હવે બીજેપીના લોકો અરવિંદ કેજરીવાલ પર હુમલો કરી રહ્યા છે. જો તેમને કંઈ થશે તો તેની સીધી જવાબદારી ભાજપની રહેશે.
મનીષ સિસોદિયાએ પણ નિશાન સાધ્યું હતું
દિલ્હીના પૂર્વ ડેપ્યુટી સીએમ મનીષ સિસોદિયાએ કહ્યું, "અરવિંદ કેજરીવાલ જી પર થયેલો હુમલો અત્યંત નિંદનીય અને ચિંતાજનક છે. તે સ્પષ્ટ છે કે ભાજપે તેના ગુંડાઓ દ્વારા આ હુમલો કરાવ્યો છે. જો અરવિંદ કેજરીવાલ જીને કંઈ થશે તો તેની સંપૂર્ણ જવાબદારી તેમની રહેશે." "અમે ડરવાના નથી - આમ આદમી પાર્ટી તેના મિશનને વળગી રહેશે."
ભાજપના લોકો અરવિંદ કેજરીવાલના જીવના દુશ્મન- સંજય સિંહ
વીડિયો જાહેર કરતા AAP સાંસદ સંજય સિંહે કહ્યું, "દિલ્હીના પૂર્વ મુખ્યમંત્રી અને આમ આદમી પાર્ટીના રાષ્ટ્રીય સંયોજક અરવિંદ કેજરીવાલ આજે વિકાસપુરી વિસ્તારમાં પદયાત્રા કરી રહ્યા હતા. તે દરમિયાન ભારતીય જનતા પાર્ટીના લોકોએ તેમના પર હુમલો કર્યો. આ ખૂબ જ દુઃખદ છે." આ ગંભીર બાબત છે. પહેલા ઈડી અને સીબીઆઈનો ઉપયોગ કરી કેજરીવાલને જેલમાં નાખ્યા. જેલની અંદર તેમને ઈન્સ્યુલિન આપવામાં ન આવી. જાનથી મારવાની કોશિશ કરવામાં આવી. હવે જ્યારે તેઓ પાર્ટીનો પ્રચાર કરી રહ્યા છે તો આ દરમિયાન તેમના પર હુમલો કરવામાં આવી રહ્યો છે. ભાજપવાળા અરવિંદ કેજરીવાલના જીવના દુશ્મન બની ગયા છે.
તમને જણાવી દઈએ કે આવતા વર્ષે યોજાનારી દિલ્હી વિધાનસભાની ચૂંટણીને ધ્યાનમાં રાખીને AAP નેતાઓ જનસંપર્કમાં લાગી ગયા છે. પૂર્વ સીએમ કેજરીવાલ સહિત પાર્ટીના ઘણા મોટા નેતાઓ વિવિધ વિસ્તારોમાં પદયાત્રા માટે લોકોને મળી રહ્યા છે.