NEET પેપર લીક મામલે વિરોધ યથાવત્: 26 દિવસનું અનિશ્ચિતકાલીન અનશન પૂર્ણ કર્યા બાદ પણ CJP (Campaign for Justice and Progress) પોતાના મુખ્ય મુદ્દા પરથી પાછળ હટ્યું નથી. CJPના સ્થાપક અભિજીત દીપકે અને પ્રવક્તા દીપક બાલિયાને ફરી એકવાર કેન્દ્રીય શિક્ષણમંત્રી ધર્મેન્દ્ર પ્રધાનના રાજીનામાની માંગ ઉઠાવી છે.
સોનમ વાંગચુકે સરકાર તરફથી મળેલા આશ્વાસન બાદ પોતાનું અનશન સમાપ્ત કર્યું હતું. અનશન પૂર્ણ થાય તે પહેલાં CJPના સ્થાપક અભિજીત દીપકેએ પણ તેમને અનશન સમાપ્ત કરવાની અપીલ કરી હતી. જોકે, ત્યારબાદ તેમણે સોશિયલ મીડિયા પ્લેટફોર્મ X પર પોસ્ટ કરીને લખ્યું કે, "ધર્મેન્દ્ર પ્રધાનનું રાજીનામું જોઈએ."
'વિદ્યાર્થીઓની સૌથી મોટી માંગ ધર્મેન્દ્ર પ્રધાનનું રાજીનામું'
PTIને આપેલા ઇન્ટરવ્યૂમાં CJPના પ્રવક્તા દીપક બાલિયાનએ જણાવ્યું કે વિરોધ કરી રહેલા વિદ્યાર્થીઓની સૌથી મહત્વપૂર્ણ માંગ કેન્દ્રીય શિક્ષણમંત્રી ધર્મેન્દ્ર પ્રધાનનું રાજીનામું છે.
તેમણે કહ્યું કે શિક્ષણમંત્રીના રાજીનામા બાદ જ જવાબદારી નક્કી થઈ શકશે. તેમના દાવા મુજબ, શિક્ષણ મંત્રાલયના કાર્યકાળ દરમિયાન થયેલી કથિત નિષ્ફળતાઓના કારણે 20 વિદ્યાર્થીઓના મોત થયા છે.
દીપક બાલિયાનએ જણાવ્યું કે દેશભરના વિદ્યાર્થીઓ વિરોધ પ્રદર્શન કરી રહ્યા છે અને તેઓ ભારે નારાજ, ચિંતિત અને નિરાશ છે.
આ પણ વાંચો: સોનમ વાંગચુકે 26 દિવસ પછી તોડ્યા ઉપવાસ, જાણો વડાપ્રધાન મોદીને શું કરી અપીલ?
સોનમ વાંગચુક અંગે શું કહ્યું?
દીપક બાલિયાનએ જણાવ્યું કે, ઘણા વિદ્યાર્થીઓ અને તેમના પરિવારજનો અભ્યાસ માટે લોન લે છે. વર્ષો સુધી મહેનત કરીને સ્પર્ધાત્મક પરીક્ષાની તૈયારી કર્યા બાદ જો પ્રશ્નપત્ર લીક થઈ જાય તો તેમની મહેનત વ્યર્થ જાય છે અને તેઓ માનસિક તણાવનો સામનો કરે છે.
તેમણે કહ્યું કે વિદ્યાર્થીઓ ઇચ્છે છે કે, ધર્મેન્દ્ર પ્રધાન રાજીનામું આપે જેથી જવાબદારી નક્કી થઈ શકે અને શિક્ષણ વ્યવસ્થામાં જરૂરી સુધારા લાવી શકાય.
સાથે જ તેમણે સોનમ વાંગચુક સાથે સન્માનજનક વર્તન ન કરવામાં આવ્યું હોવાનો આરોપ લગાવ્યો. તેમના કહેવા મુજબ, વાંગચુકને પડદા પાછળથી લઈ જવામાં આવ્યા હતા, જે યોગ્ય નહોતું.
વિદ્યાર્થીઓ પર પોલીસ કાર્યવાહીનો પણ ઉલ્લેખ
દીપક બાલિયાનએ 20 જુલાઈએ વિદ્યાર્થીઓ પર થયેલી પોલીસ કાર્યવાહીની પણ ટીકા કરી. તેમણે પ્રશ્ન કર્યો કે શું આ મુદ્દે વડાપ્રધાન કોઈ નિવેદન આપશે?
તેમણે જણાવ્યું કે, વડાપ્રધાને દોષિતો સામે ફાસ્ટ-ટ્રેક કોર્ટમાં કેસ ચલાવી ઝડપી સજા આપવાની વાત કરી છે. જો સરકાર ખરેખર કડક કાર્યવાહી કરવા તૈયાર છે, તો પછી શિક્ષણમંત્રીના રાજીનામાની માંગ પર ચર્ચા કેમ કરવામાં આવી રહી નથી?
CJPનું કહેવું છે કે, વિદ્યાર્થીઓની માંગણીઓને ગંભીરતાથી સાંભળવી જોઈએ અને દેશની શિક્ષણ વ્યવસ્થામાં સુધારા માટે અસરકારક અને કડક પગલાં ભરવા જોઈએ.