સુપ્રીમ કોર્ટે 31 ઓગસ્ટના રોજ પોતાની અવમાનના મામલામાં વકીલ પ્રશાંત ભૂષણને એક રૂપિયાના દંડની સજા આપી હતી. કોર્ટે કહ્યું હતું કે, જો પ્રશાંત ભૂષણ આ દંડ 15 સપ્ટેમ્બર સુધી જમા નહી કરાવે તો તેઓને 3 મહિના સુધી જેલમાં મોકલવવામાં આવશે. ત્રણ વર્ષ સુધી વકીલાત પર પણ પ્રતિબંધ લગાવાશે.
27 જૂન અને 29 જૂનના રોજ પ્રશાંત ભૂષણે વર્તમાન ચીફ જસ્ટિસ અને 4 પૂર્વ ચીફ જસ્ટિસ પર બે વિવાદીત ટ્વિટ કર્યા હતા. કોર્ટે આ વાત પર સંજ્ઞાન લેતા તેમની પાસે જવાબ માંગ્યો હતો.
તેમણે નિવેદન પર સ્પષ્ટતા કરતા જે જવાબ દાખલ કર્યો તેમાં જજો પર વધુ આરોપ લગાવ્યા. કોર્ટે આ સ્પષ્ટીકરણને અસ્વીકાર કરતા 14 ઓગસ્ટના રોજ તેમને અવમાનના દોષિત ઠેરવ્યા હતા. કોર્ટે તેમને વિના શરત માફી માંગવા સમય આપ્યો પરંતુ ભૂષણે તેમ કરવાનો ઇનકાર કરી દીધો.