New Year 2023 Celebration In Temples: નવા વર્ષ 2023ના પહેલા જ દિવસે મંદિરોમાં ભક્તોની ભીડ જોવા મળી હતી. મંદિરોમાં ભક્તોની લાંબી કતારો જોવા મળી હતી. આ દરમિયાન સેંકડો લોકો દેવી-દેવતાઓના દર્શન કરવા માટે કતારમાં ઉભેલા જોવા મળ્યા હતા. નવા વર્ષ પર, લોકોએ ભગવાનના દર્શ કર્યા અને આ વર્ષ વધુ સારું રહે તેવી શુભેચ્છાઓ માંગી.


જમ્મુના માતા વૈષ્ણો દેવી મંદિરથી લઈને ઓડિશાના પુરીના જગન્નાથ મંદિર સુધી નવા વર્ષમાં ભક્તોની ભારે ભીડ જોવા મળી હતી. મહારાષ્ટ્ર, ઓડિશા, તમિલનાડુ અને અન્ય રાજ્યોમાં મંદિરોમાં ભક્તોની લાંબી કતારો જોવા મળી હતી. 2023નો પહેલો સૂર્યોદય જોઈને લોકોએ સૂર્ય ભગવાનને પ્રાર્થના પણ કરી હતી.


જમ્મુ અને કાશ્મીર


નવા વર્ષ 2023ના પહેલા દિવસે સેંકડો ભક્તો જમ્મુના કટરામાં માતા વૈષ્ણો દેવીના મંદિરે પહોંચ્યા હતા. જેમણે આ વર્ષ વધુ સારું રહે તેવી શુભેચ્છાઓ માંગી હતી. માતા વૈષ્ણોદેવીના દર્શન માટે સવારથી જ ભક્તોની કતારો લાગી હતી.




 
મહારાષ્ટ્ર


2023 ના પ્રથમ દિવસે, સવારની આરતી જોવા અને ભગવાન ગણેશના આશીર્વાદ મેળવવા માટે વિશેષ પ્રાર્થના કરવા માટે ભક્તો મુંબઈના પ્રતિષ્ઠિત સિદ્ધિવિનાયક મંદિરમાં એકઠા થયા હતા. મુંબઈના સ્થાનિક લોકો ઉપરાંત દેશ-વિદેશના ભક્તો આ મંદિરના દર્શન કરવા આવે છે.




મધ્યપ્રદેશ


નવા વર્ષની પહેલી સવારે ઉજ્જૈનના મહાકાલેશ્વર મંદિરમાં ભગવાન મહાકાલની આરતીના દર્શન કરવા ભક્તો ઉમટી પડ્યા હતા. વહેલી સવારે મંદિરમાં ભગવાન શિવની ભસ્મ આરતી કરવામાં આવી હતી. એવું કહેવાય છે કે આ મંદિરમાં માત્ર શિવને જગાડવા માટે આરતી કરવામાં આવે છે.




ઉત્તર પ્રદેશ


વારાણસીના કાશી વિશ્વનાથ મંદિરમાં પ્રાર્થના કરવા માટે ભક્તોની મોટી ભીડ કતારમાં ઉભી જોવા મળી હતી. વારાણસીમાં અસ્સી ઘાટ પાસે વહેલી સવારે 'ગંગા આરતી' કરવામાં આવી હતી.




ઓડિશા


ઓડિશાના પુરીમાં સ્થિત ભગવાન જગન્નાથના મંદિરમાં સવારથી જ ભક્તોની ભારે ભીડ જોવા મળી હતી. અહીં લોકોએ વર્ષનો પ્રથમ સૂર્યોદય જોયો અને સૂર્ય ભગવાનની પ્રાર્થના પણ કરી. ANI અનુસાર, નવા વર્ષને આવકારવા માટે પ્રખ્યાત રેત કલાકાર સુદર્શન પટનાયકે પુરીના બીચ પર ભગવાન જગન્નાથનું 8 ફૂટ ઊંચું અને 15 ફૂટ લાંબુ રેતીનું શિલ્પ બનાવ્યું છે.




તમિલનાડુ


તમિલનાડુમાં મોટી સંખ્યામાં મંદિરો છે. રવિવાર એટલે કે 01 જાન્યુઆરી, 2023 ના રોજ, ભગવાન મુરુગનના દર્શન કરવા માટે ચેન્નાઈના વડાપલાની મુરુગન મંદિરમાં ભક્તોની વિશાળ ભીડ ઉમટી હતી. ચેન્નાઈના અન્ના નગર ચર્ચમાં પણ ભીડ જોવા મળી હતી. કોઈમ્બતુરના બેબી જીસસ ચર્ચમાં પણ પ્રાર્થના કરવામાં આવી હતી.