Raj Thackeray-Uddhav Thackeray Rally: મહારાષ્ટ્રના રાજકારણમાં 20 વર્ષ પહેલાં અલગ થયેલા બે ભાઈઓ, રાજ અને ઉદ્ધવ ઠાકરે, આજે (5 જુલાઈ) મરાઠી મુદ્દા પર એકસાથે જોવા મળશે. મહારાષ્ટ્રમાં છેલ્લા કેટલાક વર્ષોમાં ઘણા રાજકીય સમીકરણો જોવા મળ્યા છે. હવે બધાની નજર તેના પર છે કે શું ઠાકરે ભાઈઓનું અહીં ભેગા થવું એક નવા રાજકીય સમીકરણની શરૂઆત હશે.
રાજ અને ઉદ્ધવ ઠાકરેએ ત્રિભાષી સૂત્રના અમલીકરણનો સખત વિરોધ કર્યો હતો, ત્યારબાદ મહાયુતિ સરકારે એક પગલું પાછળ હટીને આ નિર્ણય હાલ પૂરતો મુલતવી રાખ્યો છે. આ પ્રસંગે, મરાઠી એકતાના વિજયની ઉજવણી માટે આજે સવારે 10 વાગ્યે વરલીના NSCI ડોમ ખાતે વિજય સભાનું આયોજન કરવામાં આવી રહ્યું છે.
રેલીમાં કોઈપણ પક્ષનો ધ્વજ ન લાવવાની અપીલ
આટલું જ નહીં, દરેક મરાઠી પ્રેમી, સાહિત્યકાર, લેખક, કવિ, શિક્ષક, સંપાદક અને કલાકારને આ ઉત્સવમાં ભાગ લેવા આમંત્રણ આપવામાં આવ્યું છે. ખાસ વાત એ છે કે આ સભામાં કોઈપણ પક્ષનો ધ્વજ ન લાવવાની અપીલ કરવામાં આવી છે અને તમામ પક્ષોના નેતાઓને મરાઠી ઓળખના મુદ્દા પર એક થવા માટે આહ્વાન કરવામાં આવ્યું છે.
વિજય સભાની રૂપરેખા શું હશે?
• રાજ ઠાકરે અને ઉદ્ધવ ઠાકરે સાથે સ્ટેજ પર ફક્ત ભાગ લેનારા પક્ષોના પ્રમુખો, વડાઓ અથવા પ્રદેશ વડાઓ જ હાજર રહેશે.
• વર્લી ડોમમાં લગભગ 7 થી 8 હજાર લોકો માટે બેસવાની વ્યવસ્થા છે.
• ડોમના હોલની અંદર, બહાર અને રસ્તા પર LED સ્ક્રીન લગાવવામાં આવી છે.
• વર્લી ડોમના ભોંયરામાં 800 વાહનો માટે પાર્કિંગ સુવિધા છે.
• વર્લી ડોમની સામે કોસ્ટલ રોડના પુલ નીચે ટુ-વ્હીલર માટે પાર્કિંગ સુવિધા છે.
• મહાલક્ષ્મી રેસકોર્સમાં બસો અને મોટા વાહનો માટે પાર્કિંગ સુવિધા છે.
ઉદ્ધવ અને રાજ ઠાકરેએ છેલ્લા 20 વર્ષમાં રાજકીય રીતે ઘણા ઉતાર-ચઢાવ જોયા છે. જોકે, આગામી મ્યુનિસિપલ ચૂંટણીઓ બંને માટે અસ્તિત્વની લડાઈ છે. તેથી, શાસક પક્ષ કહે છે કે આ એકતા મરાઠી માટે નહીં, પરંતુ મ્યુનિસિપલ ચૂંટણીઓ માટે છે.
રાજ-ઉદ્ધવ ઠાકરે ક્યારે ક્યારે ભેગા થયા?
• 17 જુલાઈ 2012: જ્યારે ઉદ્ધવ ઠાકરેને છાતીમાં દુખાવાને કારણે લીલાવતી હોસ્પિટલમાં દાખલ કરવામાં આવ્યા હતા.
• 10 જાન્યુઆરી 2015: જહાંગીર આર્ટ ગેલેરી ખાતે ઉદ્ધવ ઠાકરેના ફોટો પ્રદર્શનમાં રાજ ઠાકરેની હાજરી.
• 12 ડિસેમ્બર 2015: શરદ પવારના અમૃત મહોત્સવ જન્મદિવસમાં એક મંચ પર.
• 27 જાન્યુઆરી 201૯: રાજ ઠાકરેના પુત્ર અમિત ઠાકરેના લગ્નમાં ઉદ્ધવ ઠાકરેની હાજરી.
• 2૮ નવેમ્બર 2019: ઉદ્ધવ ઠાકરેના મુખ્યમંત્રી તરીકે શપથ ગ્રહણ સમારોહમાં રાજ ઠાકરેની હાજરી.
• 2૩ જાન્યુઆરી 2021: બાળા સાહેબની પૂર્ણ આકૃતિવાળી પ્રતિમાના અનાવરણ સમારોહમાં.
• 22 ડિસેમ્બર 2024: રાજ ઠાકરેની બહેન જયવંતી ઠાકરે-દેશપાંડેના પુત્રના લગ્નમાં.
• 24 ફેબ્રુઆરી 2025: એક સરકારી અધિકારીના પુત્રના લગ્નમાં.
હકીકતમાં, 2014 અને 2017માં શિવસેના અને મનસેના એકત્ર થવાની પ્રવૃત્તિઓ તેજ થઈ ગઈ હતી, પરંતુ કોણ કોને ટેકો આપશે તે નક્કી થઈ શક્યું ન હતું, અને મનસેએ આરોપ લગાવ્યો હતો કે ઉદ્ધવ ઠાકરે તરફથી કોઈ યોગ્ય પ્રતિભાવ મળ્યો નથી. પરંતુ બધાની નજર હાલના પ્રતિકૂળ સંજોગોમાં ઠાકરે બંધુઓનું રાજકીય અસ્તિત્વ ટકાવી રાખવા માટે રાજકીય સમાધાન થશે કે કેમ તેના પર છે.