ભારતમાં પ્રવેશવા, દેશમાં રહેવા અથવા દેશ છોડવા માટે નકલી પાસપોર્ટ અથવા વીઝાનો ઉપયોગ કરનાર કોઈપણ વ્યક્તિને હવે સાત વર્ષ સુધીની જેલ અને 10 લાખ રૂપિયા સુધીના દંડની સજા થઈ શકે છે. સોમવારે વિદેશીઓ અને ઇમિગ્રેશન સંબંધિત બાબતોનું નિયમન કરતો એક નવો કાયદો અમલમાં આવ્યો હતો.
તેમાં નકલી પાસપોર્ટ અથવા નકલી વીઝાના ઉપયોગ માટે કડક સજાની જોગવાઈ છે. ઇમિગ્રેશન અને વિદેશી અધિનિયમ, 2025 સંસદ દ્વારા બજેટ સત્ર દરમિયાન પસાર કરવામાં આવ્યો હતો અને રાષ્ટ્રપતિ દ્રૌપદી મુર્મુએ 4 એપ્રિલ, 2025ના રોજ તેને મંજૂરી આપી હતી.
વિદેશીઓની માહિતી આપવી પડશે
ગૃહ મંત્રાલયના એડિશનલ સચિવ, નિતેશ કુમાર વ્યાસે 1 સપ્ટેમ્બર, 2025થી કાયદાની જોગવાઈઓ લાગુ થવાની તારીખ નક્કી કરતું એક નોટિફિકેશન જાહેર કર્યું હતું. જો કે, આ કાયદામાં હોટલ, યુનિવર્સિટીઓ અને અન્ય શૈક્ષણિક સંસ્થાઓ, હોસ્પિટલો અને નર્સિંગ હોમ દ્વારા વિદેશીઓ વિશેની માહિતી ફરજિયાત રીતે આપવાની પણ જોગવાઈ છે જેથી નિર્ધારિત સમયગાળાથી વધુ સમય માટે રોકાતા વિદેશીઓ પર નજર રાખી શકાય.
બધી આંતરરાષ્ટ્રીય એરલાઇન્સ અને જહાજોએ ભારતના કોઈપણ બંદર કે સ્થળે મુસાફરો અને ક્રૂની યાદી અને કોઈપણ નાગરિક સત્તાવાળા અથવા ઇમિગ્રેશન અધિકારીને અગાઉથી માહિતી સબમિટ કરવી આવશ્યક છે.
અગાઉ બે વર્ષની જેલની જોગવાઈ હતી
કાયદા મુજબ, "જે કોઈ જાણી જોઈને ભારતમાં પ્રવેશવા, રહેવા અથવા બહાર નીકળવા માટે નકલી અથવા કપટથી મેળવેલા પાસપોર્ટ અથવા અન્ય મુસાફરી દસ્તાવેજ અથવા વીઝાનો ઉપયોગ કરે છે અથવા સપ્લાય કરે છે, તેને ઓછામાં ઓછા બે વર્ષની જેલની સજા થશે. તે સાત વર્ષ સુધી લંબાવી શકાય છે. ઉપરાંત એક લાખ રૂપિયાથી દસ લાખ રૂપિયા સુધીનો દંડ થઈ શકે છે. આ કાયદો કેન્દ્ર સરકારને તે સ્થળોને નિયંત્રિત કરવાનો અધિકાર આપે છે જ્યાં વિદેશી વારંવાર મુલાકાત લે છે. ઉપરાંત, તે ચોક્કસ સ્થળના માલિકને પરિસર બંધ કરવાનો, ચોક્કસ શરતો હેઠળ તેનો ઉપયોગ કરવાની મંજૂરી આપવાનો અથવા વિદેશીઓના બધા અથવા "નિર્દિષ્ટ વર્ગ" ને પ્રવેશ નકારવાનો અધિકાર આપે છે.
તે વિદેશીઓ અને ઇમિગ્રેશન સંબંધિત તમામ બાબતોનું નિયમન કરતો એક વ્યાપક કાયદો છે જે અત્યાર સુધી ચાર કાયદાઓ દ્વારા સંચાલિત થતો હતો - પાસપોર્ટ (ભારતમાં પ્રવેશ) અધિનિયમ, 1920; વિદેશીઓની નોંધણી અધિનિયમ, 1939; વિદેશીઓ અધિનિયમ, 1946; અને ઇમિગ્રેશન (કેરિયર્સ લાયબિલિટી) એક્ટ, 2000. આ બધા કાયદા રદ કરવામાં આવ્યા છે.