Parliament Winter Session:મલ્લિકાર્જુન ખડગેએ રાજ્યસભાના અધ્યક્ષ સી.પી. રાધાકૃષ્ણનનું સ્વાગત કરતા કહ્યું કે, તમારે ફક્ત એક જ બાજુ ન જોવી જોઈએ. તેમણે ભાજપ પર પણ કટાક્ષ કર્યો.
સંસદનું શિયાળુ સત્ર શરૂ થઈ ગયું છે. તે સોમવાર ૧ ડિસેમ્બર થી શરૂ થયું છે અને 19 ડિસેમ્બર સુધી ચાલુ રહેશે. સત્રની શરૂઆતમાં, વડા પ્રધાન નરેન્દ્ર મોદીએ રાજ્યસભાના અધ્યક્ષ સી.પી. રાધાકૃષ્ણનનું ખાસ રીતે સ્વાગત કર્યું. કોંગ્રેસ પ્રમુખ મલ્લિકાર્જુન ખડગેએ પણ તેમને સંબોધન કર્યું. સત્ર દરમિયાન, ખડગેએ ભારતીય જનતા પાર્ટી અને પીએમ મોદી પર નિશાન સાધ્યું. તેમણે અધ્યક્ષ રાધાકૃષ્ણનને એક ખાસ સલાહ પણ આપી.
શાસક પક્ષનો ઉલ્લેખ કરતા, ખડગેએ કહ્યું, "મને આશા છે કે, તમે બંને પક્ષોને સમાન રીતે વિચારશો. તમે બંને પક્ષો પર સમાન ધ્યાન આપશો. જો તમે તમારી બેઠક પરથી આ બાજુ વધુ જુઓ તો ખતરો છે, અને જો તમે અહીં ન જુઓ તો પણ ખતરો છે. તેથી, જો તમે બંને પક્ષે સંતુલન જાળવી રાખો તો સારું રહેશે. હું તમારા કાર્યકાળને સફળ બનાવવા માટે શુભેચ્છા પાઠવું છું."
ખડગેએ ધનખડ વિશે શું કહ્યું
ભૂતપૂર્વ ઉપરાષ્ટ્રપતિ જગદીપ ધનખડનો ઉલ્લેખ કરતા ખડગેએ કહ્યું, "મને ખૂબ જ દુઃખ છે કે, ભૂતપૂર્વ ચેરમેનને વિદાય આપવાની તક મળી નથી, પરંતુ અમને આશા છે કે અમારા ભૂતપૂર્વ ચેરમેન સારા સ્વાસ્થ્યમાં છે." ખડગેના પ્રતિભાવ બાદ, ભાજપે વિરોધ કર્યો. કેન્દ્રીય મંત્રી કિરેન રિજિજુએ કહ્યું, "ખડગેજીએ કંઈક ઉલ્લેખ કર્યો હતો, પરંતુ તેમણે તે યોગ્ય રીતે કર્યું નથી."
કોંગ્રેસ પ્રમુખે પીએમ મોદી પર વળતો પ્રહાર કર્યો
ખડગેએ વડા પ્રધાન નરેન્દ્ર મોદી પર પણ વળતો પ્રહાર કર્યો. તેમણે કહ્યું કે શિયાળુ સત્રના પહેલા દિવસે, વડા પ્રધાને સંસદ સમક્ષ મુખ્ય મુદ્દાઓને સંબોધવાને બદલે ફરી એકવાર "નાટક"નો આશરો લીધો હતો. તેમણે એમ પણ કહ્યું કે ભારતીય જનતા પાર્ટી (ભાજપ) એ હવે પોતાની દિશાવિહીન યુક્તિઓ બંધ કરવી જોઈએ અને સંસદમાં લોકોના વાસ્તવિક મુદ્દાઓ પર ચર્ચા કરવી જોઈએ.
પ્રધાનમંત્રી મોદીએ વિપક્ષ પર નિશાન સાધતા આરોપ લગાવ્યો કે, તેઓ ચૂંટણીમાં હાર બાદ પોતાની હતાશા વ્યક્ત કરવા માટે સંસદનો ઉપયોગ કરી રહ્યા છે. તેમણે આ સત્ર રાજકીય થિયેટર ન બને, પરંતુ રચનાત્મક અને પરિણામલક્ષી ચર્ચાનું માધ્યમ બને તે માટે વિનંતી કરી.