Supreme Court ruling on reservation: સુપ્રીમ કોર્ટે સોમવારે એક મામલાની સુનાવણી દરમિયાન જણાવ્યું કે આરક્ષણ ધર્મના આધારે આપી શકાય નહીં. કોર્ટ પશ્ચિમ બંગાળ સરકાર તરફથી દાખલ કરાયેલી એક અરજી પર સુનાવણી કરી રહ્યું હતું, જેમાં કલકત્તા હાઈકોર્ટના 2010ના ચુકાદાને પડકાર્યો હતો. રાજ્યમાં જે જાતિઓને અન્ય પછાત વર્ગ (OBC)નો દરજ્જો આપવામાં આવ્યો હતો, તેને હાઈકોર્ટે બિન-કાનૂની જાહેર કર્યો હતો.
અરજી પર સુનાવણી જસ્ટિસ બી.આર. ગવાઈ અને જસ્ટિસ કે.વી. વિશ્વનાથનની બેંચે કરી. બેંચે જણાવ્યું, અનામત ધર્મના આધારે નહીં આપી શકાય. પશ્ચિમ બંગાળ સરકાર તરફથી રજૂ થયેલા વરિષ્ઠ વકીલ કપિલ સિબ્બલે કહ્યું, 'આ ધર્મના આધારે નહીં, પણ પછાત પણાના આધારે છે.' પશ્ચિમ બંગાળમાં ઘણી જાતિઓને OBCનો દરજ્જો આપવામાં આવ્યો હતો. હાઈકોર્ટે તેને ગેરકાયદેસર ગણાવીને રદ કર્યો હતો. કોર્ટે જણાવ્યું હતું કે જાહેર નોકરીઓ અને રાજ્ય-સંચાલિત શૈક્ષણિક સંસ્થાઓમાં આ જાતિઓ માટે આરક્ષણ ગેરકાયદેસર હતું.
હાઈકોર્ટે પોતાના ચુકાદામાં એ પણ જણાવ્યું હતું કે આ સમુદાયોને OBC જાહેર કરવા માટે ધર્મ એ એકમાત્ર પાયાનો પરિમાણ લાગે છે. સાથે જ, 77 મુસ્લિમ જાતિઓને પછાત જાહેર કરવાનું સમગ્ર મુસ્લિમ સમુદાયનું અપમાન છે. હાઈકોર્ટે એ પણ સ્પષ્ટ કર્યું હતું કે જેઓને આ જાતિઓના આરક્ષણનો લાભ પહેલેથી મળી ચૂક્યો છે, તેમની સેવાઓ કે પસંદગી પ્રક્રિયા પર આ ચુકાદાનો કોઈ પ્રભાવ પડશે નહીં. હાઈકોર્ટે એપ્રિલ 2010 થી સપ્ટેમ્બર 2010 સુધી 77 જાતિઓને આપવામાં આવેલા અનામતને રદ કરી હતી. ઉપરાંત, 2012ના પશ્ચિમ બંગાળ પછાત વર્ગ કાયદા હેઠળ આપવામાં આવેલા 37 જાતિઓ માટેના OBC અનામત રદ કરી હતી.
આજની સુનાવણીમાં સુપ્રીમ કોર્ટે વકીલોને મામલાની વિગતવાર માહિતી આપવા કહ્યું. કપિલ સિબ્બલે કહ્યું, આ ખૂબ ગંભીર મામલો છે, જે હજારો વિદ્યાર્થીઓ અને નોકરી ઇચ્છતા લોકોના અધિકારોને પ્રભાવિત કરે છે. સિબ્બલે સુપ્રીમ કોર્ટને વિનંતી કરી કે તે હાઈકોર્ટના ચુકાદા પર અંતરિમ આદેશ જારી કરે અને તેના પર અસ્થાયી રોક મૂકે. સુપ્રીમ કોર્ટે અન્ય વકીલોની પણ દલીલ સાંભળી, જેમાં વરિષ્ઠ વકીલ પી.એસ. પટવાલિયા પણ શામિલ હતા, જે મામલામાં કેટલાક પ્રતિવાદીઓનું પ્રતિનિધિત્વ કરી રહ્યા હતા. સુપ્રીમ કોર્ટે જણાવ્યું કે તે સાત જાન્યુઆરીએ આ મામલાની સુનાવણી કરશે.
આ પણ વાંચો....