New LPG Rules 2026: 1 જૂન, 2026 થી સરકાર રસોઈ ગેસ (LPG) કનેક્શનને લઈને ખૂબ જ કડક નિયમો લાગુ કરવા જઈ રહી છે. 'એક ઘર, એક કનેક્શન' નીતિનો મુખ્ય હેતુ ગેસનું સંગ્રહખોરી, કાળાબજાર અને સબસિડીનો દુરુપયોગ રોકવાનો છે. દેશમાં PNG (પાઇપલાઇન ગેસ) કનેક્શન ઝડપથી વધી રહ્યા છે, પરંતુ લોકો હજુ પણ સિલિન્ડર પર વધુ આધાર રાખે છે. આંકડા મુજબ, PNG ઝુંબેશ શરૂ થયા પછી માર્ચ સુધીમાં આશરે 6.5 લાખ નવા કનેક્શન અપાયા હતા, પરંતુ વાસ્તવિક ગેસ વપરાશમાં 18% નો ઘટાડો નોંધાયો હતો; એટલે કે ઘણા લોકોએ કનેક્શન તો લીધા પણ તેનો ઉપયોગ શરૂ કર્યો ન હતો. આ જ સમસ્યાઓને પહોંચી વળવા માટે સરકારે હવે એકસાથે ઘણા નિયમો બદલ્યા છે.
હવે ડ્યુઅલ કનેક્શન બિલકુલ નહીં ચાલે
સરકારે 'એક ઘર, એક કનેક્શન' નો નિયમ હવે એકદમ કડક બનાવી દીધો છે. જે લોકોના ઘરે પહેલેથી જ PNG ગેસની લાઈન છે, તેમણે હવે પોતાનું LPG સિલિન્ડર કનેક્શન ફરજિયાત પાછું આપવું પડશે. ઓઈલ કંપનીઓએ એવા ઘરોનું લિસ્ટ બનાવવાનું શરૂ કરી દીધું છે જ્યાં PNG અને LPG બંનેનો ઉપયોગ થઈ રહ્યો છે. જો તમારા વિસ્તારમાં PNG ની લાઈન આવી ગઈ છે અને તમે હજુ પણ સિલિન્ડર વાપરો છો, તો તમારું LPG કનેક્શન અસ્થાયી રૂપે સસ્પેન્ડ કે કાયમ માટે રદ થઈ શકે છે.
નવા નિયમ મુજબ આ ફેરફારો થશે:
એક સરનામું, એક કનેક્શન: એક જ સરનામે અથવા ઘરમાં હવે માત્ર એક જ એક્ટિવ ગેસ કનેક્શન રાખી શકાશે.
LPG અને PNG સાથે નહીં વાપરી શકાય: જે ઘરોમાં PNG કનેક્શન એક્ટિવ છે, તેઓ હવે એકસાથે બાટલાનો (LPG) ઉપયોગ નહીં કરી શકે.
કનેક્શન બ્લોક થઈ જશે: જો તમારા ઘરમાં બંને કનેક્શન છે, તો તમારે જાતે જ LPG સિલિન્ડર પરત કરવું પડશે. જો આમ નહીં કરો તો તેલ કંપનીઓ તમારું કનેક્શન બ્લોક કરી દેશે.
LPG કનેક્શન છોડનારાઓ માટે 'ટ્રાન્સફર વાઉચર' નો ફાયદો
જે ગ્રાહકો PNG અપનાવીને પોતાનું જૂનું LPG કનેક્શન રદ કરાવશે, તેમને ગેસ એજન્સી તરફથી એક 'ટ્રાન્સફર વાઉચર' આપવામાં આવશે. આ વાઉચરનો સૌથી મોટો ફાયદો એ છે કે, ભવિષ્યમાં જો તમારે નોકરી કે અન્ય કોઈ કારણસર એવી જગ્યાએ રહેવા જવું પડે જ્યાં PNG ની સુવિધા નથી, તો આ વાઉચરની મદદથી તમે કોઈપણ ઝંઝટ વગર જૂનું LPG કનેક્શન ફરીથી ચાલુ કરાવી શકશો.
આ પણ વાંચોઃ LPG Price Cut: શું હવે એલપીજી ગેસના ભાવ ઘટશે? ભારત અને અમેરિકા વચ્ચે થઈ ઐતિહાસિક ડીલ, જાણો વિગત
રિફિલિંગ અને ડિલિવરીના નવા કડક નિયમો
નવો લોક-ઇન સમયગાળો: સિલિન્ડરની અછત અને દુરુપયોગ રોકવા માટે ગેસ બુકિંગના દિવસો વધારી દેવાયા છે. શહેરી વિસ્તારોમાં હવે તમે 25 દિવસ પહેલાં બીજો સિલિન્ડર બુક નહીં કરાવી શકો (અગાઉ આ સમય 21 દિવસ હતો). જ્યારે ગ્રામીણ વિસ્તારો માટે આ સમયગાળો 45 દિવસનો નક્કી કરવામાં આવ્યો છે.
ડિલિવરી માટે OTP ફરજિયાત: હવે સિલિન્ડર લેતી વખતે માત્ર કાગળની પહોંચ બતાવવી પૂરતી નથી. તમે ગેસ બુક કરાવશો એટલે તમારા રજિસ્ટર્ડ મોબાઇલ નંબર પર એક 'ડિલિવરી ઓથેન્ટિકેશન કોડ' (OTP) આવશે. જ્યારે ડિલિવરી બોય સિલિન્ડર આપવા આવે, ત્યારે તેને આ કોડ આપવો ફરજિયાત છે. આનાથી ખોટા બુકિંગ અને ગેસ ચોરી અટકાવી શકાશે.
આ પણ વાંચોઃ ગૃહિણીઓનું બજેટ ખોરવાશેઃ પેટ્રોલ અને ડીઝલ બાદ હવે એલપીજી ગેસ પણ મોંઘો, સરકારે ભાવમાં ₹50નો વધારો કર્યો