Delhi Schools Re-open: રાષ્ટ્રીય રાજધાની દિલ્હીમાં તમામ વર્ગોની શાળાઓ 1 નવેમ્બરથી ખુલશે. કોરોના વાયરસ રોગચાળાના ઘટતા કેસ વચ્ચે કેજરીવાલ સરકારે આ નિર્ણય લીધો છે. આ સાથે દિલ્હીમાં છઠ પૂજા કરવાની પણ પરવાનગી આપવામાં આવી છે. બુધવારે ડીડીએમએની બેઠક બાદ આ નિર્ણય લેવામાં આવ્યો હતો.
આની જાહેરાત કરતા દિલ્હીના શિક્ષણ મંત્રી મનીષ સિસોદિયાએ કહ્યું કે છઠ જાહેરમાં મનાવી શકાય છે, પરંતુ કોરોના નિયમોની સાથે. તેમણે કહ્યું કે 1 નવેમ્બરથી દિલ્હીમાં તમામ શાળાઓ ખોલવામાં આવશે. તમામ વર્ગના બાળકો માટે શાળાઓ ખોલી શકાય છે.
સિસોદિયાએ વધુમાં જણાવ્યું હતું કે, જ્યારે શાળા ખુલશે ત્યારે કોઈપણ વાલીને તેમના બાળકને શાળાએ મોકલવા માટે ફરજ પાડવામાં આવશે નહીં. આ સાથે, અભ્યાસ મિશ્રિત મોડમાં હશે, એટલે કે, ઓફલાઈન અને ઑનલાઇન બંને એકસાથે ચાલી શકશે. તેમણે વધુમાં જણાવ્યું હતું કે એક સાથે 50 ટકાથી વધુ બાળકોને બોલાવવામાં આવશે નહીં. શાળા ખાતરી કરશે કે તેના તમામ સ્ટાફને રસી આપવામાં આવી છે. 98% લોકોએ પહેલો ડોઝ લઈ લીધો હોવો જોઈએ.
આ પહેલા દિલ્હીમાં ધોરણ 9 થી 12 સુધી શાળાઓ ખોલવામાં આવી છે. આ શાળાઓમાં પરીક્ષાઓ કોવિડ -19 માર્ગદર્શિકા અને સામાજિક અંતર સાથે લેવામાં આવી રહી છે. શાળાઓમાં બાળકો માસ્ક પહેરીને શાળાએ આવી રહ્યા છે. જો કે, કોઈપણ વિદ્યાર્થીને ફરજીયાતપણે શાળાએ બોલાવવાની મનાઈ છે. સંમતિ પત્ર એટલે કે વાલીઓની લેખિત સંમતિ પછી જ તેમને શાળામાં આવવાની મંજૂરી આપવામાં આવે છે.
તમને જણાવી દઈએ કે ડીડીએમએનો અગાઉનો આદેશ 30 સપ્ટેમ્બર સુધીનો હતો. ગત ઓગસ્ટમાં દિલ્હી ડિઝાસ્ટર મેનેજમેન્ટ વિભાગે બેઠકમાં જુદા જુદા તબક્કામાં શાળાઓ ખોલવાનો નિર્ણય લીધો હતો. નાયબ મુખ્યમંત્રી મનીષ સિસોદિયાએ જાહેરાત કરી હતી કે ધોરણ 9 થી 12 સુધીની શાળાઓ 01 સપ્ટેમ્બરથી અને ધોરણ 6 થી 8 માટે 8 સપ્ટેમ્બરથી ખુલશે.