Rajya Sabha: રાજ્યસભાની 56 બેઠકોમાંથી 41 બેઠકો પર ઉમેદવારો બિનહરીફ ચૂંટાયા છે. જેમાં સૌથી વધુ 20 ઉમેદવારો ભાજપના છે. કોંગ્રેસના 6 ઉમેદવારો, તૃણમૂલ કોંગ્રેસના 4, વાયએસઆર કોંગ્રેસના 3, આરજેડી અને બીજેડીના 2 અને એનસીપી, શિવસેના, બીઆરએસ અને જેડીયુના એક-એક ઉમેદવારો બિનહરીફ ચૂંટાયા હતા.
ગુજરાત ભાજપ પ્રમુખ જે.પી.નડ્ડા ઉપરાંત પક્ષના જસવંતસિંહ પરમાર, મયંક નાયક અને ગોવિંદભાઈ ધોળકિયા વિજેતા જાહેર થયા હતા. રાજસ્થાનમાંથી કોંગ્રેસના સોનિયા ગાંધી ઉપરાંત ભાજપમાંથી ચુન્નીલાલ ગરાસિયા અને મદન રાઠોડ બિનહરીફ ચૂંટાયા હતા. મહારાષ્ટ્રમાંથી ભાજપના મેધા કુલકર્ણી અને અજીત ઘોપછડે, શિવસેનાના મિલિંદ દેવરા, પ્રફુલ પટેલ (એનસીપી) અને ચંદ્રકાંત હંદોડે (કોંગ્રેસ) બિનહરીફ ચૂંટાયા હતા. ઉત્તરાખંડમાંથી ભાજપના ઉમેદવારો મહેન્દ્ર ભટ્ટ, હરિયાણામાંથી સુભાષ બરાલા, છત્તીસગઢમાંથી દેવેન્દ્ર પ્રતાપ સિંહ બિનહરીફ ચૂંટાયા હતા.
પશ્ચિમ બંગાળમાંથી તૃણમૂલ કોંગ્રેસના ઉમેદવારો સુષ્મિતા દેબ, સાગરિકા ઘોષ, મમતા ઠાકુર અને મોહમ્મદ નદીમુલ હક અને સમિક ભટ્ટાચાર્ય (બીજેપી)ને વિજેતા જાહેર કરવામાં આવ્યા હતા. મધ્યપ્રદેશના ભાજપના ઉમેદવાર કેન્દ્રીય મંત્રી ડો.એલ. મુરુગન, વાલ્મિકી ધામ આશ્રમના વડા ઉમેશ નાથ મહારાજ, કિસાન મોરચાના ઉપાધ્યક્ષ બંશીલાલ ગુર્જર, મધ્યપ્રદેશ ભાજપ મહિલા એકમના પ્રમુખ માયા નરોલિયા અને કોંગ્રેસના અશોક સિંહ બિનહરીફ ચૂંટાયા હતા. ઓડિશામાંથી કેન્દ્રીય મંત્રી અશ્વિની વૈષ્ણવ અને બીજેડીના દેબાશિષ સમાનત્રે અને સુભાશીષ ખુટિયાને વિજેતા જાહેર કરવામાં આવ્યા હતા. આંધ્રપ્રદેશની ત્રણેય બેઠકો YSR કોંગ્રેસના જી બાબુ રાવ, વાયવી સુબ્બા રેડ્ડી અને એમ રઘુનાથ રેડ્ડીએ જીતી હતી. તેલંગણામાં કોંગ્રેસના રેણુકા ચૌધરી અને અનિલ યાદવને વિજેતા જાહેર કરવામાં આવ્યા હતા. સાથે જ BRSના વી રવિચંદ્રને પણ વિજેતા જાહેર કરવામાં આવ્યા હતા.
જાહેર થયેલા પરિણામોમાં BRS, JDU અને TDPને નુકસાન થયું છે, જ્યારે YSR કોંગ્રેસને ફાયદો થયો છે. બીઆરએસના ત્રણ સાંસદો નિવૃત્ત થયા હતા અને તેને એક બેઠકથી સંતોષ માનવો પડ્યો હતો. એ જ રીતે જેડીયુને બે બેઠકો ગુમાવવાથી અને ટીડીપીને એક બેઠક ગુમાવવાથી કંઈ ફાયદો થયો નથી. બીજી તરફ YSRને બે બેઠકો મળી છે.