Eknath Shinde statement: મહારાષ્ટ્રમાં સ્થાનિક સ્વરાજ્યની ચૂંટણીઓના બરાબર પહેલા નાયબ મુખ્યમંત્રી એકનાથ શિંદેના એક નિવેદને રાજકીય ગરમાવો લાવી દીધો છે. પત્રકારો સાથે વાત કરતા શિંદેએ નિખાલસતાથી સ્વીકાર્યું હતું કે ભૂતકાળમાં તેમણે વર્તમાન મુખ્યમંત્રી દેવેન્દ્ર ફડણવીસ વિરુદ્ધ આરોપો લગાવ્યા હતા અને સામે પક્ષે પણ વળતા પ્રહારો થયા હતા. જોકે, તેમણે સ્પષ્ટતા કરી છે કે વર્તમાન ચૂંટણીઓ સ્થાનિક કાર્યકરો અને સ્થાનિક મુદ્દાઓ પર લડાઈ રહી છે, તેથી તેમાં મોટા રાજકીય વિવાદોને સ્થાન નથી. 2 ડિસેમ્બરે યોજાનારા મતદાન પહેલા આ નિવેદન ગઠબંધનના આંતરિક સમીકરણો તરફ ઈશારો કરે છે.
"આરોપ-પ્રત્યારોપ થયા હતા, પણ આ ચૂંટણી અલગ છે"
મહારાષ્ટ્રમાં નાગરિક ચૂંટણીઓ વચ્ચે એકનાથ શિંદેએ ભૂતકાળના વિવાદો પર મૌન તોડ્યું હતું. તેમણે કહ્યું, "એ વાત સાચી છે કે મેં મુખ્યમંત્રી (ફડણવીસ) વિરુદ્ધ આરોપો લગાવ્યા હતા અને તેમણે મારી વિરુદ્ધ પણ નિવેદનો આપ્યા હતા. પરંતુ આપણે એ સમજવું પડશે કે આ સ્થાનિક સ્વરાજ્યની ચૂંટણીઓ છે." શિંદેએ ભારપૂર્વક જણાવ્યું કે આ ચૂંટણીઓ પાયાના કાર્યકરો દ્વારા લડવામાં આવે છે અને અહીં ગટર, પાણી અને રસ્તા જેવા સ્થાનિક મુદ્દાઓ મહત્વના હોય છે. અહીં રાષ્ટ્રીય કે રાજ્ય સ્તરના મોટા રાજકીય મુદ્દાઓ ઉઠાવવાની કોઈ જરૂર નથી. જોકે, કાર્યકરોનો ઉત્સાહ વધારવા માટે વરિષ્ઠ નેતૃત્વ પ્રચારમાં જોડાયું છે.
વિકાસ પ્રાથમિકતા, ભવ્ય ભાષણો નહીં
શિવસેનાના વડાએ વધુમાં ઉમેર્યું કે, સ્થાનિક ચૂંટણીઓમાં ભવ્ય રાજકીય ભાષણો કરતા વિકાસના કામો વધુ મહત્વના છે. કાર્યકરોને તેમના નેતાઓનો સાથ મળે તે જરૂરી છે, પરંતુ અમારું ફોકસ માત્ર વિકાસ પર છે. ઉલ્લેખનીય છે કે, ચૂંટણી પંચે કેટલાક વિસ્તારોમાં ચૂંટણી મુલતવી રાખી છે, જે એક દુર્લભ ઘટના ગણવામાં આવી રહી છે.
2 ડિસેમ્બરે લોકશાહીનો ઉત્સવ: શું છે તૈયારી?
આવતીકાલે એટલે કે 2 ડિસેમ્બરના રોજ મહારાષ્ટ્રમાં સ્થાનિક સ્વરાજ્યની ચૂંટણીનો પ્રથમ અને મહત્વપૂર્ણ તબક્કો યોજાશે. આમાં કુલ 246 નગર પરિષદો અને 42 નગર પંચાયતો માટે મતદાન પ્રક્રિયા હાથ ધરવામાં આવશે. સુપ્રીમ કોર્ટના આદેશ બાદ આ ત્રિ-સ્તરીય પ્રક્રિયા શરૂ થઈ છે. આ ચૂંટણી માટેનો પ્રચાર 1 ડિસેમ્બરે રાત્રે 10 વાગ્યે પૂર્ણ થઈ ગયો છે.
વિધાનસભાની જીત બાદ મહાયુતિની અગ્નિપરીક્ષા
રાજકીય પંડિતો માટે આ ચૂંટણીના પરિણામો ખૂબ જ મહત્વપૂર્ણ છે. નવેમ્બર 2024 ની વિધાનસભા ચૂંટણીમાં ભાજપની આગેવાની હેઠળના મહાયુતિ ગઠબંધને 288 માંથી 235 બેઠકો જીતીને પ્રચંડ જનાદેશ મેળવ્યો હતો. હવે આ સ્થાનિક ચૂંટણીઓ નક્કી કરશે કે શું આ જીતનો સિલસિલો છેવાડાના ગામડાઓ અને શહેરો સુધી કાયમ રહેશે કે કેમ? બીજી તરફ, વિપક્ષ માટે મ્યુનિસિપલ સ્તરે પોતાની પકડ મજબૂત કરવાની આ છેલ્લી તક છે. આ ચૂંટણીઓના પરિણામો 3 ડિસેમ્બરના રોજ જાહેર થશે.