- અમેરિકાના નેશનલ ઇન્ટેલિજન્સ ડિરેક્ટર તુલસી ગબાર્ડે EVM હેક થઈ શકે તેવો દાવો કર્યો હતો અને પેપર બેલેટના ઉપયોગની હિમાયત કરી હતી.
- ભારતના ચૂંટણી પંચે આ દાવાને સ્પષ્ટપણે નકારી કાઢ્યો છે અને જણાવ્યું છે કે ભારતમાં વપરાતા EVMને હેક કરવું શક્ય નથી.
- ચૂંટણી પંચે સ્પષ્ટતા કરી છે કે ભારતીય EVM અમેરિકામાં વપરાતા EVMથી અલગ છે, તેને ઇન્ટરનેટ કે નેટવર્ક સાથે કનેક્ટ કરી શકાતા નથી.
- ચૂંટણી પંચે ભારપૂર્વક જણાવ્યું છે કે ભારતના EVM એક સરળ અને સચોટ કેલ્ક્યુલેટરની જેમ કામ કરે છે અને સુપ્રીમ કોર્ટ દ્વારા પણ તેને સુરક્ષિત ગણવામાં આવ્યા છે.
- ચૂંટણી પહેલા રાજકીય પક્ષોની હાજરીમાં મોક પોલ અને VVPAT સ્લિપની ચકાસણી કરવામાં આવે છે, જેમાં આજ સુધી કોઈ ગેરરીતિ જોવા મળી નથી, જે ભારતીય EVM સિસ્ટમની સુરક્ષા સાબિત કરે છે.
Tulsi Gabbard EVM hack: અમેરિકાના નેશનલ ઇન્ટેલિજન્સ ડિરેક્ટર તુલસી ગબાર્ડે તાજેતરમાં ઈલેક્ટ્રોનિક વોટિંગ મશીન (EVM) અંગે એક નિવેદન આપ્યું હતું, જેમાં તેમણે ચૂંટણીમાં વપરાતા EVMને હેક કરી શકાય છે તેવો દાવો કર્યો હતો. તેમના આ દાવા પર ભારતના ચૂંટણી પંચે સ્પષ્ટતા કરી છે અને જણાવ્યું છે કે ભારતમાં ઉપયોગમાં લેવાતા EVMને હેક કરવું શક્ય નથી.
ચૂંટણી પંચના સૂત્રોના જણાવ્યા અનુસાર, તુલસી ગબાર્ડે જે વાત કરી છે તે ભારતમાં ઉપયોગમાં લેવાતા ઈલેક્ટ્રોનિક વોટિંગ મશીનોને લાગુ પડતી નથી. ગબાર્ડે કહ્યું હતું કે કેબિનેટને એવા પુરાવા મળ્યા છે કે આ ઈલેક્ટ્રોનિક વોટિંગ સિસ્ટમ લાંબા સમયથી હેકર્સ માટે સંવેદનશીલ છે અને તેના દ્વારા મત પરિણામો સાથે છેડછાડ થઈ શકે છે. તેમણે અમેરિકામાં ફરીથી પેપર બેલેટનો ઉપયોગ ફરજિયાત બનાવવાની હિમાયત કરી હતી.
જો કે, ભારતીય ચૂંટણી પંચના સૂત્રોએ જણાવ્યું હતું કે ભારતમાં ઉપયોગમાં લેવાતા EVM અમેરિકા અને અન્ય કેટલાક દેશોમાં ઉપયોગમાં લેવાતા EVM કરતાં તદ્દન અલગ છે. ભારતમાં વપરાતા EVMને ઇન્ટરનેટની જરૂર હોતી નથી અને તેને કોઈપણ નેટવર્ક કે વાઈફાઈથી પણ કનેક્ટ કરી શકાતા નથી. ચૂંટણી પંચે ભારપૂર્વક જણાવ્યું છે કે EVM એક સરળ, સાચા અને સચોટ કેલ્ક્યુલેટરની જેમ કામ કરે છે.
ભારતીય ચૂંટણી પંચ
ચૂંટણી પંચે વધુમાં જણાવ્યું હતું કે ભારતમાં ઉપયોગમાં લેવાતા EVMને દેશની સર્વોચ્ચ અદાલત દ્વારા પણ સલામત ગણવામાં આવ્યા છે. વિવિધ રાજકીય પક્ષો દ્વારા પણ અનેક વખત તેની ચકાસણી કરવામાં આવી છે. ચૂંટણી શરૂ થાય તે પહેલા રાજકીય પક્ષો દ્વારા નિયુક્ત કરાયેલા પોલિંગ એજન્ટોની સામે મોક પોલ પણ કરાવવામાં આવે છે, જેમાં તમામ પક્ષોના એજન્ટો મશીનની યોગ્ય કામગીરીનું નિરીક્ષણ કરે છે. કમિશનના સૂત્રો અનુસાર, પાંચ કરોડથી વધુ VVPAT સ્લિપની ગણતરી દરમિયાન રાજકીય પક્ષોની હાજરીમાં તેની ખરાઈ કરવામાં આવી હતી અને આજ સુધી તેમાં કોઈ ગેરરીતિ જોવા મળી નથી. આ તમામ બાબતો સ્પષ્ટ કરે છે કે ભારતીય EVM સિસ્ટમ અત્યંત સુરક્ષિત છે અને તેને હેક કરવું શક્ય નથી.