ઇસ્લામાબાદઃ વીજળી સંકટનો સામનો કરી રહેલા પાકિસ્તાનમાં સરકારે મોટો નિર્ણય લીધો છે. રિપોર્ટ અનુસાર, વીજળી બચાવવા માટે પાકિસ્તાન સરકારે દેશની રાજધાની ઇસ્લામાબાદમાં રાત્રે 10 વાગ્યા પછી લગ્ન સમારંભો પર પ્રતિબંધ મૂકવાનો નિર્દેશ આપ્યા છે. વીજળીનો વપરાશ ઘટાડવા માટે સરકારે અઠવાડિયાના તેના સત્તાવાર કામકાજના દિવસો પણ છથી ઘટાડીને ફરીથી પાંચ કર્યા છે.
પાવર કટોકટીના કારણે પાકિસ્તાનમાં કલાકો સુધી પાવર કટ થઈ રહ્યો છે. હવે સરકાર મોડી રાત સુધી ચાલતા લગ્ન સમારોહ પર પ્રતિબંધ મૂકીને વીજળી બચાવવાનો પ્રયાસ કરી રહી છે. અહેવાલો અનુસાર, ઈસ્લામાબાદમાં 8 જૂનથી રાત્રે 10 વાગ્યા પછી લગ્ન સમારંભો પર પ્રતિબંધ મૂકવામાં આવ્યો છે.
શાહબાઝ શરીફે સૂચના આપી હતી
વર્તમાન વીજ સંકટની અસર પાકિસ્તાનની અર્થવ્યવસ્થા પર પણ પડી છે. વીજળી બચાવવા માટે સરકારી કચેરીઓમાં શનિવારે રજા જાહેર કરવી પડી છે. પાકિસ્તાનની રાજધાનીમાં રાત્રે 10 વાગ્યા પછી લગ્ન સમારોહ પર પ્રતિબંધ વડાપ્રધાન શાહબાઝ શરીફના નિર્દેશ પર લાગુ કરવામાં આવી રહ્યો છે.
નિયમોના ભંગ બદલ કાર્યવાહી કરવામાં આવશે
આ નિયમનો અમલ કરવા માટે ઈસ્લામાબાદની પોલીસ અને પ્રશાસનને કડક સૂચના આપવામાં આવી છે. ઉલ્લંઘનના કિસ્સામાં ઈસ્લામાબાદ પ્રશાસન દ્વારા કડક કાર્યવાહી કરવામાં આવશે. હાલમાં ગરમીના કારણે પાકિસ્તાનમાં વીજળીની માંગ વધારે છે, પરંતુ વીજળીના અભાવને કારણે લાંબા સમય સુધી વીજ કાપ છે. જેના કારણે લોકો પરેશાન છે. પાકિસ્તાનમાં પણ ઈંધણના ભાવમાં વધારો થયો છે.
વીજળી બચાવવાનો પ્રયાસ કરો
સ્ટેટ બેંક ઓફ પાકિસ્તાન (SBP) અનુસાર, 6 મેના રોજ પૂરા થયેલા સપ્તાહ દરમિયાન પાકિસ્તાનના વિદેશી મુદ્રા ભંડારની સ્થિતિ ખૂબ જ ખરાબ છે. આ નિર્ણય લેતા પાકિસ્તાનના સૂચના મંત્રી મરિયમ ઔરંગઝેબે કહ્યું કે પાકિસ્તાન આ દિવસોમાં ગંભીર સંકટનો સામનો કરી રહ્યું છે. તેથી વીજળી બચાવવા માટે કેટલાક પગલાં ભરવા પડશે.