ધારાવીની ઝૂંપડપટ્ટીમાં રહેતા જે વ્યક્તિનું મોત થયું છે તેના ઘરની આસપાસના વિસ્તારને સીલ કરીને ત્યાં સફાઈ કામગીરી શરૂ કરી દેવામાં આવી છે. આ ઉપરાંત દવાનો છંટકાવ પણ તંત્રએ શરૂ કરી દીધો છે. કારણકે ધારાવીની ઝૂંપડપટ્ટીમાં 10 લાખથી વધારે લોકો રહે છે અને તેમનામાં સંક્રમણ ન ફેલાય તે માટે આ અગમચેતીના ભાગરૂપે સાફ સફાઈ શરૂ કરી દેવામાં આવી છે.
ધારાવી ઝૂંપડપટ્ટી આશરે 613 હેક્ટરમાં ફેલાયેલી છે. અહીંયા મોટા ભાગે દાડિયા મજૂરો અને નાના કારોબારીઓ છે. આ વિસ્તારમાં આશરે 22 હજારથી વધારે લોકો નાનો કારોબાર કરે છે, જેમનું દૈનિક ટર્નઓવર 8થી10 કરોડ રૂપિયા હોવાનું કહેવાય છે. આ વિસ્તારમાં એક ઝૂંપડાની કિંમત પણ લાખો રૂપિયામાં છે.
1862માં અગ્રેજોએ તેમના ભવનોના નિર્માણ માટે અને અન્ય કામ માટે મજૂર વર્ગના લોકોને અહીં વસાવ્યા હતા અને ત્યારથી અહીંની સાંકડી ગલીઓ આ મજૂરોની ઓળખ બની ગઈ હતી. ધારાવીને મુંબઈનું ગુનાખોરીનું સેન્ટર માનવામાં આવે છે.