કર્ણાટકના એક કેસની સુનાવણી દરમિયાન સુપ્રીમ કોર્ટે દહેજ ઉત્પીડનને લઈને મોટી ટિપ્પણી કરી છે. કેસની સુનાવણી દરમિયાન જસ્ટિસ સંજીવ ખન્નાની અધ્યક્ષતાવાળી ખંડપીઠે કહ્યું હતુ કે, સાસરિયામાં છોકરી સાથે ખરાબ વ્યવહારના કેસને દહેજ ઉત્પીડન કહી શકાય નહીં. ખંડપીઠે કહ્યું હતું કે જો ફરિયાદીના લગ્ન જીવનમાં દખલગીરીના કોઈ ફિઝિકલ પુરાવા નથી તો આરોપીને IPCની કલમ 498A હેઠળ ક્રૂરતા માટે દોષી ઠેરવી શકાય નહીં. જસ્ટિસ સંજીવ ખન્નાએ તાજેતરના આદેશમાં આ સ્પષ્ટ કર્યુ હતું.
કોર્ટ કર્ણાટકની એક મહિલાની અપીલ પર સુનાવણી કરી રહી હતી, જેના પર તેની નવવિવાહિત ભાભીએ અપશબ્દોનો ઉપયોગ કરવાનો અને તેનો અંગત સામાન ડસ્ટબિનમાં ફેંકવાનો આરોપ મૂક્યો હતો. નોંધનીય છે કે કલમ 498A મુજબ, “જે કોઈ પણ સ્ત્રીનો પતિ અથવા તેના પતિના સંબંધી હોવાને કારણે આવી સ્ત્રી સાથે ક્રૂરતા કરશે તો તેને ત્રણ વર્ષ સુધીની કેદની સજા અને દંડ ફટકારવામાં આવે છે.
જો કે, બેન્ચને જાણવા મળ્યું કે આરોપી મહિલા તેની ભાભી સાથે એક જ ઘરમાં રહેતી નહોતી. વાસ્તવમાં મહિલા વિદેશમા રહેતી હતી. કોર્ટને જાણવા મળ્યું કે ભાઈની પત્નીએ મહિલા દ્વારા તેના પર કરવામાં આવેલી ક્રૂરતાની કોઈ ચોક્કસ વિગતો આપી નથી. બેન્ચે કહ્યું કે મહિલાના ભાઈએ 2022માં જ તેની પત્નીને છૂટાછેડા આપી દીધા હતા. તેમની ભાભીના તેમના પરના આક્ષેપો ખૂબ જ અસ્પષ્ટ અને સામાન્ય હતા.
કોર્ટે આદેશ આપ્યો હતો કે અમે અપીલકર્તાઓ વિરુદ્ધ ફોજદારી કાર્યવાહીને રદ કરીએ છીએ. જો કે, અમે સ્પષ્ટતા કરીએ છીએ કે પુરાવાના રેકોર્ડિંગ દરમિયાન જો કોઈ સામગ્રી રેકોર્ડ પર આવે છે તો તે ટ્રાયલ કોર્ટ માટે કાયદા મુજબ આગળ વધી શકે છે.