Maharashtra News: મહારાષ્ટ્રના એક ગામમાં ચાર દાયકાથી વધુ સમયથી એક અનોખો ગણેશ ઉત્સવ ઉજવવામાં આવે છે, જેમાં એક મસ્જિદમાં ગણપતિ બાપ્પાની મૂર્તિ સ્થાપિત કરવામાં આવે છે. સ્થાનિક ગણેશ મંડળના સ્થાપક અશોક પાટીલે પીટીઆઈને જણાવ્યું હતું કે, અન્યત્ર ધાર્મિક તણાવની અસર સાંગલી જિલ્લાના ગોટખીંડી ગામના રહેવાસીઓને ક્યારેય થઈ નથી.
તેમણે કહ્યું કે, ગામમાં લગભગ 15,000 લોકોની વસ્તી છે, જેમાં મુસ્લિમ સમુદાયના 100 પરિવારોનો સમાવેશ થાય છે. મુસ્લિમો પણ મંડળના સભ્યો છે. તેઓ 'પ્રસાદ' બનાવવામાં, પૂજા કરવામાં અને તહેવારની તૈયારીમાં મદદ કરે છે.
આ પરંપરા 1980માં શરૂ થઈ હતી
પાટીલે જણાવ્યું હતું કે, આ પરંપરા 1980માં શરૂ થઈ હતી જ્યારે હિન્દુ અને મુસ્લિમ સમુદાયના સભ્યોએ ભારે વરસાદને કારણે સાંગલી જિલ્લાના ગોટખીંડી ગામમાં ગણપતિની મૂર્તિ મસ્જિદમાં લઈ જવાનું નક્કી કર્યું હતું.
પાટીલે જણાવ્યું હતું કે ત્યારથી આ પરંપરા શાંતિપૂર્ણ રીતે ચાલુ છે અને મુસ્લિમ સમુદાયે તેમાં સક્રિયપણે ભાગ લીધો છે. ગામના ઝુંઝર ચોક ખાતે 'નવું ગણેશ તરુણ મંડળ' 1980માં સ્થાપિત કરવામાં આવ્યું હતું. આ મૂર્તિને ૧૦ દિવસની ઉજવણી માટે મસ્જિદમાં રાખવામાં આવે છે અને પછી અનંત ચતુર્દશીના દિવસે તહેવારના સમાપન સમયે સ્થાનિક જળાશયમાં વિસર્જન કરવામાં આવે છે.
મુસ્લિમો ગણેશ ચતુર્થી પર બલિદાન આપવાનું ટાળે છે
પાટીલે કહ્યું કે બકરી ઇદ અને ગણેશ ચતુર્થી એક સાથે આવી ગયા પછી, મુસ્લિમો ફક્ત નમાજ અદા કરીને અને 'બલિદાન' ન આપીને તેમનો તહેવાર ઉજવે છે. તેમણે કહ્યું કે તેઓ હિન્દુ તહેવારો દરમિયાન પણ માંસ ખાવાનું ટાળે છે.
તેમણે કહ્યું કે આખા દેશે અહીં સામાજિક અને ધાર્મિક સૌહાર્દના વાતાવરણમાંથી પ્રેરણા લેવી જોઈએ. પાટીલે કહ્યું કે, દર વર્ષે સ્થાનિક પોલીસ અને તાલુકા વિકાસ અધિકારીને ગણેશ મૂર્તિની 'પ્રાણ પ્રતિષ્ઠા' માટે આમંત્રિત કરવામાં આવે છે. આ વર્ષે 10 દિવસનો ગણેશ ઉત્સવ 27 ઓગસ્ટથી શરૂ થયો હતો.