PM Modi: પ્રધાનમંત્રી નરેન્દ્ર મોદી ભારતમાં સૌથી લાંબા સમય સુધી સરકારના પ્રમુખ રહેનારા નેતા બની ગયા છે. ગુજરાતના મુખ્યમંત્રી અને પ્રધાનમંત્રી તરીકે સરકારના પ્રમુખ તરીકે 8,931 દિવસ પૂરા કરવાની સાથે જ PM મોદીએ ચામલિંગના 8,930 દિવસના રેકોર્ડને તોડી દીધો છે. તેમણે સિક્કિમના પૂર્વ મુખ્યમંત્રી પવન કુમાર ચામલિંગને પાછળ છોડી દીધા છે.
PM મોદી આ પહેલા ગુજરાતના સૌથી લાંબા સમય સુધી સેવા આપનારા મુખ્યમંત્રી રહી ચૂક્યા છે, અને તેઓ એવા પ્રધાનમંત્રી પણ છે જેમની પાસે મુખ્યમંત્રી તરીકે કામ કરવાનો સૌથી લાંબો અનુભવ છે.
મોદી 4 વાર ગુજરાતના મુખ્યમંત્રી, 3 વાર પ્રધાનમંત્રી બન્યા
17 સપ્ટેમ્બરે જન્મેલા નરેન્દ્ર મોદી 6 વર્ષની ઉંમરે જ કોંગ્રેસ તરફથી મહાગુજરાત આંદોલનનો ભાગ બન્યા હતા. ત્યારબાદ 8 વર્ષની ઉંમરે RSS સાથે જોડાઈ ગયા હતા. 7 ઓક્ટોબર 2001ના રોજ 51 વર્ષની ઉંમરે ધારાસભ્ય બન્યા વગર જ મોદી ગુજરાતના 14મા મુખ્યમંત્રી બન્યા હતા. 24 વર્ષોમાં 14 વર્ષ ગુજરાતના મુખ્યમંત્રી રહ્યા અને હવે ત્રીજી વખત દેશના પ્રધાનમંત્રી છે.
2025 માં મોદીએ પીએમ તરીકે ઈન્દિરા ગાંધીનો રેકોર્ડ તોડ્યો, પરંતુ નેહરુથી હજુ પણ પાછળ
નરેન્દ્ર મોદી ભારતના સતત સૌથી લાંબા સમય સુધી પ્રધાનમંત્રી રહેનારા બીજા PM પણ છે. તેઓ પૂર્વ પ્રધાનમંત્રી ઈન્દિરા ગાંધીના 4077 દિવસો (24 જાન્યુઆરી 1966 થી 24 માર્ચ 1977) નો રેકોર્ડ તોડી ચૂક્યા છે. 22 માર્ચ 2026 સુધી પ્રધાનમંત્રી તરીકે, નરેન્દ્ર મોદી 4318 દિવસ પૂરા કરી ચૂક્યા છે.
જોકે સૌથી લાંબા સમય સુધી સતત પ્રધાનમંત્રી રહેવાનો રેકોર્ડ જવાહરલાલ નેહરુના નામે છે. તેઓ 15 ઓગસ્ટ 1947 થી 27 મે 1964 સુધી એટલે કે સતત કુલ 6126 દિવસ સુધી આ પદ પર રહ્યા હતા. PM મોદી નેહરુના રેકોર્ડથી 1812 દિવસ પાછળ છે. રેકોર્ડ તોડવા માટે 2029 પછી પણ PM રહેવું પડશે.
પૂર્વ CM પવન કુમાર ચામલિંગનો રેકોર્ડ તોડ્યો
ભારતના સૌથી લાંબા સમય સુધી મુખ્યમંત્રી રહેવાનો રેકોર્ડ સિક્કિમના પૂર્વ CM પવન કુમાર ચામલિંગના નામે છે. તેમનો કાર્યકાળ 12 ડિસેમ્બર 1994 થી 26 મે 2019 સુધી રહ્યો હતો. એટલે કે તેઓ લગભગ 24 વર્ષ 165 દિવસ CM રહ્યા હતા. તેમણે CM જ્યોતિ બસુનો રેકોર્ડ તોડ્યો હતો. જ્યોતિ બસુ 23 વર્ષ CM રહ્યા હતા. તેમણે સતત 5 વાર ચૂંટણી જીતી હતી અને કોઈ પણ બ્રેક વગર આટલા લાંબા સમય સુધી સત્તામાં રહ્યા હતા.