Weather Forecast: દેશભરમાં અત્યારે હવામાનમાં રોજ નવી વધઘટ જોવા મળી રહી છે. એક તરફ ભયંકર ઉનાળાની શરૂઆત થઈ ગઈ છે, તો બીજી તરફ અનેક રાજ્યોમાં કમોસમી વરસાદ અને વાવાઝોડાએ તબાહી મચાવી છે. ભારતીય હવામાન વિભાગ (IMD) ની આગાહી મુજબ, આવતીકાલે એટલે કે 19 એપ્રિલે દેશના 12 થી વધુ રાજ્યોમાં ભારે પવન અને વાવાઝોડા સાથે વરસાદ પડવાની સંભાવના છે. જ્યારે ઉત્તર પ્રદેશ, રાજસ્થાન, મધ્યપ્રદેશ અને છત્તીસગઢ સહિત 6 રાજ્યોમાં હિટવેવ (ભારે ગરમીનું મોજું) આવવાની આગાહી કરવામાં આવી છે. શુક્રવારે રાત્રે દિલ્હી અને તેની આસપાસના વિસ્તારોમાં પણ વાવાઝોડા સાથે વરસાદ ખાબક્યો હતો, જેને પગલે હવામાન વિભાગે લોકોને ઘરની અંદર જ રહેવાની સલાહ આપી છે.
દિલ્હીમાં ઓરેન્જ એલર્ટ, ભારે પવન ફૂંકાશે
હવામાન વિભાગના જણાવ્યા મુજબ, દિલ્હીમાં પશ્ચિમથી પૂર્વ તરફ એક તીવ્ર વાવાઝોડું આગળ વધી રહ્યું છે. તેની અસરથી 40 થી 60 કિલોમીટર પ્રતિ કલાકની ઝડપે ભારે પવન ફૂંકાશે અને વીજળીના કડાકા સાથે મધ્યમ વરસાદ પડવાની ધારણા છે. આ સ્થિતિને જોતા હવામાન વિભાગે દિલ્હી માટે 'ઓરેન્જ એલર્ટ' જાહેર કર્યું છે.
આ રાજ્યોમાં રહેશે ભયંકર ગરમી (હીટવેવ)
આ અઠવાડિયે ભારતના પૂર્વ કિનારે હવામાન ગરમ અને ભેજવાળું રહેશે. નીચે મુજબના રાજ્યોમાં હીટવેવની આગાહી છે:
18 થી 20 એપ્રિલ: પૂર્વી ઉત્તર પ્રદેશના કેટલાક ભાગો
18 અને 19 એપ્રિલ: પૂર્વી મધ્ય પ્રદેશ, છત્તીસગઢ અને વિદર્ભ
19 થી 22 એપ્રિલ: પૂર્વી રાજસ્થાન અને ઓડિશા
20 અને 21 એપ્રિલ: ઝારખંડ
21 અને 22 એપ્રિલ: પશ્ચિમી રાજસ્થાન
ક્યાં પડશે ભારે વરસાદ અને બરફ?
પહાડી વિસ્તારો: 18 અને 19 એપ્રિલે જમ્મુ અને કાશ્મીર, લદ્દાખ, હિમાચલ પ્રદેશમાં 30 50 કિમી પ્રતિ કલાકની ઝડપે પવન અને વીજળી સાથે મધ્યમ વરસાદ કે બરફ પડી શકે છે. જમ્મુ અને કાશ્મીરમાં અમુક જગ્યાએ કરા પણ પડી શકે છે.
પૂર્વોત્તર રાજ્યો: અરુણાચલ પ્રદેશમાં 19 થી 21 એપ્રિલ, જ્યારે આસામ અને મેઘાલયમાં 18, 19 અને 21 એપ્રિલે ભારે વરસાદની ચેતવણી છે.
પંજાબ: અહીં અલગ અલગ સ્થળોએ ગાજવીજ અને તેજ પવન સાથે મધ્યમ વરસાદ પડી શકે છે.
પશ્ચિમ બંગાળ, ઓડિશા અને મધ્ય ભારતમાં વરસાદ
18 થી 22 એપ્રિલ દરમિયાન ઓડિશામાં અને 18 21 એપ્રિલ દરમિયાન પશ્ચિમ બંગાળ અને સિક્કિમમાં 30 50 કિમીની ઝડપે પવન ફૂંકાવા સાથે વરસાદની આગાહી છે.
મધ્ય ભારતમાં 19 20 એપ્રિલે પશ્ચિમ મધ્યપ્રદેશમાં, જ્યારે 18, 20 અને 21 એપ્રિલે છત્તીસગઢમાં હળવો વરસાદ પડી શકે છે.
દક્ષિણ ભારતમાં પણ વાવાઝોડાની અસર
18 થી 22 એપ્રિલ દરમિયાન આંતરિક કર્ણાટક, તેલંગાણા અને આંધ્રપ્રદેશના કેટલાક ભાગોમાં 30 50 કિમીની ઝડપે પવન અને વાવાઝોડા સાથે મધ્યમ વરસાદ થઈ શકે છે.
18 થી 21 એપ્રિલ સુધી ઉત્તરીય આંતરિક કર્ણાટકમાં કરા પડવાની શક્યતા છે.
મહારાષ્ટ્ર અને ગોવાનું હવામાન
18 થી 22 એપ્રિલ સુધી મધ્ય મહારાષ્ટ્ર અને મરાઠવાડામાં, જ્યારે 20 અને 21 એપ્રિલના રોજ કોંકણ અને ગોવામાં 30 40 કિમીની ઝડપે તેજ પવન સાથે હળવાથી મધ્યમ વરસાદની શક્યતા છે. 18 એપ્રિલે મરાઠવાડા વિસ્તારમાં છૂટાછવાયા કરા પડવાની પણ આગાહી છે.