Supreme Court on Pune Porsche Case: વર્ષ 2024 માં થયેલા ચકચારી પુણે પોર્શ અકસ્માત (Pune Porsche Accident) કેસની સુનાવણી દરમિયાન સોમવારે સુપ્રીમ કોર્ટે (Supreme Court) સમાજ અને માતાપિતા માટે અત્યંત કડક અને ગંભીર ટિપ્પણીઓ કરી છે. જસ્ટિસ બી.વી. નાગરત્નએ સ્પષ્ટ શબ્દોમાં કહ્યું હતું કે, સગીર વયના બાળકો દ્વારા દારૂ પીને કરવામાં આવતા અકસ્માતો માટે બીજું કોઈ નહીં, પણ તેમને છૂટછાટ આપતા તેમના માતાપિતા જ જવાબદાર છે.
જામીન અરજી પર સુનાવણી કરતી વખતે કોર્ટે આજના વાલીઓની જીવનશૈલી પર આકરા પ્રહારો કર્યા હતા. જસ્ટિસ નાગરત્નએ અવલોકન કર્યું કે, "આ એક સામાજિક સમસ્યા છે. માતાપિતા પાસે પોતાના બાળકો સાથે વાત કરવાનો કે સમય વિતાવવાનો સમય નથી. તેનો વિકલ્પ શું? તો તેઓ હાથમાં એટીએમ કાર્ડ (ATM Cards) અને પૈસા પકડાવી દે છે. પરિણામે, બાળકો મોબાઈલ અને પૈસા સાથે એકલા પડી જાય છે અને ખોટા રસ્તે વળે છે."
જસ્ટિસ નાગરત્નએ 'ઉજવણી' (Celebration) ની વ્યાખ્યા ભૂલી ગયેલા યુવાનો અને તેમના પોષકોને ઝાટકતા કહ્યું કે, "ઉજવણીનો આધાર નશો ન હોવો જોઈએ. દારૂ પીને તેજ ગતિએ વાહન ચલાવવું અને રસ્તા પર સુતેલા કે ચાલતા નિર્દોષોને કચડી નાખવા એ કોઈ મજા નથી." કોર્ટે ભારપૂર્વક કહ્યું કે જે મા-બાપ બાળકોને કાર અને મોજશોખ માટે બેફામ પૈસા આપે છે, તેમણે જ આ પરિણામો ભોગવવા પડે છે.
આ કેસમાં લોહીના નમૂના બદલવાના (Blood Sample Swapping) કાવતરામાં સંડોવાયેલા 3 આરોપીઓ - આશિષ મિત્તલ, આદિત્ય સૂદ અને અમર ગાયકવાડને કોર્ટે જામીન આપ્યા હતા. જસ્ટિસ નાગરત્ન અને જસ્ટિસ ઉજ્જવલ ભુયાનની બેન્ચે નોંધ્યું હતું કે આરોપીઓ લગભગ 18 મહિનાથી જેલમાં છે, તેથી માત્ર 'સ્વતંત્રતાના અધિકાર' (Right to Liberty) ના આધારે તેમને જામીન આપવામાં આવે છે.
જોકે, જામીન આપ્યા હોવા છતાં કોર્ટ નારાજ હતી. બેન્ચે ટકોર કરી હતી કે, "બે નિર્દોષ લોકોના જીવ ગયા અને ત્યારબાદ કાવતરાં રચાયા. અમે ઘણું કહેવા માંગીએ છીએ પણ ચૂપ છીએ કારણ કે તેની અસર કેસ પર પડી શકે છે." આ ટિપ્પણી કોર્ટની વેદના અને ગંભીરતા દર્શાવે છે.
સુનાવણી દરમિયાન જ્યારે વકીલે દલીલ કરી કે આવા હાઈ-પ્રોફાઈલ કેસોમાં હંમેશા એક ચોક્કસ પેટર્ન જોવા મળે છે - "ગરીબ ડ્રાઈવરને આગળ ધરો, બ્લડ સેમ્પલ બદલી નાખો અને કહો કે ગાડી માલિક નહોતો ચલાવતો," ત્યારે જસ્ટિસ નાગરત્નએ આ વાત સાથે સહમતી દર્શાવી હતી. તેમણે કહ્યું કે કાયદાએ આવા લોકોને પકડવા જ જોઈએ.
અંતમાં, સુપ્રીમ કોર્ટનું આ વલણ માત્ર કાયદાકીય નથી પણ સામાજિક ચેતવણી સમાન છે. પૈસાના જોરે કાયદાને ખરીદવા નીકળેલા અને બાળકોના ઉછેરમાં બેદરકાર રહેતા વાલીઓ માટે આ સુનાવણી એક લાલબત્તી સમાન સાબિત થઈ છે.